الموضوع: الى كل ملاك الصنى محلى 2008 - هل بها أى عيوب .. وما هى أفضل المعارض المعتمدة لها ؟!؟

هل تعلم ان كبوت وشنطه النيسان جايين من جنوب افريقيا بينما باقى البودى جاى من اليابان
هل تعلم ان كراسى موبيكا مش مصرى وانما مستوردة من الخارج ويتم تجميعها فى مصر فقط
هل تعلم ان الشكمان فى النيسان مستورد من اليابان وليس مصرى ويتم استيراده عن طريق مصنع ابواليزيد فى 6 اكتوير
هل تعلم ان البطارية والزجاج وضفيرة الكهرباء صناعة مصرية فقط
هل تعلم ان ابتداء من انتاج شهر 3/2008 يوجد مشكلة فى كراسى موبيكا انها بتزييق بعد استخدام 5 الاف كيلو ويتم تربيطها وفى حالة رجوع التزييق تانى بيتم تغييرها
هل تعلم ان المصنع بقاله 3شهور بيجمع فى الشكل الجديد للنيسان زى اللى موجود فى ماليزيا تحت اسم نيسان سينترا وتم اضافة abs+ebd ولكن لم يتم نزوله الى السوق حتى الان
هل تعلم ان مصنع نيسان ينتج 75 عربية فى اليوم مع العلم ان خط الانتاج يتم بواسطة العنصر البشرى بينما فى الخارج يتم الاعتماد اكثر على الروبوت
هل تعلم ان سعر الجنط الاسبور اللى فى النيسان السوير صالون سعرة 2200جم للجنط الواحد
ارجو ان اكون وضحت بعض المعلومات المفيدة

أنت جبت المعلومات الجامدة دي منين:cute:

جامدة جدا جدا المعلومات دي

احب اوضح ان توكيل نيسان فى مصر اعتقد انه من افضل التوكيلات لانه ببساطه لما يكون عندك اى مشكلة فى العربية يتم تغييرها تلقائيا دون مجادلة بعكس توكيل مثل غبور ولكن يعيب على نيسان فى مصر اعتمادها على موزعين وفريق مبيعات لدى الموزعين معندهمش فكرة عن البطاطا ولو سالت اى حد عن الفرق بين عفشة النيسان ex والسوبر صالون هيقولك دى عفشة رياضية وميعرفش ايه الفرق بين العفشتين
تانى حاجة الناس اللى بتبيع عربيات فى اماكن زى اوتوسمير ريان بيفتوا ويقولوا ان النيسان السوبر صالون مو 2008 وماقبلها مش عفشة رياضية لكن مو 2009 عفشة رياضية
وانا اقسم بالله انى لفيت على اكثر من 90% من الموزعين المعتمدين لنيسان فى مصر ولقيتهم معندهمش فكرة عن البطيخ لدرجة انى اشتكتهم لمحمد جمال (مدير مبيعان نيسان موتور ايجيبت فى مصر وقولتله بالحرف ان احد اسباب عدم بيع العربية الصنى هوا الافراد اللى موجودين عند الموزعين المعتمدين)وانهم لوبيشتغلوا عندى لكنت مشيتهم ولكن العيب مش عليهم العيب على نيسان مصر انها مش بتعمل دورات تدريبية لافراد المبيعات عند الموزعين

أحب اضيف تجربه عن العربيه النيسان لانى كنت ظالمها بصراحه .. بس بعد اللى شوفته .. العربيه بصراحه فوق الوصف ..
انا بقول كنت ظالمها لانى كنت مستكتر عليها فلوسها .. لكن بعد التجربه .. العربيه اكثر من رائعه ..
التجربه كانت من المنصوره للمطار ... 5 قاعدين فى العربيه ..+ شنطه كبيره فى شنطه العربيه ..
الحاجات اللى عجبتنى مع انى مش انا اللى سايق .. صاحب العربيه هو اللى سايق
1 _ تسارع العربيه اكثر من رائع
2 - موتور العربيه من أهدى وانعم المواتير اللى ممكن تسمعها .. العربيه ممكن تكون دايره وما تعرفش
3 _عزل الصوت رائع جدا
4_ عفشه العربيه كويسه جدا جدا جدا ..مع ان العربيه لسه عامله يادوب 3000 كم بس .. لكن العفشه رائعه .. من انعم العربيات اللى شوفتها بتاخد مطبات بجد .. مع ان صاحب العربيه حاسس انها ناشفه .. وبيقول لسها هتنعم كمان مع الاستخدام
5_ ارتفاع العربيه كويس جدا .. مع اننا كنا 5 + الشنطه الا انها ما حفتش فى ولا مطب
6 _ العربيه تقفيلها نظيف .. شكلها فخم ومن جوا شكلها شيك ( ما شاء الله )
7 _ استهلاك البنزين كويس .. بتعمل 275 كم على الطريق و 210 _ 220 جوا البلد
اما الحاجات اللى ماعجبتنيش لكنها مش مؤثره بصراحه
الزجاج الفاتح ( كان يبقى احسن لو عملوه غامق شويه ) ..التكييق بيأثر شويه على السحب بس عادى كل العربيات كده

كلامى ده على Ex الموانيوال موديل 2008

فى الاخر العربيه دى مظلومه بجد .. العربيه دى لو تسويقها احسن من كده شويه وسعرها كان اقل من كده شويه يعنى لو كانت فى اواخر السبعينات او ب 80000 .. كانت أكلت النوبيرا والهيواندى اكسنت الجديده وكل العربيات اللى فى فئتها ... دى وجهه نظرى

فى الاخر العربيه تعتبر صفقه ناجحه جدا للى بيحافظ على العربيه واللى مش ناوى يبيع دلوقت .. يعنى على الاقل تفضل معاه 4 او 5 سنين .. لان من احد عيوب السوق ومش هقول عيوب العربيه ان سوق المستعمل فيها بيظلمها جامد ..
وشكرا ...