المشاركة الأصلية كتبت بواسطة muhammad 80
كل سنة وانتم طيبين وعيد سعيد
عملت شوية صيانات فى شهر رمضان قلت أحكى ربما حد يستفيد خاصة الاسكندرانية
العربية باسات ١٦٠٠ موديل ٢٠٠٠ اوتوماتيك
عملت زى الأستاذ أحمد hitmangate ما قالى وجبت زيت فيبى للفتيس وملتقش فلتر من نفس النوع وجبت فلتر مايلى وكمان فلتز بنزين مايلى وزيت باور فيبى وزيت فرامل توتال بس ملقتش بنفس الكود اللى قاللى عليه dot-4 جبت الموجود وخلاص
ودخت على كومبريسور تكييف استعمال ملقتش غير عند واحد بتاع استعمال فولكس واوكتافيا فى السيوف اسمه رجب فى الشارع اللى فى وش قرية عبد الوهاب للمشويات واخدته بالعافية ب ١٤٠٠ بس بعد ما نزلت دورت فى صلاح الدين وملقتش هناك الا عند واحد اسمع اشرف نابليون قالى حفكهولك وتمنه ٢٠٠٠ جنيه وطبعا سبته ورجعت لرجب فى السيوف
أخدت الحاجات دى كلها وطلعت على الشيخ ابراهيم وسمعت عنه من المنتدى هنا واسمه نازل فى بيانات الناس اللى بتشتغل فى الفولكس
ملاحظاتى عليه الآتى
١- هو نفسه شاب متدين باين عليه دارس وفاهم لأنى لاحظت طريقة نطقه السليمة جدا لكلمة كومبريسور مش طريقة نطق صنايعى
٢- هو شغله كهربا بس والميكانيكا شغل اللى معاه فى الورشه
٣- الورشة امكانياتها ضعيفه جدا جدا جدا
٤- مواعيده مش مظبوطه
٥- الميكانيكى اللى عنده شكله مودى جدا بيشتغل بالمزاج وحسب الضغط واسمه النوبى
الميكانيى هو اللى اشتغل وهو اللى غير الكومبريسور بس موصلوش وقالولى كمله عند واحد بتاع تكييف
غير زيت الجيربوكس والفلتر وحسب كلامه الزيت كان كويس ومكنش له لزمة اغيره
غير زيت الباور
مكنش فيه وقت قبل الفطار ملحقش يغير زيت الفرامل وكان عايز يزود وانا رفضت
غير فلتر البنزين
كان فيه مشكلة فى التبريد عندى واتضح ان فيه ماسورة اللى رايحة عالموتور مخرومة خرمين صغيرين وبتسرب ميه وقالى هات غيرها استعمال وللأسف جبت من عند رحب غيرها وطلعت بتاعة أودى ومش زىيها بالظبط من حيث الصواميل اللى بتركب عليها وش الموتور بس هو وفقها الى حد ما
المشكلة ان الماسورة دى ادهالى ب ٥٠٠ جنيه وانا مستكترها اوى
بعد كده رحت لواحد بتاع تكييف ركب فيشة الكومبريسور وشحن فريون وفعلا التكييف كان حكاية وتلاجة لكن لاحظت بعد كام يوم ان التكييف وانا واقف لو فى اشارة او السكه واقفه وطولت الكومبريسور يبطل والهوا يدخل مرطب ودافى ولو طولت يقلب سخن ووصلت ان مؤشر الحراره زاد جدا بعد ال ٩٠ بشرطة وبشرطتين كمان ومنزلتش الا لما وقفت التكييف
كمان العربية بحس بيها عايزة تبطل وبتلحق نفسها وببص على ال rpm بلاقيه تحت ال ١٠ بشرطة وشاكك فى موضوع ال idle لأن الموتور بينزل وشكله مش قادر يشيل الكومبريسور عشان كده التكييف وانا ماشى بيبقى زى الفل ولما بيقف بيقل
دى الخلاصه ولو حد يفيدنى فى مشكلة التكييف دى ياريت يقولى