انا زهقت العربيه بتسقف

**meeg** · 16-01-2014 07:58 PM

سلام عليكم ورحمة الله وبركاته
كل عام وانتم بخير
عندى مشكله مضيقانى العربيه بتسقف اوى لو مخدتهاش سنه سنه بتسقف ولو على مطلع ببقى مضطر احرق على الغيار علشان التسقيف والموضوع خنقنى جدا الصراحه انا لسه عامل سيرفيس كامل فلاتر وكاتينه وبوجيهات والتسقيف كان موجود من قبلها بس انا افتكرته هيقل بس هوا زاد فى الغالب اعمل ايه
لكم منى جزيل الشكر والتقدير

**وائل شويخ2** · 16-01-2014 09:02 PM

أخر كهرباء العربيه شويه من الأسبراتير

**hossamalsadik** · 17-01-2014 12:50 AM

التسقيف ده موضوع متشعب جدا بس ابتدى معاك بالأتى
تاكد من نوعية البوجيهات انها جيدة والموصى بها من كتالوج العربيه او الماتور وكذالك سلوك البوجيهات جيدة مفيهاش تسريب كهرباء
تأكد من نوعية البنزين أنه 92 على الاقل مع نضافة لدورة البنزين بالكامل ( حط منظف لدورة البنزين بالكامل من النوعيات الجيدة )
تأكد من ظبط الأسبراتير فى الوضعيه المظبوطه
أخيرا حساس الكرنك شيك عليه

ويارت تقول موصفات ماتورك ونوعية اخر صيانه دوريه عملتها بالتفصيل ليسهل الرد ومناقشة الموضوع
كود ماتورك - انجكشن ولا كاربراتير ولا هاف انجكشن - فيه كنترول - اسبراتير عادى ولا كهرباء الكترونى وهاكذا

**hossamalsadik** · 17-01-2014 07:33 AM

تمام
أعمل الى قلتلك عليه فى المشاركة السابقة بالترتيب وشوف النتيجه

**hossamalsadik** · 17-01-2014 08:28 AM

تتأكد من الجراب الى داخل فيه السللك ليس به قطع
تتاكد من احكام افايز سلوك البوجيهات من الطرفين سواء على البوجيه او الاسبراتير وبيبقى فيه زى تكه خفيفه عند تركبهم لتثبت عمليه الأحكام
تأكد ان راس البوجيه نظيف وايضا داخل افيز سلك البوجيه نظيف من اى رواسب معوقه لتوصيل الكهرباء

**Mahmoudelsayed** · 17-01-2014 02:22 PM

100 % يا استاذ حسام شكرا على الافاده

انا عندى وش الاسبراتير فيه صباع مكسور منه حته لاكن السلك راكب كويس
ممكن يكون بيسرب ولا لا

شكرا

**hossamalsadik** · 17-01-2014 03:34 PM

يعنى ممكن تعمله فكره تعزله بيها زى شكرتون عازل او سليكون حرارى عشان ميلمش تراب وابخرة ويبتدى يعزل كهرباء بس طبعا مشكله أ/ meeg مختلفه أنا ماشى معاه خطوه خطوه من الاسهل للاصعب لان الواحد مش شايف العربيه امامه فالواحد عاوز ميسبش حاجه لها علاقه مباشره او غير مباشره بالمشكله لحد ماتتحل أن شاء الله

**SYD** · 17-01-2014 06:03 PM

العربية بتسقف ولا بتنتش؟

عموما مشكلة التسقيف السبب الرئيسي فيها اختلاف وقت الإشعال عن وقت نزول البستم ودي حلها بتظبيط وقت الإشعال
وبالتالي انا شاكك في تركيب الكاتينة
تأكد من الكاتينة دي ١
اظبط خلوص البوجيهات لو هي ١ شمعة ويفضل لو تغيرها ب٣ شمعة ان امكن
تأكد من سلامة سلوك البوجيهات وغطا الاسبراتير وتركيب ارضي الاسبراتير بأحكام
واتبع جميع نصايح ا/ حسام من تنظيف الدورة وخلافه

تحياتي