الموضوع: تجربتى المريرة فى الشراء من الانترنت

المشاركة الأصلية كتبت بواسطة Maged_Samy

من شهرين كنت ابحث على النت عن جهاز انذار وتتبع Gps بسعر مناسب علشان اركبه فى عربيتى المتواضعة بعد ما وصل اليه حال مصرنا الحبيببة وخاصة محافظة الاسكندرية من انعدام فى التواجد الامنى وسرقات سيارات كل يوم ، وفعلاً لقيت واحد بسعر مناسب على موقع صينى وقمت بشراءة على انه سوف يسلم لى بمقر سكنى بدون مصاريف شحن (Free Shipping) وبعد الشراء تم ارساله الى مصر عن طريق شركة بريد سنغافورية ووصل بالفعل الى مكتب التبادل الدولى بمطار القاهرة ثم الى مكتب بريد رمسيس لدى جمارك رمسيس وتوقف عند ذلك منذ بداية يتاير 2014 وبالاستفسار عن الشحنة من البريد المصرى عن طريق الرقم 16789 قالولى ده عند الجمرك كلمهم وادونى رقمين 02/22654697 و 0222654698 وطبعاً مفيش حد بيرد على الرقمين دول ابداً فكلمت البريد تانى قالولى كلم استاذ ربيع وادونى رقم موبايل برده مبيردش ، فيه ناس قالتلى لازم تسافر ليهم القاهرة وتجيب موافقة الجهاز القومى لتنظيم الاتصالات وتدفع الجمارك والرسوم وضريبة المبيعات وده طبعاً مش هيخلص فى يوم واحد وناس قالت لازم تشوف مستخلص جمركى ولو معملتش كده هدفع ارضيات عليه وبعد شهرين هيتعدم .....
مش عارف اسافر القاهرة وده طبعاً لازم له اجازة ومصاريف سفر وبهدلة وممكن ارجع زى ما روحت من غير حاجة ... و لا انسى الموضوع من اساسة وعليه العوض ومنه العوض ....
انا فعلاً فى حيرة ... ليه المعامله فى مصر كده تليفونات مبتردش ايميلات مبتردش لكن اول ما ابعت ايميل للصين بيردوا عليا فى نفس اليوم ... ياريت اللى عنده حل للموضوع ده يشاركنى الفكر ... ولكم الشكر
اعتذر للاطالة ...

معلش يا فندم بس هو مكتب رمسيس ده وحش جدا بخصوص التعامل خصوصا بتوع الجمارك فيه وابسط حاجة عندهم هات لنا موافقة جهة العرض.

دورتلك على اى نمرة لقيت نمرة مكتب مدير عام خدمة الطرود الخارجية على تليفون 5746063(02) حاول تكلمه وتقوله مشكلتك وشوف ها يقدر يساعدك ولا لأ.

سؤال يا زعيم انت جبت الجهاز بكام ومن انهى تاجر على aliexpress ياريت لينك.

المشاركة الأصلية كتبت بواسطة تامر.محمد

هي النجدة كانت بترد عشان اي موظف تاني يرد ؟

هما على الرغم من بطء استجابة القسم بعد البلاغ لكن الحق يقال النجدة بترد على التيفون وبتوصل بلاغك بالقسم اللى انت تابع ليه.

المشاركة الأصلية كتبت بواسطة rotanamasoud

انا شارى سكانر عربيات من بره بس عن طريق وسيط بياخد عموله وفعلا ادى العيش لخبازه
الاول قالى سبنى يومين اعرفلك الجهاز ممنوع دخوله ولا مسموح
بعد كده حسبلى تكلفه الجهاز بعمولته حتى وصوله لباب المنزل
بعد ما دفعت العربون ب3 اسابيع لاقيت المندوب عندى فى البيت
الناس دى لها سككها وبتعرف تخلص

اشتريته اونلاين ووصل لمكتب البريد اللى تابع ليه ورحت استلمه وكانت تكلفة الجمرك والتخليص حوالى 25 جنيه.

المشاركة الأصلية كتبت بواسطة Maged_Samy

شكراً لردودكم ، مشكلتى فعلاً ان انا نسيت انى فى مصر وافتكرت نفسى فى بلد متقدمة والحاجة هتجينى لغاية البيت وياريت الكل يستفاد من الموضوع ده ومحدش يشترى ابدا من النت طالما هيجيبها مصر
ودى صورة الجهاز :

اعتقد ده موديل TK103A