عايز أركب مساعدين أماميين لشاهين

**Theredbaron** · 25-09-2008 02:41 AM

أنا معايا عربية شاهين موديل 2001 و كنت عايز أغير مساعدين أماميين فقدامي خيارين
1-مساعد ألماني ماركة Mylle
2-مساعد إيطالي مش متذكر ماركته
فلو ممكن حد ينصحني و يقولي ايه نظامهم أو يقولي على نوع تاني كويس
شكرا

**emadkamel** · 28-09-2008 12:31 AM

كل الناس هنا اجمعوا على المساعدين المونرو .. اصلى وبضمان سنه من عند هشام لهيطة فى التوفيقية
يعملوا حوالى 450

**MohabSaeed** · 28-09-2008 01:52 AM

مونرووو للابد , اوعى تجيب مساعدين من غير ضمان و اوعى تسمع كلام العفشجيه الى بيفتو ويقولو البولندى 100 100 و المايلى المانى و الكلام الفارغ ده.. كل الماركات ديه للاسف مضروبه و من غير ضمان , انا جبت البولندى الى العفشجى حسسنى انه اختراع خارق و كان ارخص من المونرو ساعتها ب 20 جنيه بس , و قعد بالظبط 10 ايام و حجر و باظو بعد كده بقى فيه دقر لدرجه انه بوظلى البطاحات ... الكلام ده من رمضان الى فات .

لسه جايب مساعدين مونرو من 4 ايام ب 410 جنيه من عند هشام لهيطه بضمان سنه و بطحتين ب 50 جنيه .

ممكن تلاقى مساعدين الشاهين اغلى 20 او 30 جنيه .

**Theredbaron** · 29-09-2008 05:46 PM

شكرا على المعلومات و أنا سمعت كلامكم و جبت مونرو

**zizophone** · 09-10-2008 07:44 PM

هو تقريبا الميلي افضل لانة انعم من المنرو
بس لو عايز ثبات خليك في المنرو والمايلي الاصلي موجود برضة في شارع زكي عند اول واحد على الشمال وانت داخل من اتجاة سنترال رمسيس والمايلي كان قدام عامل ب450 وورا ب210

**MohabSaeed** · 09-10-2008 08:12 PM

المايلى ممعاهوش ضمان = مالوش لازمه

اهم حاجه فى المساعدين الضمان

**zizophone** · 10-10-2008 06:38 AM

بس الراجل صاحب المحل قالي ان المايلي معاة ضمان سنة انت شايف اية؟
أدور على منرو بالضمان أفضل ولا المايلي ؟

**dream_man1110** · 14-10-2008 10:18 PM

طيب ممكن تفيدنا و تقولنا جبت المونرو منين و بكام و ضمانه اد ايه و هل هوه زيت ام غاز . و شكرا ليك

**MohabSaeed** · 14-10-2008 11:36 PM

المشاركة الأصلية كتبت بواسطة zizophone

بس الراجل صاحب المحل قالي ان المايلي معاة ضمان سنة انت شايف اية؟
أدور على منرو بالضمان أفضل ولا المايلي ؟

انا شايف ان المونرو اضمن و الكل مجربه . المايلى ماركه محترمه طبعا " لو اصلى " لكن هل الى بيتباع اصلى ده السوال , و هل الضمان ده حقيقى ولا وهمى ؟

انا شايف ان المونرو اضمن و ممتاز و سعره معقول . ديه وجهة نظرى

المشاركة الأصلية كتبت بواسطة dream_man1110

طيب ممكن تفيدنا و تقولنا جبت المونرو منين و بكام و ضمانه اد ايه و هل هوه زيت ام غاز . و شكرا ليك

.................

"" لسه جايب مساعدين مونرو من 4 ايام ب 410 جنيه من عند هشام لهيطه بضمان سنه ""

هشام لهيطه ده فى التوفيقيه , و فى ابو عصام فى شارع مجلس الامه . السيده زينب . , دول موزعين معتمدين لمونرو
و المساعدين الاماميه بتكون زيت , و الخلفيه غاز .(( بالنسبه للشاهين و الدوجان و ال131 ))

**dream_man1110** · 14-10-2008 11:51 PM

انا معايا ريتمو يا مهاب و راكب فيها ورا مساعدين غاز جننونى واحد خفيف و التانى قافش و النحيه اليمين نازله لتحت زى ما يكون عندها كوساح . و بفكر اروح الحرفيين اجيب جوز ورا استيراد من عند الخواجه بس مش عارف عنوانه و سعر الخلفى ايه و هل اغامر تانى و اجيب غاز مع انه ناشف و على فكره انا بعشق الجرى و الغرز . مدمن تهريج على الطريق و ربنا يسترها معايا و معاكم فمحتاج بردو نوع من الثبات و هيه بردو عائليه يعنى الفانوليا بتبقى معايا اغلب الوقت فمش عايز اجيبلهم انزلاق غضروفى فى القطنيه بسبب المساعدين الناشفين . و ميرسى لذوقك