انا الحمد لله بعت عربيتى "نوبيرا بريميوم 1999 اوتوماتيك" و قررت ادخل عالم الزيرو
و بعد لف و تدوير و مقارنات نويت اجيب السانديرو الاوتوماتيك لاسباب كتير مش هقولها دلوقتى لحد ما اتأكد بنفسى من الكلام اللى ملاكها بيقولوه عشان يبقى فى مصداقية ومعملش زى 95% من المصريين (اللى بيجيب حاجة تبقى هى احسن حاجة فى الدنيا - وبعد ما يبعها يشتم فيها شتايم الابل)
المهم .. انا بعد ما استلمت العربية و اتحركت بيها بقالى يومين اهو ليا شوية ملاحظات و شوية اسئلة:
1- هى لمبة التشيك انجن فين و مش بتنور ليه لما باجى ادور؟؟
2- صوت الموتور مش عالى زى ما الناس بتقول - يمكن عشان لسه زيرو ؟؟
3- صوت المروحة لما بتشتغل بيبقى عالى اوى .. بس مش جوه الكابينة
4- السنتر بيبقى من الريموت بس ولا ايه؟؟ .. بمعنى انى لما بقفل الباب بتاع السواق بالمفتاح .. بقيت الابواب بتفضل مفتوحة!!! فى حين انه بالريموت بيشتغل عادى
5- الكلاكس مش راضى يشتغل و رايح التوكيل بعد بكره يشوفوه .. و بصراحة كلمتهم و حسيت انهم محترمين .. يا رب يبقوا كده فى الواقع كمان