الموضوع: اختيار زيت موتور

هقولك على حاجة بس مش عايزك تستغرب
دى معلومة قالهالى واحد بتاع زيت وفاهم

طبعا معروف ان اى زيت بيتعمل عليه تجارب وابحاث واضافات عشان تحسن من خواصه وتخليه يستحمل ظروف التشغيل

الزيوت اللى بتيجى من برة دى مش معمولة لبلدنا لكنها معمولة للبلد اللى جاية منها
وحتى لو معمولة لبلدنا, برده مش هتكون مناسبة لينا لأن التجارب اتعملت عليها وهى برة البلد, يعنى المهندس اللى بيعمل الابحاث قاعد فى بلده وعنده معلومات بتقول ان درجة الحرارة فى مصر من كذا لكذا وان نسبة الغبار كذا لكن هو منزلش بنفسه وشاف الطرق عاملة ازاى ولا متوسط الكيلومترات اللى اى عربية بتعملها ولا زحمة الطرق والاشارات ولا درجة سوء البنزين اللى بنستعمله, فبالتالى النتيجة مش هتطلع مظبوطة

لكن الزيوت اللى بيتم تعبئتها فى مصر دى بيتم عمل التجارب عليها فى مصر
و المهندس قاعد وشايف كل حاجة قدام عنيه وعلى اساسه بيظبط خواص الزيت على البلد اللى قاعد فيها

الزيوت العالمية اللى بيتم تعبئتها فى مصر هى موبيل وشيل فيما عدا شيل الازرق النصف تخليقى ده بيجى اتحاد اوروبى
وطبعا الزيوت المصرية زى التعاون ومصر للبترول فى منها تخليقى
فيه نوع تانى بيتباع فى بنزينات امارات مصر اسمه فسكو انا بصراحة مش عارف هو بيتعبى فى مصر ولا بيجى من الامارات بس المهندس ايهاب منصور بيحطوا فى عربيته الكوردوبا موديل 2000 وبيشكر فيه جدا وسواقته معظمها سرعات عالية وسفر

انا عارف انك كده احترت اكتر بس فى النهاية مفيش مقياس للكلام ده كله
المقياس هو انك تجرب بنفسك وتشوف عربيتك هترتاح على اى نوع زيت لأن كل عربية بتختلف حالتها عن اى عربية تانية

المهندس محمد سيد تقريبا من ساعة ما اشترى العربية وهو كل غيار زيت بنوع غير اللى قبله