السلام عليكم ..

ده تقييمي الشخصي البسيط عن الجوك .. طبعا اللي عايز يعرف تفاصيل أكتر .. اخونا Sharky أبدع في الموضوع ده وأفادني جدا قبل شراء العربية الحمدلله ..

http://www.nilemotors.net/Nile/344793-2013.html


انا جبت العربية من أوتو سمير ريان وكانت تجربة ممتازة بصراحة .. جابلي اللون النبيتي في ساعتين من ساعة ما طلبتها .. ومقصروش في حاجة بصراحة .. استلمتها والحمدلله لسه مرخصها من يومين ..

مندوب المعرض كان رائع .. خلصلي موضوع الترخيص تماما في خلال ساعة و10 دقائق !! بهرني بصراحة لأن الطبيعي إني ممكن اقعد في الموضوع ده كام يوم

العربية ممتازة لشاب في بدايته أو لسه متجوز وعنده كام عيل صغيرين .. لكن لو محتاج عربية عائلية وبتركب كتير معاك يبقى فكر في القاشقاي .. الجوك من ورا والشنطة مش مساحة واسعة بس معقولة ..

أحسن حاجات موجودة حبيتها .. المرايات كبيرة وعارضة اللي جمبي بشكل ممتاز .. العربية عالية عن الأرض 18 سم ونص تقريبا .. يعني مفيش مطب الحمدلله خفت منه .. الكاوتش بتاعها مديها ثبات رائع .. بتحس بفرق كبير بين كل Mode والتاني يعني مثلا ال Normal Mode بتمشي تسارع عادي وكله عادي بس لما تكون Sport السحب أحسن كتير وبتلاقيها بتجري معاك .. صوت الموتور ناعم ومش مزعج .. العزل جيد جدا ..


العربية نوع غريب تحس إنه كروس أوفر على كوبيه سبورت على هاتش باك .. المهم إنها فكرة جديدة والحمدلله صفقة ناجحة بمشيئة الله ..


فيه صورة من موضوع اخي العزيز Sharky



تاني زرار اللي تحت ده لو ضغطت عليه بيخلي ال D تبقى Ds يعني Drive sport والموضوع لسه مكتشفه .. ده بيخلي ال gear ratio مختلف وأحسن علشان لما تيجي تطلع في الأول او تشد العربية تديك أحسن استجابة عند التسارع ..


عندي سؤال .. لو حبيت أركب أي حاجة زينون مثلا او شاشة .. هل ده يلغي ضمان العربية ؟ وهل ينفع أركبهم في التوكيل؟

لو حد عنده أي سؤال عن العربية أنا تحت أمره والحمدلله على كل حال .. أترككم مع الصور ..