الموضوع: استقسار ... نتشة في العربية مع الفرامل

السلام عليكم
وانا ماشي بالعربية " skoda octavia A5 " بقالها فترة بتنتش و لما بدوس فرامل وأطول مش عارف ده من ايه .. لو حد عنده خبرة او يقدر يفيدني ياريت يساعد
شكرا مقدما

السلام عليكم ورحمة الله وبركاته
طبقاً لخبرتى وتجربتى مع Octavia A5 لو عربيتك أوتوماتيك فالحل تغيير زيت وفلتر الفتيس حتى ولو لم يكتمل إستخدامه 60000 كم.
وهذه تجربتى :
اشتريت Octavia A5 2006 فى عام 2011 وبعد أربع أشهر بدء يحدث معى التالى:
1- نتشة بين النقلات خاصة بين النقلة الثالثة والرابعة
2- حدوث رزعة جامدة عند الفرامل المفاجئة ( نزول نقلات الفتيس لأكثر من نقلة ) كأن حد خبطك من الخلف
3- نتشة جامدة عند وضع الفتيس على الوضع R
4- عند إستخدام الفرامل لتفادى مطب أو خلافه ثم متابعة السير بإستخدام دواسة البنزين بقوة يرتفع صوت الموتور و RPM دون الإحساس بحركة السيارة لثوانى ثم تبدء الحركة بشكل فجائى
وذهبت إلى مركز صيانة معتمد ـ بدون ذكر إسمه ـ كشف على العربية وقال الفتيس محتاج بادى فالف وكلتشات وطبعاً الزيت والفلتر والتكلفة فى حدود 17000 جنيه ، طبعاً كرهت اليوم اللى قررت فيه إنى أشترى A5 خاصة وإنى مجرب A4 من 2007 وعربية زى الفل.
ذهبت بعدها إلى مركز خدمة أرتوك أوتو بدير الملاك وشرحت لمهندس الصيانة ( وليس مهندس الإستقبال ) ملاحظاتى على الفتيس فقال لى مبدئياً العيب بادى فالف ولكن دعنى أجرب العربية أولاً ، بالفعل طلعنا جربنا العربية ولاحظ كل ما أشتكى منه وقالى غيرت الزيت والفلتر من كام كيلو وأخبرته إنى مشتريها من أربعة أشهر مستعملة فقال لى عندك إستعداد تجازف بـ 1500 جنيه تكلفة تغير الزيت والفلتر فأجبته بنعم ، وكانت النتيجة والحمد لله إيجابية وزالت جميع الشكاوى التى كنت أشكو منها
الخلاصة:
يتم تغيير زيت الفتيس والفلتر بعد 40000 كم أو 50000 كم على الأكثر ، لأنى لاحظت إن مشاكل الفتيس لاتظهر إلا بعد المشى المستمر لأكثر من ساعتين أو عند الحرق على الفتيس أى عندما ترتفع درجة حرارة زيت الفتيس ممايدل إن الحرارة العالية تقلل من كفاءة الزيت وهو المسئول عن نقل الحركة داخل جسم الفتيس ، وحيث أن جو بلدنا حار جداً فى الصيف بالأضافة إلى الزحمة الشديدة فى شوارعنا فإن الزيت يفقد الكثير من خواصه قبل العمر الإفتراضى المصمم له.