مشكلة بخصوص اصدار كارت البنزين الخاص بي
السلام عليكم
انا عندي مشكلة في إصدار كارت البنزين الخاص بيا وعايزة اعرض الموضوع بتاعي ليكم لو حد يقدر يساعدني او يفيدني بنصيحة مفيدة لان شكل العملية ميبشرش بخير
من يوم 20 سبتمبر 2013 دخلت عادي زي خلق الله علي الويب سايت عادي وسجلت بياناتي وبيانات العربية بنجاح الحمد لله لاصدار كارت البنزين
ولما جيت للحتة بتاعة اختيار طريقة ومكان استلام الكارت كان في 3 اختيارات حطينهالي:
- عن طريق شركة شحن
- عن طريق مكتب بريد في منطقتي
- عن طريق بنك الائتمان الزراعي بوسط البلد
ويظهر انها كانت غلطة عمري اني اخترت اني اروح استلمه من البنك بس ده كان علشان ساعتها لقيت ناس كتير علي النت والفيس بوك بتشتكي من تأخر شركات الشحن في تسليم الكروت وكمان قولت اهو البنك علي بعد شارعين من بيتي في وسط البلد مفرقتش
ومن ساعتها لحد دلوقتي (اكتر من 4 شهور) كل ما اتصل بالخط الساخن اللي عاملاه e-finance المسئولة عن اصدار الكروت أسأل امتي هستلم الكارت اللي بيرد عليا يقولي تم طباعة الكارت يا فندم وجاري التنسيق مع البنك لارسال الكارت له واول ما يبقي في البنك هنتصل بحضرتك تروحي تستلميه علطول!!!
الجملة دي سمعتها 10 مرات مختلفة بقالي شهرين (من ساعة ما ابتديت اتابع لما لقيت الموضوع إتأخر)
ناس كتير سجلت وفي اسبوعين بالكتير جالها الكارت ومنهم ناس اصحابي مسجلين من اسبوعين او 3 بالكتير واستلموا وانا قاعدة محلك سر من سبتمبر 2013 مش فاهمة في ايه!!
آخر مرة لما اتصلت بيهم (من يومين) وقعدت ازعق وقولت انا هقدم فيكم شكوي قالي اللي رد عليا حاجتين متناقضتين اوي لمجرد انه يهرب من الحكاية وخلاص:
اول حاجة لقيته بيقولي يا فندم التأخير من عند البنك مش من عندنا البنك هو اللي كان رافض يدينا قاعدة بيانات أسماء العملا بتوعه اللي لازم يستلموا الكارت منه!!!
طبعا كلام فااااارغ وضحك علي الدقون زي ما بيقولوا لإن ليه البنك يرفض يدي معلومة زي دي؟ وأصلا ازاي e-finance معندهاش اسماء الناس اللي اختاروا انهم يستلموا كروتهم في بنك الائتمان الزراعي؟؟ ما هو لما بسجل في الموقع بيطلع اكيد في السيستم عندهم اني اخترت استلام الكارت من البنك ده وظاهر اسمي بالكامل ورقم بطاقتي عندهم يبقي اصلا ملهاش معني ابدا ان البنك ميديش الشركة اسامي الناس!! اي كلام وخلاص
ولما زنقته بالأسئلة دي ومعرفش يرد برد عليه القيمة راح قالي حاجة تانية خالص ملهاش علاقة بالأولانية وبالعكس متناقضة معاها تماما:
وهي ان احنا (يقصد e-finance) طبعنا الكارت بتاع حضرتك بالفعل بس اكتشفنا انه اطبع غلط ومكانش ينفع نسلمه لحضرتك وهو غلط ده كان هيعملك مشكلة اكبر فبالتالي احنا دلوقتي في مرحلة اعادة طبعه!!
4 شهور بيعاد طبعه!!
وبردو ختام المكاملة المعهود هنبقي نتصل بحضرتك لما نرسله للبنك!!!
وحتي لما كل مرة بطلب تغيير طريقة الاستلام واني استلمه عن طريق شركة شحن او اروح بنفسي حتي ليهم اخده كل مرة يترد عليا بإنه مينفعش! لازم عن طريق البنك زي ما طلبتي!! يعني منتهي التعنت والاهمال من الآخر
بصراحة الشركة اللي تقعد 4 شهور علبال ما تطبع كارت وتسلمه للعميل (ده لو رسيت علي 4 شهور الله وحده اعلم هستلمه امتي دلوقتي ولا بعد سنين!) لا يمكن اثق في انها فعلا تطبعه بسرعة وتسلمهولي علطول ومش عايزة الاقي نفسي في يوم بعد شهور تانية (والوقت بيمر بسرعة) مضطرة امون بنزين عن طريق كارت الطوارئ اللي في المحطات وبعد شهور او حتي سنين بعدها الله اعلم هيحصل ايه مش هقدر امون خالص ولا همون بس بسعر لتر البنزين الحر زي ما رئيس مجلس ادارة e-finance اللي اسمه ابراهيم سرحان قال قبل كده! انا مش هدفع في يوم من الايام ثمن غلطة الشركة دي
أمال أنا ليه سجلت بدري؟ مش عايزة اجي في الآخر زي ملايين المواطنين اللي هيتزنقوا في الآخر ويبقوا متكدسين في التسجيل ومزنوقين في التموين للبنزين لعربياتهم لكن انا كنت عايزة يبقي في ايدي الكارت من بدري وبمون براحتي يوم ما يفعلوا المنظومة! لكن e-finance ليها رأي تاني اني ابقي من اللي حظهم زفت ويطلع عيني علبال ما اخد الكارت دي لو اخدته!
من الآخر لو حد يا جماعة له حد معرفة كبيرة في وزارة المالية (اللي تتبعها e-finance) او في شركة e-finance نفسها يقدر يساعدني في حل المشكلة يا ريت يفيدني
انا بعت شكوي تفصيلية للجهتين بالايميل (طبعا عارفة انه اي كلام ومالوش لازمة في بلد زي مصر) لكن ده اجراء لحد ما اروح بنفسي اسلمها بس من الآخر عمر ما حد هيبص عليها الا لو متوصي عليها من حد هناك
لو حد يقدر يساعدني يا ريت لان بجد شكل حظي جه شمال مع الشركة دي وهعيش في المعاناة دي كتير لحد ما تتحل بطريقة الواسطة كالمعتاد في البلد دي
ويا ريت محدش يقولي ان ده طبيعي لان زي ما قولت الشهور بتجر بعضها واللي اتأخروا 4 شهور ممكن يتأخروا سنين او ميعملوش حاجة خالص وانا اللي هتسوح في الآخر وخصوصة مع طريقة الرد الغير مطمئنة خالص بتاعة :هنبقي نتصل بيكي لما يصدر!!
وبعتذر اني صدعتكم وطولت اوي في الكلام بس كان لازم اشرح الموضوع بتفاصيله
وشكرا للجميع مقدما