انا معايا 35 الف ونفسي اركب مرسيدس المهم لقيت عربيات 200 موديل 77 ايه رايكم فيها كا عربية فى الطريق وهل ممكن تبقي اتوماتيك ولا مينفعش ومكيفة ولا لا طب والتسارع عامل اية وقطع الغيار اسعارها ياريت ردودكم مهمة
عرض للطباعة
انا معايا 35 الف ونفسي اركب مرسيدس المهم لقيت عربيات 200 موديل 77 ايه رايكم فيها كا عربية فى الطريق وهل ممكن تبقي اتوماتيك ولا مينفعش ومكيفة ولا لا طب والتسارع عامل اية وقطع الغيار اسعارها ياريت ردودكم مهمة
الحاجات الأنتيكة دي يفيدك فيها الأخ صدام
هو بيفهم فيها كويس و بيحب ركوبتها و بيفضلها على الجديد رغم قلة الأبشنز فيها
انا متفرقش معايا الاوبشن انا بسال العربية كمشي وسرعة الاقي منها اتوماتيك ومكيف ولا موديل قديم وخلاص والاخ صدام رد عليا فى موضوع قبل كده بس فلوس اللى مقصرة شوية
صديقي المواطن
قولا واحدا شكرا لثقتك الغالية وأنت عضو عزيز على قلبي ولكن التنويه يقتضي أن أزيدك علما إني أحب أنواع معينة من السيارات وليس كل عشقي للقديم بدليل أن سياراتي من موديل 1951 وحتى 2011 وكمان الذي قد لا تعلمه أن عربياتي من موديلات الخمسينات والستينات دايما بزودها بأعلى ما تنتجه التكتولوجيا كالبور والتكييف وأنظمة اﻹتزان الحديثة والكراسي الكهربائية والجنوط الحديثة والستائر الكهربائية وعشرات كماليات التكنولوجيا ولو كنت أحترم ال abs كنت ركبته أيضا بسياراتي الكلاسيك ولكني مكتفي بسياراتي الحديثة التي بها هذا النظام الفاشل إلى حد ما والذي له منفعة واحدة وله مضار أكثر من نفعه وأيضا بركب فتايس أوتوماتيك لعربياتي المانوال وبسقط مواتير ضخمة لعربيات صغيرة وبقصر عربيات وبطولها وبعرضها ولو عربية عاملة حادثة ومعجونة برجعها زيرو وكمان بعدل فوانيس وكمان بزرع فوانيس وكمان بعرض رفارف وغيرها
واﻵن نعود للأخ السائل الكريم
المشكلة في المرسيدس المعدل الشكل اللي حضرتك تطلبه أنا بكرهه بسبب إنه أكتر شكل مطلوب في مصر ومدعوك في كل مكان وعليه طلب عالي لغاية دلوأتي وأعرف وحده بيضة زيرو مطلوب فيها 76 ألف فبريكة بره وجوه بوهية شركة وعربية حتى كلاكس الفبريكة فيها
وأنا من يومين عرضت علي 5 سيارات وحده ب 22 ألف و وحده ب 35 ألف و وحده ب 45 ألف و وحده ب 20 ألف و وحده ب 47 ألف
وهناك كذا طريقة عشان تركب عربية زي دي
مثلا نجيب وحده ضايعة ب 20 ألف ونشدها ب 25 ألف نجيب وحده حادثة وناخد ورقها ونجيبلها نصين من بور سعيد وتركب عربية زيرو رسمية وهناك طرق أخرى الصدفة تسوقنا إليها
ولكن حضرتك دورت كتير وطلبت مساعدتي قبل كده وقلتلك أنا بكره المعدل ولكن هو عربية سريعة جدا وثابتة وبتجيب ال 200 بسهولة وثبات وحزيدك من الشعر بيت المعدل عمرها أكثر من 30 سنة ولكن هي أقوى وأثبت من كل العربيات 2014 كورولا وإلانترا وسيراتو وفيرنا ولانوس وأوبترا وغيرها
وأنا مساعدة مني ﻷنك عاشق للعربية حدلك على طريقة تساعدك تركب معدلة مكيفة وأوتوماتيك وهي إنك تجيب ال 35 ألف وترجعلي بعد 6 شهور تكون حوشت 10 أو 12 ألف وأنا أسلمك معدلة مكيفة وأوتماتيك وعفشة زيرو والنايلون على الكراسي وضمان شهرين ضد أي عطل عدا الكاوتش عليك وأنا حزقها وسط عربياتي ﻷني من يومين شفتهم بيشدوا وحده عالصاج جنب عربياتي
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال
ملحوظة غالب ظني أنا حخسر في العربية دي بس أنا شايفك ملهوف وحاسس بيك وبفتكر نفسي إني عمري ما طلبت حاجة في المنتدى هنا وحد ساعدني وساعتها أنا عاهدت نفسي لازم ييجي اليوم اللي نكسر بيه القاعدة دي ولما حد يطلب مساعدة يرد واحد ويقول عيني ويكمل معاه المشوار للآخر بجد مش زي ما ناس بتعمل يعشمك ويقللك حاضر وعيني وحسأللك وأجيبلك قرارها وفي اﻵخر سكتن بكتن
ملحوظة أرجوك متطلبش مني أخلصهالك في أقل من 6 شهور عشان صناعة عربية كل حاجة فيها جديد عملية مرهقة ومتعبة ومقرفة جدا جدا وأنا معروف عني ولا بختصر ولا بلزق وهدية مني فوق البيعة حسلمهالك متعدلة فوانيس شكل 2014 لزوم الحداثة
اشكر الاخ صدام على مدي تعاونة معايا وبصراحة تعبتك معايا بس انا كده ترددت وتهت منك بصراحة يعني افتراضا هتصرف كام يعني حسبة العربية وشدها وتظبيطها يكلف كام لو هيعدي المبلغ اللى معايا مش هينفع بصراحة لانى مزنوق بجد او بالعربي فى حجات تانية اهم بس بصفة عامة فانا بصراحة مش عارف لانى احترت
صديقي المواطن
أنا حبيت أخدمك والله شاهد ويوم القيامة مسؤول عن صدق كلامي
ولكن أنا للأسف بحاول أساعدك وإنت مش بتحاول تساعد نفسك قلنالك المرسيدس المعدل أبو 35 ألف مش نظيفة ورجعنا قلنالك أم 45 ألف شايلة نفسها ومانوال ومن كل 30 معدلة حتلاقي وحدة بس أوتوماتيك وفيه عربيات بيتكلموا في 50 ألف وفيه عربيات ب 20 ألف ماشية بس خرابة وفيه ب 25 ألف حضرتك قلت معييش غير 35 ألف قلتلك ماشي حعمللك وحده بسكتي ب 45 أو 47 وحتاخد وقت 6 شهور تجمع فيهم ال 10 آلاف اللي نقصاك عقبال مخلص العربية وحتكون أوتوماتيك أصلي ومكيفة ووعفشة جديدة وفوانيس جديدة وبوهيتها سكنس وجلد وعدادات كلها جديدة وبرضو في اﻵخر لما تخلص حتكون بنظافة أم 60 ألف وحضرتك ترد عليا وتقوللي أنا تهت منك فتخيل شعوري آه لو تعرف أنا بشوف التجار بيعملوا إيه في المرسيدسات وفي الشبحات وبيبوعهالكو إزاي لكن معلش الحمد لله على كل شيء عامة أنا برضو حفضل عارض خدماتي ليك مجانا دور إنت على أي عربية بمعرفتك وأنا أبصلك عليها مجانا وحسبة لله تعالى
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال
ملحوظة كل كلامك مزعلنيش اللي زعلني منك إنك شايف فيه حاجات أهم من عربيتك وركوبتك ومنظرك أمام الناس فدماغك صعب تمشي مع دماغي ﻷن أنا شايف إن اﻹنسان أول متجيله 10 جنيه يجيب عربية فخمة ثم بيت فخم ثم بخلص نواقص مراته وعياله ثم يشوف لبسه وشغله وحاله ويطور نفسه لكن حضرتك ليك أولويات تانية فربنا يوفقك
بص يا باشا زى ماقال الاستاذ صدام فعلا ب35000ج دى هتكون عربية تعبانة العربية دى فعلا بتوصل ل70000ج وعلى فكرة حجتها متوفرة ومش غالية قوى يمكن من 3سنين كانت ارخص بكتير كمان بس مازالت رخيصة وركوبة ما بعدها ركوبة ويا ريت تجبها فوق موديل 80 عشان تبق الماكنة السودة ولو ممعكش غير ال35000 هتها واركبها شوية وبعدين ابقا شدها الشدة الى هية ودى عربية انا ندمت ندم عمرى لما بعتها ومعايا دلوقتى e190 1987 كاملة كل حاجة وفابريكة بالكامل بس مش زى المعدلة ابدا
الاستاذ المحترم صدام
بجد و حقيقى انا معجب جدا جدا جدا بكل حاجة انت بتعملها فى سياراتك لانى بعشق السيارات الكلاسيكية
و شايف انها اجمل مليون مرة من اى عربية 2014 زيرو ده طبعا لو حالتها هتبقى زى المصنع او زى ما حضرتك بتعملها على ايديك
انا كان معايا لانوس و الحمد لله بعتها و بامانة انا عايز اجيب 200 و ده لانها انسب حاجة لظروفى ككل من حيث الصالون والعزل و التحمل و قطع الغيار و الاعتمادية و الشكل طبعا و انا مش من النوع اللى بيحب يغير فاتمنى من ربنا انك تساعدنى فى انى الاقى حاجة متميزة لدرجة ان فيه ناس قالولى على بتوع المرسيدس فى فاقوس و انهم بيشدوها من الالف للياء فانا معنديش صبر على انى اجيب واشد و خاصة مع قلة الخبرة و سيادتك انا من النوع اللى ما بيعرفش يفاصل كمان فاكيد هينضحك عليا و حوارات كتير هبقى احكى لحضرتك عليها من اللى شفته مع الانوس اللى انا شايفها 128 بس بشكل اخر و مع احترامى ليها وللعربيات الكورى واليابنى و مش كلهم طبعا بس اغلبهم فى نظرى مش عربيات دول بيقضوا المصلحة وخلاص
اعتبرنى عضو عزيز عليك و ياريت لو تعاملنى بالمبدا بتاع الفلوس و تاخد اتعابك فى مساعدتى ولو انى ما اعتقدش انها تتقدر بفلوس طبعا او انا اقدر اديلك اللى تستحقه بس من باب عدم بخس الناس اشيائهم
طلب اخر لى صديق مههوووس بالعربيات جدااااااااااااا و ذوقه و اسلوبه فى ادق التفاصيل قريب لحضرتك كدا شوية لو تحب مساعدته ليك فى اى حاجة و بدون مقابل انا اعتقد انه هيرحب جدا بذلك لدرجة انه كان ايز يشتغل فى ورشة و مطلع رخصة مهنية من حبه فى السيارات
اسف على الاطالة و اتمنى اسمع رد حضرتك
فيه نقطتين نسيت اقولهم بحس ان حقبة التمانينات افضل سيارات اتعملت على وجه الاطلاق
الحاجة التانية انا متابع ليك و موضوعاتك بجدية لاعجابى بها
الله وكيل وشهادة لله الاخ صدام عمرة ماقصر فى رد او اي حاجة بس الفلوس اللى مقصرة هههه بس الحمد لله انا لقيت بصراحة معدل 35 الف لون اسمر لكن من جوة صالون حكاية على العموم احتمال اخلص فيها ومع الزمن ان شاء الله اروق عليها بس انا خايف من البنزين والضريبة لانها 2000 سي سي ناس كتير حذرتني ومن قطع غيار فياريت تكمل جميلك وترد علينا
معلش هتقل عليكم ايه موتور اسود ومش عارف موتور ايه دي حاجة وهل مع الوقت لو جبتها وكل شوية عملت حاجة انا عارف انها هتصرف اكتر بس هيجيي يوم وتكون عربية هاعمل ايه بقه النصيب