الأسبوع ده كان أول تجربة سفر بالبيجو 301 الهاي لاين لأن كان عندي مشوار للغردقة و الحمد لله الطريق كان كويس جدا وانا الطريق متعود عليه لاني بسافر كل كام شهر الغردقة
بالنسبة للعربية فالحمد لله ثابتة ومستجيبة للسرعة ....متوسط السرعة كان 120-130 ووصلت لحد 170 لمده صغيرة .....على سرعة 120 بيكون RPM لفات الموتور 3500 ووصلت 5000 مع سرعة 170 (العربية طبعا اوتوماتيك) وأكيد لو العربية كانت 6 سرعات كانت حتكون مستريحة اكتر ولكن هي معندهاش أي مقاومة للسرعة وبتحب الجري
استهلاك البنزين من القاهرة للغردقة بيكون دايما احسن من العكس لان بيكون مع اتجاه الريح وعلى حسابي زى ما قلت بسرعة متوسطة 120-130 والتكييف مفتوح 7.5 لتر/100كم أما في الرجوع ومع مقاومة الريح في الطريق للقاهرة وخاصة اليومين دول لان فيه رياح جامدة ومع نفس السرعة والتكييف فتقريبا كان 8.8 لتر/كم وانا شايف معقول جدا مقارنة بعربيتي السابقة الالنترا 2012 واللي كان استهلاكها أفضل من كده بفرق بسيط بس طبعا الالنترا مع الفتيس 6 سرعات كانت مرتاحة اكتر في السرعة

بالصدفة في الباركينج في الغردقة لقيت ستروين سي اليزيه هاي لاين نفس اللون بتاع البيجو (الشامبين) واخدت لهم صورة وجه لوجه لأني اول مرة اشوفها في اللون الشامبين وطبعا هما الاتنين اخوات حلوين بس انا لسه برضه متحيز للبيجو

واليكم صورة اللقاء