خطوات وتكلفة تشطيب شقة 125 متر صافى فى 6 اكتوبر

**omarkhaled55** · 27-01-2014 08:55 PM

الحمد للة ربنا كرمى وجيبت شقة 125 متر صافى فى 6 اكتوبر على المحارة
وانشاء الله هبدا اوضب فيها وكنت عايز اعرف كل مرحلة بالترتيب وتكلفة كل مرحلة كام
يعنى مثلا انشاء الله انا عارف المفروض ان ابدا بالكهرباء والسباكة فكنت عايز اعرف التكلفة حتكون فى حدود كام ؟؟ واية الى مفروض اعملة بعد كدة ؟؟؟

يارييييييت الى عندة تفاصيل واسعار يقولى ضرورى عشان انا محتاس وبسمع ارقام خيالية

انشاء الله انا عايز اعمل الكهرباء تشمل سلك لى 2 تكيف وغسالة ملابس واطباق وميكرويف وسلك تلفون ودش دى تتكلف كلم خامات ومصنعية ؟؟؟

**hossam_elwani** · 27-01-2014 09:52 PM

من 40 الى 50 الف لو التشطيب متوسط فما فوق المتوسط

**lada2010** · 27-01-2014 10:01 PM

لو 50 الف تشطيب شقة يباق لة الحق الشباب لايتجواز لة الناس ما تعمليش حاجة حاجة كل لما يجى قرشين اعمل حاجة

**Waleed_Fathy** · 27-01-2014 10:53 PM

ايه مستوي التشطيب اللي انت عاوزه
ده اللي هيحدد التكلفة
اول خطوه و دي اهم خطوه لازم ترسم فرش الشقه و ده مهم جدا
و يبقا نهائي علشان ميبقاش في اية تعديلات
اقعد مع المدام لو متزوج او مع خطيبتك المهم ترسي علي الشكل النهائي للفرش
ده اللي هيحدد هتعمل ايه في كل شيء بعد كده
يا ريت تقولنا تفاصيل الشقه يعني فيها حمام واحد و لا اتنين و مساحة الحمام كام و المطبخ مساحته كام
و الاوض مساحتها كام و ان شاء نحاول نفيدك

**canner** · 28-01-2014 08:42 AM

اول حاجة الف مبروك و ربنا يبارك لك فيها
تانى حاجة ابعد عن المقاولين فيه منهم مش بيتقى ربنا و يسمسروا من كل حاجة
احسن حاجة تتفق مع صنايعى صنايعى و تجيب انت الخامات و تقف معاهم خطوة بخطوة
تالت حاجة ماستخسرشى فى الاساسيات زى الخامات الكهربا و الميه و المحارة علشان دول اللى اهم حاجة و لا قدر الله طلع فيهم حاجة كده و لا كده ح يطلعوا عنيك بعد كده

**amr011111** · 28-01-2014 09:07 AM

المشاركة الأصلية كتبت بواسطة canner

اول حاجة الف مبروك و ربنا يبارك لك فيها
تانى حاجة ابعد عن المقاولين فيه منهم مش بيتقى ربنا و يسمسروا من كل حاجة
احسن حاجة تتفق مع صنايعى صنايعى و تجيب انت الخامات و تقف معاهم خطوة بخطوة
تالت حاجة ماستخسرشى فى الاساسيات زى الخامات الكهربا و الميه و المحارة علشان دول اللى اهم حاجة و لا قدر الله طلع فيهم حاجة كده و لا كده ح يطلعوا عنيك بعد كده

كلام سليم تماماً هات صنايعى لكل حاجه واشترى له حاجاته ومتتفقش مع مقاول

اول حاجه هتعملها هتجيب سباك ونجار وكهربائى ممكن دول يشتغلوا فى نفس الوقت
السباك هيعملك السباكه كلها والكهربائى هيمعمل خراطيم الكهرباء والعلب ويمشى السلوك فى الخراطيم والنجار يركبلك حلوق وابواب
وبعدين تجيب مبيض محاره يمحر الحوائط وبعدين يعملك اسقف مصيص وسرر وكرانيش

وبرضه ممكن تدخل مع بتاع المحاره بتاع السيراميك يشتغل فى حوائط الحمامات ولا يخلص بتاع المحاره والمصيص
يبدأ فى عمل سيراميك للأرضيات
وبعد كده هتجيب النقاش يدهن الحوائط والاسقف
وبعدين الكهربائى يرجع تانى يقفله مفاتيحه ويركب النجف
وبعدين السباك يرجع تانى يركب الاجهزه ( خلاطات - اطقم حمامات - بانيو اكريلك )

**A.Saad** · 28-01-2014 09:56 AM

مبروك الشقة
الخطوات
رسم الشقة
تحديد مستوى التشطيب اللى عندك لان اغلب الشغل فى الشركات بيكون فيه عيوب
تشوف التعديلات الاساسية من اضافة حائط او هدم حائط او ترحيل لاخر
تعمل التعديلات دى
تدخل على توضيبات للكهربا
عزل الارضية فى الحمام
سباكة
نجارة لو هتعيد حاجة
محارة ومصيص وكرانيش
اول وش نقاشة
سيراميك
الوميتال للشباببيك
جبسون بورد لو هتعمل
نقاشة تانى
تقفيل النقاشة ثم الكهربا والسباكة

لو مستوى محترم فاخر حوالى 95 الى 110
ولو عايز صنايعية فى اكتوبر او اماكن شرا تحت امرك
عندك فى
الكهربا : سلوك من السويدى فى المحور المركزى
خامات من العالمية فى الكفراوى
السباكة : القدس فى المركزى
مكة فى الكفراوى
برفكت فى المركزى
الفجالة وسيف فى ليلة القدر

**r0xer** · 28-01-2014 01:54 PM

التشطيب بس 100 الف...والعفش 100 الف كمان...واقل اقل شقة ب300 الف...الشاب عايز 500 الف جنيه عشان يتجوز ويعيش في شقة مستورة مش في فيلا ولاقصر.. :d

الله يرحمك ياجدي... :)

-

الموضوع: خطوات وتكلفة تشطيب شقة 125 متر صافى فى 6 اكتوبر

LinkBack

أدوات الموضوع

عرض

-

-

-

-

المواضيع المتشابهه

شقه بدون تشطيب 209 م بكمبوند حي الاشجار 700000 الف جنيه نصف تشطيب سعر المتر 3350

شقة 110 م ف 6 اكتوبر الحي الرابع مجاروة اولي تشطيب سوبر لوكس بفرشها

شقة متميزة جدا 127 متر صافى بالحى المتميز 6 اكتوبر

بالفيديو و الصور شقة صافى 96 بالحادى عشر اكتوبر

الكلمات الدلالية لهذا الموضوع

المفضلات

المفضلات

ضوابط المشاركة