حادثة هائلة فى السماء

**TaoTao** · 23-10-2009 10:25 AM

المشاركة الأصلية كتبت بواسطة bmya

حد يفهمني كده براحه يعني ايه اا مش فاهم وتوهت بس براحه عشان افهم:h_angry[1]:

يتحرك الضوء بسرعة حوالي 300 ألف كيلو متر في الثانية الواحدة، طبعاً سرعة رهيبة يعني الضوء يقدر يلف الكرة الأرضية 7 مرات في الثانية الواحدة (لو عرفنا نضبط مساره في مسار دائري حول خط الاستواء)
طبعاً سرعة رهيبة دفعت العلماء الأوائل للاعتقاد أن الضوء ينتقل آنياً (يعني مالوش سرعة ده بينتقل بمجرد صدور شرارة الضوء في لا زمن) معذورين لأن المسافات الصغير لا يظهر فيها انتقال الضوء.
إمتى يظهر إن الضوء له سرعة؟ لما المسافة التي ينتقل فيها الضوء تكبر جداً جداً زي انتقال ضوء الشمس للأرض .. إزاي؟ تبعد الشمس عن الأرض 149 مليون كيلومتر لو قسمت المسافة دي على سرعة الضوء هانلاقي إن ضوء الشمس بيوصل الأرض في حوالي 8 دقائق يعني أول شعاع شمس عند الشروق ده كان صدر عن الشمس من 8 دقايق يبقى موقع الشمس اللي أنا شايفه دلوقتي من على الأرض ليس موقعها الحقيقي في السماء ولكنه موقعها في السماء منذ 8 دقائق ..
نيجي للفضاء نجده شاسع وواسع جداً والمسافات فيه كبيرة جداً لو قسناها بالكيلومتر أو الميل، الفلكيون اعتمدوا على وحد للقياس اسمها "السنة الضوئية" وهي المسافة التي يقطعها الضوء في سنة (يعني تقريباً 300 ألف كيلومتر * 365 يوم * 24 ساعة *60 دقيقة * 60 ثانية)
نيجي بقى لأقرب نجم --غير الشمس- للأرض هانلاقيه يبعد 4 سنوات ضوئية، يعني إيه؟ يعني الضوء اللي صادر عنه بيستغرق 4 سنوات عشان يوصل الأرض، أي أن ما نراه الآن على هذه المجموعة الشمسية هو ما حدث هناك فعلاً من 4 سنوات .. حاجة تلخبط؟ :) ممكن نقول إنها حاجة زي تأخير إشارة التليفزيون اللي بيحصل لو بننقل مباراة من أفريقيا مثلاً إشارة التليفزيون ممكن تكون متأخرة 5 دقايق، يعني لو أبو تريكة جاب جون هناك فعلاً هانشوف في مصر إنه جاب الجون بعد 5 دقايق (أي أننا نشاهد تاريخ المباراة وليس المباراة نفسها على الهواء مباشرةً)
طيب بما إننا نرى هذا النجم متأخر 4 سنوات أو أننا نرى ماضي هذا النجم إذن ممكن يكون النجم ده فنى من سنة مثلاً ولكننا لا نزال نرى صورته ولمدة ثلاث سنوات كمان.
طيب ده كان اقرب نجم للأرض، ماذا عن النجوم التي تبعد آلاف السنين الضوئية؟ أي أن ما نراه الآن من هذه النجوم هو ماضيها من آلاف السنين (لأن الضوء لسة في السكة) ماذا عن النجوم التي تبعد ملايين السنين الضوئية؟ نفس الموضوع .. ممكن تكون نجوم انتهت وانفجرت ولكننا مانزال نرصدها فالإرسال متأخر ملايين السنين، يعني الماتش خلص فعلاً بس الإرسال لسة شغال في مصر.

نرجع للبورتريه، السماء حالياً نجومها ومجراتها تبعد عننا بمئات آلاف وملايين السنوات الضوئية، أي أن ما أراه الآن في صفحة السماء هو ماضي هذه النجوم فبعضها يبعد عني مليون سنة ضوئية، والبعض يبعد عني بأكثر والبعض أقرب من هذا، أي أنه صورة لما كانت عليه هذه النجوم،
ولهذا وفي إشارةٍ إعجازية للقرءان الكريم نجد الله يقسم بمواقع النجوم "فلا أقسم بمواقع النجوم" ويلفت الله نظرنا "وإنه لقسم لو تعلمون عظيم" يعني لما يأتيكم العلم وتعرفوا أن ما تنظرون إليه هو "مواقع النجوم" وليست النجوم الحقيقية نفسها ستدركون مدى عظم هذا القسم. والله أعلم

يا رب أكون قدرت ابسط المعلومة وتحت أمرك في أي اسفسار.

**bmya** · 24-10-2009 04:51 AM

تاتو باشا شكرا لحضرتك علي التوضيح بس بجد سبحان الله العظيم
بس دي حاجه مش قادر اتخيلها ازاي

**wawoo** · 27-10-2009 03:29 PM

المشاركة الأصلية كتبت بواسطة bmya

تاتو باشا شكرا لحضرتك علي التوضيح بس بجد سبحان الله العظيم
بس دي حاجه مش قادر اتخيلها ازاي

اللة ينور يا تاو تاو باشا , شرحت باسلوب و امثلة مبسطة و تمام ..

شوف يا اخ bmya انا عارف انة ممكن يكون صعب عليك انك تتخيل الموضوع دة , بس مع الامثلة اللى عندك لو فكرت فيها حتلاقيها منطقية .

وانا حقولك على مثل ظريف جدا من الواقع يقربلك الحكاية دى .

فى برامج التلفزيون اللى فيها اتصال هاتفى , دائما تلاقى المذيعة تقول للمتصل , اسمعنى من التلفون و متسمعنيش من التلفزيون و وطى التلفزيون خالص .
لية هى بتقول كدة , لانك لو رديت على المذيعة من التلفزيون حتاخد وقت اطول من ردك فى التليفون , عشان كدة تلاقى المتصل بيستنى شوية لحد ما يسمع الرد و بعدين هو يرد و دة بياخد وقت اطول .

انت طبعا مستغرب اية الفرق بين التليفون و التلفزيون ما هو كلة شغال فى نفس الوقت و انا شايفها و هى سمعانى من التليفون .

الحقيقية انة فى فرق , فرق صغير جدا و الفرق دة نتيجة اجهزة كتير شغالة عشان توصل الصوت و الصورة لحضرتك و انت قاعد فى بيتك .

و المثل بتاع ابو تريكة دة مثل ممتاز , لو فى عندك مبارة مذاعة علىالتلفزيون الارضى و على الراديو و على قناة فضائية , حتلاقى الاتى هو اللى بيحصل .

المستمع فى الراديو بيعرف الاول , و بعدين المشاهد فى القناة الارضية و بعدين المشاهد فى القناة الفضائية , و السبب سرعة وصول الاشارة بين الثلاثة انظمة بسبب عدد الاجهزة المستخدمة .

القناة الفضائية هى ابطائهم عشان الاشارة لازم تتبعت للفضاء الاول و بعدين تنزل ليك تانى .
الفروق بينهم مش محسوسة غير باجزاء من الثانية لكن هى فروق موجود بسبب الطبيعة الفزيائية للمادة .

كل حاجة فى الكون ليها سرعة , الصوت لة سرعة و الضوء ايضا لة سرعة .

انت لو فى الحرب مثلا و انفجرت قنبلة على بعد كيلو متر منك , حتلاقى صورة الانفجار حصلت الاول و بعدها بثوانى وصل صوت الانفجار , لية لان سرعة الضؤء اكبر من سرعة الصوت بكتير.

حتقولى طيب لية فى متشاط الكورة الصوت بيوصل مع الصورة مش بيوصل متاخر , الحقيقية ان الاتنين بيوصلو متاخرين لانهم بيكون فى اشارة واحدة .

و على فكرة فى سرعات اعلى من سرعة الضؤ اكتشفت حديثا و كمان من المستحيل حاليا ان اى جسم يوصل لسرعة الضؤ لانة لو وصل لسرعة الضؤء حيتحول لضؤء و طاقة يعنى المادة حتختفى .

الحقيقية ان موضوع السرعات دة كبير جدا و بس اتمنى انك تكون قدرت تتخيل شوية الموضوع .

المسافات فى الفضاء و فى الكون رهيب عشان كدة العلاماء عملو مقياس السنة الضويئة دة عشان يختصرو شوية ارقام المسافات لانها عملاقة .

عندك مثلا المجرة اللى احنا فيها دى مجرد " درب اللبانة " قطرها حوالى 40 الف سنة ضوئية .
يعنى عشان توصل من اولها لاخرها محتاج اربعين الف سنة و انت بتتحرك بسرعة الضوء و طبعا مستحيل انت تتحرك بالسرعة دى من اساسة .

طيب اوقلك على حاجة كمان , التلفزيون تم اختراعة سنة 1940 تقريبا .
يعنى اول اشارة تلفزيونية كانت من 70 سنة تقريبا , انت عارف ان الاشارة دى وصلت لاطراف المجموعة الشمسية من مدة قصيرة بس .
يعنى لو واحد عندة تلفزيون و واقف فى اخر المجموعة الشمسية حيشوف اول ارسال لسنة 1940 يعنى اول قناة تلفزيونية حيشوفها من سكان الارض حتكون بعد 70 سنة .

بالتالى تقدر تتخيل ان النجوم اللى انت شيفها دى و اللى كتيرمنها يبعد عننا الاف بل ملايين السنين ا لضوئية , ان كل الى انت شيفة دة مجرد صور فقط من النجوم الحقيقية اللى موجودة , النجوم الحقيقية اماكنها تغيرت و اشكلها تغيرت و قد تكون حياتها كمان انتهت هى نفسها من اساسة .

شوفت بقى اننا عيشين فى كون هائل فى الحجم و من الصعب بل من المستحيل تخيل حجمة من اصلة .
كل دة عشان تعرف ان الخالق دة عظيم جدا و ان كل السموات و كل النجوم دة ممسكوة بيد القدرة اللة العظيمة .

و شوف الاية دى :

بسم الله الرحمن الرحيم
" لخلق السماوات والارض اكبر من خلق الناس ولكن أكثر الناس لا يعلمون "
صدق الله العظيم

عاوز اقولك ان فى نجوم اكبر من نجم الشمس بتاعتنا دى ب 100 الف مرة .
و فى مجارت اكبر من مجرتنا بكتير , و عدد المجرات المقدرة حاليا فى هذا الكون بحوالى 100 الف مليار مجرة .

مجرتنا الام فيها حوالى 500 الف مليون نجم .