تجربتى بعد 214.000كم فى السيراتو 2010

بسم الله الرحمن الرحيم
فى البدايه احب اشكر كل من يساهم فى تعليم الناس وافادتهم وانا شخصيا استفدت من هنا كتير اوى ونخص بالشكر اصاحب الموقع لان بجد لو اجتهادهم مكنش الناس حبت الموقع ده .
انا معايا سيراتو 2010 ماشيه 214.000 كيلو متر تقدر تقول كده لفيت مصر كلها والحمد لله عن تقييمى للسياره بعد الكيلو متر ده فهى ولله الحمد زى ما هى بتجرى وبشد بيها مع عربيات اعلى منها واحدث منها اما عن الصيانات فا اللى عايز يسأل على حاجه يسأل وان شاء الله احاول افيده ولله الحمد انا ربنا كرمنى واشتريت بى ام دبليو 318 2009 الفيس لفت بس مرضتش اتخلى عن السيراتو ليها غلاوه خاصه بعد الى عملته فيها وللعلم جنوطى 17 اى حد عايز اى سؤال يتفضل وانا ان شاء الله هرد .


http://imageshack.com/a/img10/7784/s00o.jpg

ربنا يباركلك فيها ويكفيك شرها ويديك خيرها وعقبال لما تعمل بيها 2 مليون كيلو



بس ايه رايك فى العربيه بشكل عام بعد الرقم دا يعنى العربيه بحالتها ولا خلاص اصبحت خربانه وكل حاجه بايظه


ثانيا :- ايه ال محتاج يتغير مثلا وايه ال لسه بحالته

اقتباس:

---

المشاركة الأصلية كتبت بواسطة احمد المصرى

ربنا يباركلك فيها ويكفيك شرها ويديك خيرها وعقبال لما تعمل بيها 2 مليون كيلو



بس ايه رايك فى العربيه بشكل عام بعد الرقم دا يعنى العربيه بحالتها ولا خلاص اصبحت خربانه وكل حاجه بايظه


ثانيا :- ايه ال محتاج يتغير مثلا وايه ال لسه بحالته

---

اولا شكرا لاهتمامك يا احمد بس العربيه انا بعملها صيانه دوريه عادى جدا ممكن يكون فبل معادها وذلك نظرا لسفرى دائما اما عن الاعطال فالله الحمد انا مجتش فيو ادورها او امشى بيها وعطلت تاني حاجه الحاجه الوحيده اللى عايز تتغير خارج الصيانه هى بليه سير بقت خشنه شويه وده مش عيب دنا بقولها كفايه عليك كده متشكرين واسف للاطاله

بسم الله ما شاء الله
كتر خيرها
و ربنا يعينك
214 في 4 سنين!!!
ده أنا بعمل 6 آلاف فالسنة و ببقى زهقان من السواقة...يمكن عشان سواقتي كلها جوه البلد

اقتباس:

---

المشاركة الأصلية كتبت بواسطة abohend

بسم الله ما شاء الله
كتر خيرها
و ربنا يعينك
214 في 4 سنين!!!
ده أنا بعمل 6 آلاف فالسنة و ببقى زهقان من السواقة...يمكن عشان سواقتي كلها جوه البلد

---

6 الاف فى السنه انا بعمل اكتر من 10 الاف فى الشهر دلوقتى ههههههه ربنا يدينا ويديلك الصحه

يا جماعه الأرقام دى طبيعيه
اعرف عربيه سيراتو معديه ال 500 الف بدون اى مشاكل مع طبعا الأهتمام بالصيانات الدوريه فى ميعادها

ربنا يباركلك فى العربيه يا باشا

اقتباس:

---

المشاركة الأصلية كتبت بواسطة mohamed1979

يا جماعه الأرقام دى طبيعيه
اعرف عربيه سيراتو معديه ال 500 الف بدون اى مشاكل مع طبعا الأهتمام بالصيانات الدوريه فى ميعادها

ربنا يباركلك فى العربيه يا باشا

---

بص هى من ناحيه طبيعيه فلا لان الطبيعى يكون معدلك فى رنج 20 الف فى السنه وانا السنه اللى فات عملت موضوع تجربتى بعد 100 الف وفى خلال سنه عملت 100 كمان وعلى فكره انا عربيتى راحت التوكيل مره واحده بس غيرت زيت صيانتى كلها بره لان معنديش وقت احجز واسيبها يوم ولا اتنين فى االتوكيل بس انا بشترى قطع الغيار بنفسى اصليه واروح للميكانيكى بتاعى اعمل كل حاجه فى نص ساعه وامشى والهدف من نشرى الموضوع للافاده مش علشان ااقول ان انا عامل كيلو متر كتير مش داخل سباق انا بنقل تجربه واللى عايز يسال هجاوبه لان متعرفش تعمل ايه فى الصيانه فلازم تسال وتتعلم وانا سألت كتير قبل كده واتعلمت فواجب عليا اللى يسال اجوبه وشكرا للمشاركه

مبروك الاول ع العربية الجديدة وربنا يسترها عليك انا لسة جايب كيا سيراتو2012 كانت عامله 12000كيلو كاملة ماعدا البصمة وفتحت السقف المهم سعرها كان110 دة بعد ما طلع عينى فى الفصال المهم العربية ما شاء الله جميله بس ابتدى يظهر بالونات ف الكاوتش الامامى بصراحة اتقفلت من الجنط 17 وفكرت اغيره واجيب 15 او16 لكن غير كدة العربية ما شاء الله

صحيح يا باشا انت غيرت سير الكاتينه ولا لسه وبتغير تيل الفرامل كل قد ايه تقريبا ( الاصلى ولا اى نوع كورى )

ربنا يباركلك فيها و يكفيك شرها .....بس انا سمعت ان العقشه علي الجنط ال 17 فيها مشاكل تقريبا ....و اخبار تماسك العربيه ايه يعني لما تجيب سرعه عاريه تخس ان العربيه مش متماسكه ؟؟ وشكرا

بسم الله ما شاء الله ربنا يديلك خيرها ويكفيك شرها ، بس كل الصيانات بره التوكيل ، ازاي تثق في ميكانيكي بره

بسم الله ما شاء الله :) يا غالي انتا غيرت المساعدين ؟ او اي حاجة في العفشة ؟ غير بيض الدركسوين و الميزان ؟ و على كام غيرت حجات في العفشة ؟ عشان انا عملت 100 و حاسس العربية ابتدت تفك مني مع اني مغير البيض و التيش الميزان و بربط عفشة !! و قواعد الموتور غيرت حاجة :)

ياريت تحكيلنا تفاصيل الصيانات يا باشا :) قصة حيات الصيانة :)

اقتباس:

---

المشاركة الأصلية كتبت بواسطة mohamed ataa

مبروك الاول ع العربية الجديدة وربنا يسترها عليك انا لسة جايب كيا سيراتو2012 كانت عامله 12000كيلو كاملة ماعدا البصمة وفتحت السقف المهم سعرها كان110 دة بعد ما طلع عينى فى الفصال المهم العربية ما شاء الله جميله بس ابتدى يظهر بالونات ف الكاوتش الامامى بصراحة اتقفلت من الجنط 17 وفكرت اغيره واجيب 15 او16 لكن غير كدة العربية ما شاء الله

---

الف مبروك ع العربيه بس انت جبتها من معرض ولا من النت اصل سعرها كويس
هو لما بتشترى ع عربيه وكيل انت بتكمل الضمان مع التوكيل ولا فى مشكله

كنت عاوز اعرف منك معدل استهلاك البنزين ليها كام
واسعار قطع الغيار لو تقدر تفيدنى بالحاجات اللى فاكرها
وتيل الفرامل بيقعد كام كيلو

ربنا يباركلك فيها كلامك خلانى افكر لا ابيع عربيتى لانى احس انها وحشه فى المطبات علما ان معى سيراتو 2011
جنوط 16 بس المشكله فى المطبات اللى مليا بلدنا زى ما انتو عارفين
فهل ترى الافضل اخليها للاولاد واشترى انا حاجه عاليه عن الارض بفكر فى نيسان قشقاى او اعلى شويه تويوتا فيرنتشر على حسب السيوله

اقتباس:

---

المشاركة الأصلية كتبت بواسطة ah-elgendy

الف مبروك ع العربيه بس انت جبتها من معرض ولا من النت اصل سعرها كويس
هو لما بتشترى ع عربيه وكيل انت بتكمل الضمان مع التوكيل ولا فى مشكله

---

لا جبتها جار واحد معرفة بس للاسف العربية خليجى مش وكيل وقبل ما اجيبها ناس كتير شكرت فى الخليجى وقالولى عادى الخليجى احسن من الوكيل ومع واحد صحبى الوكيل مش فارق كتير عن اللى معايا

برجاء الافاده عن تجربتك مع الجنط 17 و العفشة لحسن اخوك غير مساعدين و العفشة فككت خالص و العربية يا دوب عامله 50.000 و النبى التجربة بالتفصيل و ايه اللى يتغير الاول و ايه اللى يخلي العفشه حاكمه مش تحس بشخلله و الدركسيون يسمع فى ايدك مع المطبات

بالنسبة للزيوت فتيس وبور وفرامل بتغيرهم كل كام كم وايه الانواع اللى استعملتها

لو فى سيراتو مثلا نفس عربيتك الموديل وكل حاجه بس العداد عندك 214 والسيراتو التانيه 60 الف مثلا .. لو العربيتين اتباعو .. فرق السعر هايكون كام ؟؟؟ يعنى الفرق فى العداد بس .

اقتباس:

---

المشاركة الأصلية كتبت بواسطة mohamed ataa

مبروك الاول ع العربية الجديدة وربنا يسترها عليك انا لسة جايب كيا سيراتو2012 كانت عامله 12000كيلو كاملة ماعدا البصمة وفتحت السقف المهم سعرها كان110 دة بعد ما طلع عينى فى الفصال المهم العربية ما شاء الله جميله بس ابتدى يظهر بالونات ف الكاوتش الامامى بصراحة اتقفلت من الجنط 17 وفكرت اغيره واجيب 15 او16 لكن غير كدة العربية ما شاء الله

---

بص ياباشا انا غيرت يجى 100 طقم كاوتش الافضل والامتن واللى معملش معايا حاجه لاسا تركى ده افضل نوع هو نوعا ما ناشف مش زى بريدج ستون وكونتنتال وبريلى ورغم انه ارخص شلته بعد 70 الف سليم بمعنى الكلمه

اقتباس:

---

المشاركة الأصلية كتبت بواسطة احمد المصرى

صحيح يا باشا انت غيرت سير الكاتينه ولا لسه وبتغير تيل الفرامل كل قد ايه تقريبا ( الاصلى ولا اى نوع كورى )

---

بص ياباشا سير الكتينه فى العربيه حديد مش بيتغيير اما عن تيل الفرامل فا الفرامل مفيهاش هزار اصلى ياباشا وبيقعد معايا فى رنج 30 &35 الف نظرا لسفرى دائما تما الطبيعى بو فى كايرو ممكن 25

اقتباس:

---

المشاركة الأصلية كتبت بواسطة mostafa afifi

ربنا يباركلك فيها و يكفيك شرها .....بس انا سمعت ان العقشه علي الجنط ال 17 فيها مشاكل تقريبا ....و اخبار تماسك العربيه ايه يعني لما تجيب سرعه عاريه تخس ان العربيه مش متماسكه ؟؟ وشكرا

---

بص ياباشا الجنط ال 17 عايز محافظه نش اكتر تماسك العربيه بعد 150 160 فوض امرك الى الله بقى دى بتاعت ربنا هههههههه مع العلم انا كل ما امسك طريق العلمين 220 وش

اقتباس:

---

المشاركة الأصلية كتبت بواسطة tito85

بسم الله ما شاء الله ربنا يديلك خيرها ويكفيك شرها ، بس كل الصيانات بره التوكيل ، ازاي تثق في ميكانيكي بره

---

سؤال بس هو اللى جوا التوكيل ده مش ميكانيكى برضه ياباشا فى ناس من بره بتعمل شغل للتوكيل لما توقف قدامه حاجه ولوعايز امثال اجيبلك

اقتباس:

---

المشاركة الأصلية كتبت بواسطة deshahcoka

بسم الله ما شاء الله :) يا غالي انتا غيرت المساعدين ؟ او اي حاجة في العفشة ؟ غير بيض الدركسوين و الميزان ؟ و على كام غيرت حجات في العفشة ؟ عشان انا عملت 100 و حاسس العربية ابتدت تفك مني مع اني مغير البيض و التيش الميزان و بربط عفشة !! و قواعد الموتور غيرت حاجة :)

ياريت تحكيلنا تفاصيل الصيانات يا باشا :) قصة حيات الصيانة :)

---

انا غيرت مساعدين امامى على 100 وتانى مره 200 ومعاها مساعيد خلفى وفى المرتين جلب وبيض واتياش ميزان وبارات على 200 قواعد الموتور تمام الحمد لله لسه مشيك عليهم

اقتباس:

---

المشاركة الأصلية كتبت بواسطة ah-elgendy

كنت عاوز اعرف منك معدل استهلاك البنزين ليها كام
واسعار قطع الغيار لو تقدر تفيدنى بالحاجات اللى فاكرها
وتيل الفرامل بيقعد كام كيلو

---

بص ياباشا معدل استهلاك البنزين ده على حسب سواقتك والطريق يعنى مثلا القاهره ازيد من طرق السفر وبرضه ترجع لسواقتك اما اسعار قطع الغيار يعنى مثلا مساعدين امامى 1000 وخلفى 900 وبيض 190 وجلب 150 وشدادات 300 وتيل 450 امامى وخلفى نفس السعر تقريبا طنابير لسه مغيرتش فلتر زيت 35 فلتر هواء 60 فلتر بنزين 150 بوجيهات 130 التيل بيقعد معايا من 30 الى 35

اقتباس:

---

المشاركة الأصلية كتبت بواسطة ias_98

ربنا يباركلك فيها كلامك خلانى افكر لا ابيع عربيتى لانى احس انها وحشه فى المطبات علما ان معى سيراتو 2011
جنوط 16 بس المشكله فى المطبات اللى مليا بلدنا زى ما انتو عارفين
فهل ترى الافضل اخليها للاولاد واشترى انا حاجه عاليه عن الارض بفكر فى نيسان قشقاى او اعلى شويه تويوتا فيرنتشر على حسب السيوله

---

بص خليها للاولاد احسن نا تبعها البيع عموما خساره وانا عن نفسى مبيعش الا بما احلل فلوسها يعنى من الاخر كده العربيه مش اقل من خمس سنين ويعد كده بيع علشان لما تخسر تحس انك مخسرتس لانك استعملت فتره كبيره تانى حاجه عن تجربتى لكيا سيورتاج مع احترامى للى معاه العربيه دى انا مركبهاش لو بسعر السيراتو اما عن القشقاى ومعلش انا اتكلمت عن السبورتاج رغم ان حضرتك مذكرتهاش لكن فى ناس ديما بطحطها قدام النيسان قشقاى نيسان قشقاى احلى من كيا وانا جربت الاتنين ولكن اذا اتكلمنا عن تويوتا فورشنر يختلف الكلام اكيدتويوتا تحياتى واسف لللاطاله

اقتباس:

---

المشاركة الأصلية كتبت بواسطة mouraddesk

برجاء الافاده عن تجربتك مع الجنط 17 و العفشة لحسن اخوك غير مساعدين و العفشة فككت خالص و العربية يا دوب عامله 50.000 و النبى التجربة بالتفصيل و ايه اللى يتغير الاول و ايه اللى يخلي العفشه حاكمه مش تحس بشخلله و الدركسيون يسمع فى ايدك مع المطبات

---

بالنسبه للجنط بيرجع للاستعمال اما اللى بيعمل شخلله ده يبقى بارات او بيض او اتياش على حسب الصوت بص الافضل لو عايز شرح كلمنى على الموبايل بعد اذن الادمن رقمى اهه علشان صباعى وجعنى من الكتابه 01008388892

اقتباس:

---

المشاركة الأصلية كتبت بواسطة j a g u a r

لو فى سيراتو مثلا نفس عربيتك الموديل وكل حاجه بس العداد عندك 214 والسيراتو التانيه 60 الف مثلا .. لو العربيتين اتباعو .. فرق السعر هايكون كام ؟؟؟ يعنى الفرق فى العداد بس .

---

على حسب كل حاله منا ممكن اشترى عربيه 60 الف ومتبهدله وممكن اشترى 214 وصاحبها بيغير لها الزيت العشره على 5 او 7 اما لو الحالات متشابهه فبتزل بس مش كتير واللى بيحكم التاجر انا مش عندى خلفيه صراحه عن الفرق واسف لو كنت مأفدتكش

اقتباس:

---

المشاركة الأصلية كتبت بواسطة tamer ragab

بالنسبة للزيوت فتيس وبور وفرامل بتغيرهم كل كام كم وايه الانواع اللى استعملتها

---

الزيوت موبيل وان بعد كدع امارات مصر حسيته انضف ده بالنسبه للموتور اما الباور غيرته ولف والفرامل ولف برضه
اما عن المده الموتور من 5 الى 7 الزيت ال 10 الاف نظرا لكثره سفرى اما الباور والفرامل على 100 الف كيلو اردو انى اكون افدتك

ما شاء الله
ربنا يبارك