الموضوع: تجربة بيع عربية مستعملة

العضو المحترم M.ABDEEN في قسم كيا كان عايز يبيع عربيته
و بيسأل يبيع إزاي
نت و لا ينزل السوق و لا يعلق ورقة على العربية
فقلت أنقله تجربتي فالبيع و الدروس اللي إتعلمتها

طبعا موضوع تعليق ورقة ده راحت عليه من زمان و بيستخدم في الغالب للأجرة و الميكروباص و ساعات للعربيات الأنتيكة
لكن بدل بتبيع ملاكي إبعد عنه خالص لأنك ممكن تاخد شهور عقبال متبيع
كده باقيلنا السوق و النت
السوق في الغالب مناسب للتجار اللي عايزين يصطاده واحد غلبان و يلبسوه عربيه تعبانة بعد ميعملوا عليه شغل النصب بتاعهم
مثلا و أنت واقف تتفرج على العربية تلاقي واحد تبع التاجر عامل فيها مشتري و جي يمدح فالعربية و يغلي السعر عليك و حاجات كتير من دي
و لو أنت اللي بتبيع تلاقيهم إتلموا عليك زي الدبان و خصوصا لو العربية حالتها نضيفة
و يقعدوا يفطسوا فيها لحد متتكون عندك قناعة داخلية إن آخرها الرقم اللي هما كلهم ماسكين عليه
و تبيع بالخسارة
و خلينا واقعيين مكسب التاجر هو خسارة ليك
يعني لو عرف ياخد منك العربية ب90 و باعها ب100
يبقى أنت خسرت 10 آلاف لأنك كان ممكن تبعها مباشرة بالسعر ده
فأبعد عن التجار
و ممكن تتخلص من التجار لو إشترطت التسجيل لأنه هيبيع العربية و مش مستعد يدفع رسوم تسجيل
إضافة لأن موضوع التسجيل دلوقتي بقى مهم (رغم إرتفاع الرسوم) عشان كارت البنزين
لأن لو فضلت العربية متسجلة بأسمك و جيت تشتري جديد مش هتعرف تطلعلها كارت
فخد بالك من النقطة دي كويس

نيجي بقى للنت
مميزاته لا تعد و لا تحصى

• هتقعد باشا فبيتك أو شغلك و الناس تيجي لحد عندك

• مش هتدفع فلوس لوسيط زي لو بيعت عن طريق معرض أو تاجر

• الإعلان على النت ببلاش

• تقدر تختار زبونك..يعني ببساطة لو لقيت حد لغته فالتليفون شمال و باين عليه مش و لا بد تقدر تعتذر له

• أنضف للعربية لأنها مش هتتبهدل من كل شوية واحد يركبها و يوسخ الدواسات و يقفل و يفتح في الأبواب زي مبيحصل فالسوق

• مريح جدا لأنك بتبيع على مهلك...يوم- أتنين -تلاتة -عشرة... براحتك بعكس السوق اللي هتبقى عايز تبيع و تخلص في يومها

تجربتي الشخصية في بيع عربية مستعملة
نوع العربية بيجو 206 موديل 2001 1100 سي سي
الأول مكنتش قادر أحدد سعر و بيني و بينكم أسعار مواقع النت خادعة فمتقدرش تاخد منها رقم عادل لسعر عربيتك
لأن ساعات ناس عربيتها تعبانة جدا و بتطلب أرقام مبالغ فيها و ساعات العكس بسبب ضعف الخبرة أو الإستعجال في البيع
طب ايه الحل؟؟؟
موضوع تسعير السيارات في نايل موتورز
بسم الله ما شاء الله فعلا ربنا يباركله خبير التسعير الأستاذ شريف وهبة
http://www.nilemotors.net/Nile/329130-a.html
بيديلك سعر عادل جدا للسيارة طالما إنك نقلت له الحالة بكل أمانة
لكن لو أنت مكنتش دقيق طبيعي التسعير كمان مش هيبقى دقيق

سألت الأستاذ شريف و خدت منه الرد و سعرت العربية ببلاش
بعدها أجلت البيع شوية عشان تسليم عربيتي الجديدة إتأخر
في الفترة دي ألاقي أي صنايعي أروحله بالعربية و يعرف إني هبيع يديلي سعر أقل 5 آلاف على الأقل من تسعيير أستاذ شريف ده غير أصحاب المعارض و التوكيلات نفس الحكاية كلهم عايزين يفطسوا السعر
لحد مبدأت أحبط و أقول فعلا العربية مش هتجيب أكتر من كده
بعدها بفترة توكلت على الله و نزلت إعلان العربية على النت
contact-dubizzle-هتلاقي-4sedan
و قولت أجرب إتباعت كان بها
متبعتش أبقى أديها لأي صنايعي أو معرض من اللي عديت عليهم
نصيحة أحسنهم في العرض و النظام كونتاكت
و أكثرهم إنتشارا و جالي بسببه إتصالات كتير dubizzle
أهم حاجة إعلانك يبقى فيه صور للعربية
خدت العربية و نضفها تنضيفة حلوة فكار كير و لمعت الطابلوه و نضفت الصالون و الشنطة و بعدها صورت العروسة كام صورة من جوة و بره و حطيت صورها مع الإعلان عشان عريسها يجيلها لحد عندها

الإعلان خليه دسم
يعني فيه كل فتفوتة عن العربية
متستهونش بتفصيلة زي التحكم في إرتفاع كرسي السائق لأن ساعات في بنات قصيرين شوية و بيدوروا على عربية فيها الأبشن ده
و برضه خليك دغري و أمين
يعني قول العربية حالتها عاملة إزاي و رشة ايه بالضبط لو رشه
و أكتب يشترط التسجيل عشان تبعد التجار
بعدها و الله معارف أنام من كتر الإتصالات رغم إني أعلنت عنها أكتر ب6 آلاف من سعر التجار و المعارض و الصنايعية
نصيحة كمان زود ألف أو أتنين عشان الفصال لأن المشتري المصري هيحس إنه إضحك عليه لو مفاصلش
و بدأ الناس تيجي منهم اللي فاهم و منهم اللي على نياته

أنا عن نفسي رفضت تجربة العربية مع أي حد (حال البلد ميطمنش)
و قلتله أكشف فالمكان اللي يريحك أنا مفيش حاجة أخبيها....كل اللي فالعربية قلتهولك
و بالفعل اللي إشتراها مني مكشفش عليها و لا حتى جاب ميكانيكي و خد كلامي ثقة

و أهم حاجة خلي كلام النبي صلى الله عليه و سلم قدامك

روى البخاري ومسلم عن حكيم بن حزام رضي الله عنه، عن النبي صلى الله عليه وسلم قال: البيعان بالخيار ما لم يتفرقا، فإن صدقا وبينا بورك لهما في بيعهما، وإن كذبا وكتما محقت بركة بيعهما.


تقبوا تحياتي

تسلم يا باشا ع الموضوع ده

المشاركة الأصلية كتبت بواسطة lidosasa

جزاك الله خيراً على نقل التجربة المفيدة

و جزاكم مثله
بجد دعوة جميلة بتريح القلب

المشاركة الأصلية كتبت بواسطة ah-elgendy

تسلم يا باشا ع الموضوع ده

الله يسلمك
لو كنت قلت زي lidosasa كنت قلتلك و جزاكم مثله.......
بس مش خسارة فيك الدعوة
جزاكم الله خيرا

المشاركة الأصلية كتبت بواسطة @ahmed@

الله ينور عليك بجد موضوع رائع جدااا

بس دة للى هيبيع

بس بالنسبة للناس الى عايزة تشترى مستعمل بقى من ع النت برضو ولا ايه رايك ..؟

اه برضه من على النت
بس الصبر الصبر الصبر
و متستعجلش و أكشف على العربية فالتوكيل أو مركز خدمة محترم
العربيات الكويسة بتتخطف بسرعة
و أهم سؤال تسأله..العربية باسمك و لا لأ (صاحب العربية أو زوجته ماشي)
عشان لو معاه توكيل يبقى تاجر و بيبعلك عربية هو وقعها من على النت و هيبقى السعر في من 5-15 ألف زيادة على حسب الفئة السعرية للعربية و في معظم الأحيان مش هيكون أمين و مش هيقولك على عيوب العربية
ده غير إن التجار يعرفوا صنايعية عفاريت بيرجعوا العربية و لا الفابريكة

أحسن حد تشتري منه هو واحد تعرفه و عارف سواقته للعربية و تاريخ العربية فتفوتة فتفوتة
بس ده طبعا مش موجود كتير
تاني حاجة المعارض اللي سمعتها كويسة بس السعر هيبقى أغلى من سعر العربية من 5-15 على حسب الفئة السعرية (خد بالك رسوم التسجيل زادت بغباء فلو أنت إشتريت المستعمل كسر الزيرو غالي أصلا هتبقى كأنك بتشتري زيرو)
تالت حاجة النت و الجرايد : ده ميزته إنك بتشتري من المالك على طول و السعر بيبقى كويس لكن أهم حاجة الكشف فالتوكيل
رابع حاجة سوق السيارات و ده أسوأ إختيار
تقبل تحياتي

المشاركة الأصلية كتبت بواسطة EmadFox

هو ده السؤال؟

شوف دول
http://www.nilemotors.net/Nile/390203-2.html

http://www.nilemotors.net/Nile/402847-a.html (تجربة بيع عربية مستعملة)

تحياتي