بسم الله الرحمن الرحيم
الأخوه الأفاضل اصدقاء نايل موتورز
الحمد لله و بفضل الله سبحانه و تعالى قمت بشراء جيلى اميجراند شامبين فاميه شاسيه 10320
سبحان الله من اكتر من 3 شهور و انا مقتنع تماما بالعربيه و مستعد نفسيا للمشاكل المعروفه
ولكن بعد موضوع الصدا المشهور قفلت من العربيه و غيرت رأى خالص و قولت ادفع تمنها و اجيب اى حاجه قسط معقوله و بالفعل رحت حجزت بروتون بيرسونا اوتو و لكن يشاء السميع العليم ان الموضوع يقف من البنك بعد ما كنت رايح استلم البيرسونا
و انا راجع من البنك شفت ايمجراند شامبين فاميه بصراحه اللون ده روعه زغللت عينى تانى و فكرت فى خمس دقائق يعنى كل مبيعات الجيلى فى الشارع مش معقوله عربيه بالأنتشار ده و تكون وحشه زى ما قريت على النت و شفت كمان مع واحد صاحبى مشاكل كتير بس فى الدفعه الأولى

المهم قررت انى فعلا اجيب العربيه بعد ما شاورت الحكومه عندى و اتكلت على الله و رحت راكب تاكسى لغايه سمير ريان
قابلت مندوب البيع و قالى السعر 84250 للفاميه سيبته و مشيت رحت للحاج سمير صاحب المعرض
كام يا حاج سمير دى كده العربيه رقم 6 من عندك يا حاج طبعا الحاج سمير فاكرنى كويس و قالى خلاص علشانك ب 82500 و السعر ده لايمكن تلاقيه بره و فعلا دفعت الفلوس و رحت المخزن نقيت العربيه و الحمد لله العربيه راكنه تحت البيت فى انتظار الترخيص يوم الأحد ان شاء الله

طبعا و انا بستلم العربيه فحصتها كويس الحمد لله البطاريه جافه و الكاوتش لاسا
العربيه رائعه بمنى الكلمه غير ما كنت متوقع العفشه حلوه اووى و ماسكه نفسها بالرغم انى لسه مظبطتش الكاوتش و التكييف شغلته 5 دقائق بصراحه ادائه كويس اووى

اسف انى طولت عليكم بس حبيت اشاركم فرحتى بالعربيه
ولو فيه اى نصحيه منكم ليا اكون شاكر ليكم

و ربنا يبارك فيها و يكفيها شر العين