انتبه حينما تقدم على شراء خط محمول

**Dream286** · 26-09-2008 03:28 PM

السلام عليكم ورحمة الله وبركاته

حبيت اطرح الموضوع دا للأهمية وللتنبيه من اخطاره اللي انا بلاحظها بحكم عملي في موبينيل

دلوقتي في الايام الحالية لما تنزل تشتري خط ممكن يحصل الاتي:
المشتري : عايز خط محمول
البايع : اتفضل اهو والخط بعشرة جنيه وعليه رصيد
المشتري : طيب وفين العقد ؟
البائع : عقد ايه يا بيه مفيش حد بيطلع عقود دلوقتي
المشتري : ليه ؟ وازاي يكون بإسمي
البائع : دلوقتي كله من غير عقود وانت معاك العلبة وممكن تروح التوكيل تسجله هناك
أو ممكن تلاقيه يديلك ورقة فاضية يقولك دا العقد املاه انت مع نفسك !

دا تقريبا السيناريو اللي بيحصل في كتير اوي من المحلات

انا عايز اقول خللللييي بااااالك من المحلات اللي بتعمل كدة

ولازم تعرف حاجة مهمة جدا ان مفيش خط محمول في اي شركة محمول في مصر ملهوش عقد حتى لو انت ما اخدتش العقد دا بس هو اتعمل له بالفعل عقد
ازاي بقه

الوكيل او الموزع المعتمد بيوزع على المحلات الصغيرة خطوط محمول من الشركة اللي بيتعامل معاها وهو اصلا بيكون عامل عقود للخطوط دي ومشغلها عشان يقول للشركة اللي بيتعامل معاها انا بعت خطوط كتير عايز تعويض ( زي المكافئة يعني )

وفعلا بيجيب اي صور بطايق ويعمل بيها عقود للخطوط دي
وانت بعد كدة بتروح تشتري الخط ويقولك من غير عقد
لا هو بعقد فعلا وليه بيانات بس بإسم واحد تاني غيرك طبعا
حتى لو جربت تتصل بخدمة العملاء هتلاقي فعلا الخط ليه بياانات
طيب انت هتقول هتفرق ايه معايا ما كدة كدة الخط شغال وبيعمل مكالمات والخط كله بعشرة جنيه مش قصة يعني على رأي كتير اوي من العملا
لا الموضوع ليه اضرار كتيرة
انت كدة مش المالك الرسمي للخط بمعنى ملكش اي حق فيه يعني لو ضاعت شريحتك مثلا او اتسرقت مش حتقدر تروح التوكيل تقولهم عايز شريحة بالرقم دا
هيقولوا ليك لا الخط دا مش بتاعك ولازم تدور على العلبة وكل ما يثبت ان الخط بتاعك ويعملوا ليك استجواب عن المكالمات وبيانات الخط بتاعك عشان يسلموك الشريحة وممكن يكون الرقم مهم اوي بالنسبالك لان شغلك كله معتمد عليه
خدمة العملاء في المركز الرئيسي لو اتصلت بيهم حاجات كتيرة مش هيقدروا يفيدوك بيها مثلا لو حابب تشغل تجوال على الخط او توقفه او تستعلم عن اي حاجة مش هيقدروا يساعدوك
دي الاضرار اللي نوعا ما خفيفة
الاشد بقه
ممكن اللي معمول بإسمه الخط دا واحد مسجل خطر ولا واحد عليا قضايا ومصايب وساعتها بقه انت عارف اللي فيها
ممكن للاسف الشديد المحل تديله صورة بطاقتك يستعملها في الف خط تاني وواحد من الخطوط التانية دي يكون صاحبها عمل مصيبة ولا جريمة وساعتها بجد هتدوخ عشان تثبت ان الخط دا مش بتاعك
ودي فعلا مشكلة وأزمة كبيرة انك حتى خايف تدي المحل صورة بطاقتك عشان كدة لما تشتري خط تأكد انك تشتريه من مكان امين او محل تعرفه كويس او تشتريه من التوكيل الرئيسي للشركة وتتأكد ان معاك عقد سليم تماما
طيب ازاي تعرف ان العقد سليم لما تشتريه
لو من التوكيل اكيد ان شاء الله سليم
لو من اي موزع بره تتأكد ان العقد معمول من اصل وعدة نسخ
وان البيانات بتتكتب على الاصل وبتتطبع على النسخ
وان استيكر الخط اللي مكتوب عليه الرقم والسريال ملزوق على النسخة البيضا والنسخ التانية اللي فيها بياناتك وهما المفروض تلات نسخ بتلات استيكرات

طيب دا بالنسبة للي حيشتري خط جديد
واللي اشترى بقه بالشكل دا يعمل ايه
اول حاجة يعملهابجد انه يروح اقرب توكيل ليه ومعاه كل حاجة عن الخط لو امكن عني العلبة والشريحة ويطلب تعديل البيانات بإسمه وممكن الخط يتوقف 48 ساعة بس مش مهم لكن الاهم انك تظبط بيانات خطك
ولو عايز تتأكد ممكن تكلم خدمة العملاء عشان تعرف اذا كان الخط بإسمك فعلا ولا لا

ارقام حدمة العملاء
فودافون : 888 وتقريبا بتدوس على رقم 0 صفر عشان يحولك للموظف المختص
موبينيل : 110
اتصالات : 333

بجد يا جماعة والله الموضوع دا خطير جدا انا بجد شفت ناس تعبت اوي وعانت فعلا بسبب الموضوع دا
وسبحان الله اللي يغيظني ان العميل نفسه اللي بيتعب من الموضوع دا لما يشتري خط جديد برضو مش بيهتم يقولك ما كله بعشرة جنيه !!!
يا اخي سبحان الله !!
وللعلم بالشئ انت ممكن لو عايز تعمل محضر ضد اي محل بيعمل الحركة دي وفعلا في بعض المحلات في الهرم قفلت بسبب كدة

لو في استفسار انا تحت امركم

تحياتي للجميع

**سمير يونس** · 26-09-2008 03:41 PM

جزاك الله كل خير على هذه النصائح القيمة

تقبل تحياتي

**WalidAdel** · 26-09-2008 05:15 PM

شكرا ياباشا علي النصايح دي

**Noha.M** · 26-09-2008 05:20 PM

حصلت معايا فعلا كان معايا خط فودافون بيزنيس و كان نمرته مميزة جداااااااااا و كان كل اللى يسمع النمرة يقولي ايه دة جبتيها منين دى و كنت كتبت عقد عنده موزع و ادالى ورقة كدة املاها و خلاص اللى حصل بعد كام شهر ان الشريحة اتحرقت و باظت وحدها و كنت عاوز اروح اجددها المهم رحت فودافون اللى جنب الفا ماركت المعادى و اديتهم الرقم و لقيتهم بيقولولي دة مش مكتوب باسمك !!!!!!!!1 طيب ازاى الكلام دة ! منعرفش بس الخط مش مكتوب بأسم حد قلتلته طيب انا ايه ذنبي دلوقتى ان الموزع نصاب دة الخط بتاعى و انت تقدر تشوف كل الارقام اللى انا متصلة بيها و انا ممكن اقولك على كل الارقام دى اللى انا اتصلت بيها .. طبعا موافقوش كالعادة و الخط راح عليا للاسف :(

جزاك الله كل خير على المعلومات :)

**noway** · 26-09-2008 06:08 PM

شكرا علي التوضيح و النصيحه

**mokhtar** · 26-09-2008 07:20 PM

حصل معايا كنت شارى خط فودافون من حوالى سنه وماتعملوش عقد ومن حوالى شهر الشريحه اتحرقت اخدت العلبه ورحت التوكيل عندنا فى دمياط وانا اصلا عارف ان الخط مش باسمى بس قولت بالعلبه هيطلعولى شريحه جديده لقيته بيقولى عايز 5 ارقام مكالمات ورقمين تحويل رصيد وانا ماكنتش فى الفتره كنت بشحن كروت مش بحول رصيد المهم من هنا لهنا قاللى لازم رقم تحويل رصيد ان شاالله رقم واحد اعدت اعصر دماغى وافتكر مش لاقى وفى الاخر افتكرت ان اخويا كان محولى قبلها بشهر اديته الرقم وطلعت الشريحه ب5 جنيه بس بعد مادخت السبع دوخات

..mokhtar..