الموضوع: لو العربيه زرجنت ومش بتدور مع ان كل حاجه تمام تعمل ايه

اولا السلام عليكم ورحمة الله
ثانيا انا متابع من سنه كامله وكنت مكسل اشترك معاكم واهو انا بستفيد وخلاص من غير وجع دماغ
بس لقيت الناس هنا زوق ومتعاونين فحبيت اشارككم باى حاجه

المشاركه البسيطه انى فجأه كده حبيت ادور العربيه بعد مركنتها وهى تمام التمام من يوم مشتريتها من سنتين مزعلتنيش خاااااالص فجأه المارش يدور على الاخر والعربيه مبتدورش رغم البطاريه لسه جديده والمارش جديد المهم خمساشر واحد زقونى ومفيش فايده وكمان عربيه شدتنى وطلعت على التانى ومفيش فايده ، قلت دى عين من واحد راكب النترا 2013 أكيد
المهم ومنعا للاطاله سحبتها جثه هامده لحد الدكتور الميكانيكى ودخلت الانعاش وخرج مكفهر الوجه وقالى للاسف هات 20 جنيه ، طبعا زهلت 20 جنيه ليييييييييييه
قالى الابلاتين ضارب
غيرت الابلاتين وانطلقت ال131 كالخفاش بالنهار تكاد تلتصق بكل مايقابها لولا ستر الله
ودى نهاية الحدوته الملتوته فلو حصل معاك عليك والابلاتين.
والسلام مسك الختام.