الموضوع: الدايو الي عامله عقده لملاك الصيني

المشاركة الأصلية كتبت بواسطة sameh_fouad

ماتيجى نتكلم شوية بالمنطق:

لما تتكلموا على اللانوس يبقى تتكلموا على شيفرولية لانوس اللى هية اصلا مالهالش اى علاقة بدايو لانوس , لان مستواها قل جدااااااااا عن الدايو لانوس الكورى اللى عودتنا انها كويسة وحمالة اسية بالنسبة لسعرها

نيجى للكورى

1- النوبيرا 2 :

كلنا عارفين ان النوبيرا 2 محدش بيشتريها غير مانيوال لان الاتوماتيك ضايع , انا صاحبى اشتراها زيرو الاتوماتيك بتاعها بعد اول 3 شهور والتوكيل رفض يصلحة قالة عيب استخدام والكلام دة كان سنة 2008
دة غير مشاكل العفشة اللى كل الناس بتغيرها وخصوصا جلب المقصات اللى بتبوظ بسرعة والناس كلها بتسبدلها بجلب اسبانى تقريبا
- مشاكل دورة التبريد العربية بتاكل مياة بدون وجود تسريب لية محدش عارف ( ودة استخدام واحد صاحبى وبردة كان جايبها زيرو مانيوال ) وباعها بعد 6 شهور فقط

- العفشة ناشفة - العزل كويس الى حد ما - صوت الماتور عالى وخصوصا صوت الشكمان الغريب بتاعها دة اللى مهما تعمل فية تحس ان المصفاة اللى جوة مبوشة

مميزاتها : الصراحة العربية ماتورها كويس فى السحب وجراية وكمان ثباتها كويس جدااااااا

2- الفيرنا :

معلش العربية دية بالنسبالى مافيش فيها اى حاجة غير انها بتجرى كويس - وعفشتها كويسة , وطول مانت بتعاملها بحنية هتشعيش معاك كويس جداا , لكن قسيت عليها هتفتح بقها - وتكييفها كويس جدااا
لكن بقى ولا ثبات ولا فرامل ولا وسع ولا تكنولوجيا

الصينى :

1- a516 : واسعة - شكل تابلوة - عالية - ناعمة - عزل مش وحش - تكييف يضرب اى كورى بكل جدارة

عيوبها : مش اعتمادية - مشاكل فى التقفيل - عفشة بتروح بسرعة واللى بيغيرها مش بيغيرها بنفس النوع لأ بيجيب عفشة التويوتا - ماتورها عادى جداااااا , يعنى اى عربية 1300 ياباتى تروقها مستريح - لكن الكورى محتاج عربية زى النوبيرا عشان تعرف تظبطها لكن اللانوس معلش مش هتعرف تسد

2- byd f3

الصراحة العربية دية محترمة جداا . شكلا وموضوعا واشد من الفيرنا واللانوس بكل موديلاتها عيبها الاتى

عفشة ناشفة شوية - ثبات مش قوى اخرك بيها 130 كم - مش واسعة زى ال a516 مثلا

m11 :

العربية دية شكل - واداء , لكن ثبات مش حلو - مش اعتمادية تماما - عفشة ناشفة - كنبة ضيقة جداااااااااااااا

من الاخر سواء كورى او صينى , كل واحد ولية عيوبة

بس مش كل الشركات الصينى وحشة - ومش كل الشركات الكورى حلوة


على فكرة محدش يقول كورى اعتمادى عشان الفيرنا كلها عطلانة على الطريق وكل شوية صيانات ومواتير مرزعة وحساسات بايظة وسخونية

وتفس الكلام لل a516

لكن اللى فعلا بشوفها بتتفوق عليهم ال byd f3 اقل مشاكل اقل اعطال منهم

وللحديث بقية

يحياتي لحضرتك واحب اقول ان ال m11 ثباتها كويس جدا جدا مع السرعات العاليه وده بشهادة كل ملاك العربيه ومنهم انا

المشاركة الأصلية كتبت بواسطة eshoo

يحياتي لحضرتك واحب اقول ان ال m11 ثباتها كويس جدا جدا مع السرعات العاليه وده بشهادة كل ملاك العربيه ومنهم انا

الثبات ترجمته القدرة على المناورة وليس هدوء المقود فى يدك وعدم اهتزازة

اسف
مع السرعات العاليه اثناء المناوره