خذوا النقطة من افواه الاعلانات

**OlaOsman** · 27-09-2008 09:02 AM

اولا كمية الحملات القومية اللي بتعلم الناس الوطيان في الشهر الفضيل ده غير طبيعية
اعلانات عشان تعلم الناس التوفير تقوم تعلمهم النتانة وكل اخلاق الرجالة اللي زوجاتهم بيتريقوا عليهم زي الراجل اللي بيزعق: النور...النور يا كفرة...بطلوا تفتحوا باب التلاجة كتير....هو انا بالاقي الفلوس في الشارع؟
طيب زمان ايام البركة كان فيه ناس فعلا لما بتستنتن على اهل بيتها بتعرف توفر، لكن حد يقول لي البني ادم وفر مهما وفر ح يكفي ايه وللا ايه في الغلا ده؟ يعني في الغلا احنا كمان اللي طلعنا غلطانين ومبذرين

اعلانات بتعلم الناس ان الادب والاخلاق يبقى مع السياح بس، عشان السياح بيشخطوا فينا كلنا في اخر الاعلانات، لكن طبعا التحرش والغش مع المصريين مافيهوش حاجة لانه ما بيخسرش فلوس
يعني مش بس عقدة خواجة، لا وعقدة خواجة نتنة كمان، بما ان السياح بيدفعوا يبقى لازم تحترمهم الخواجة بيدفع بالدولار، المصري بيدفع بالجنيه المعفن يبقى ياخد بالجزمة مافيهاش حاجة يعني، والراجل يقول لمراته زعلانة على عيني تقول له انا صعبان عليا العربية! ماشاء الله ده ايه الحنان الاسري ده؟

اعلانات طبعا في عز انهيارات الصخور بتقول لك: من حقك يبقى بيتك اوسع....من حقك يبقى عندك حمام سباحة....احمد حبيبي وجايب ضيوف معاك، واحمد حبيبي هو وامه شعرهم اصفر وعينيهم زرقا، بقى الولية دي مخلفة احمد؟ امال انا اخلف ايه؟ ظرمبيح؟

واعلان فيه بمب العيد، وانا باكره بمب العيد
زمان وانا في اولى ابتدائي كان فيه اعلانات اسمها: لحظة من فضلك، كانت بتعلم الناس ما ترميش الزبالة في الشارع وتدي شوية تعليمات "دي زبالة يا جاهل" حاجات كده زي الست سنية سايبة المية ترخ ترخ من الحنفية، ما كانوش بيقولوا ان الاخلاق واحترام الناس في الشارع وعدم غش الزباين مقصور على الاجانب عشان بيدفعوا فلوس: مش بس انت اللي ح تخسر احنا كمان ح نخسر
ما تخسر يا سيدي، ما تخسروا كلكوا الناس بتخسر ارواحها في العبارات والقطارات وتحت الصخور
i cannot walk freely in this country anymore
في ستين داهية يا أبلة...غوري من هنا وشوفي لك كانتري تانية تكون محترمة عشان احنا ناس مهزئين لما نسمح لواحدة زيك تزعق لشعب بحاله في التلفزيون وتلاقيكي في بلدكوا بتشتغل الله أعلم ايه....وللا هي الخواجاية عندها كرامة واحنا اللي ما عندناش
ده غير بقى الضرايب تقليبك اولا لا وببجاحة يقولوا لنا اخدنا ضرايبكوا بنينا بيها انفاق وكباري
يعني لما كنا بنقول حكومة الكباري ما كناش بنتريق بقى، هم نفسهم واخدين استراتيجية الكباري في كل سياساتهم
واحنا اكبر كوبري في البلد.
-----------------------------------------------
منقول من مدونة جبهة التهييس الشعبية لنوراة نجم.. طبعا بتصرف.

**tutankhamoun** · 27-09-2008 09:22 AM

السلام عليكم و رحمة الله و بركاته

هو حضرتك زعلانة ليه يا أستاذة علا ؟؟؟؟

لكل مقام مقام

إعلانات المباني الفاخرة لها زبونها

إعلانات السياح أنا شايف أنها صحيحة 100 % و لو أني ما شفتش غير اعلان واحد

بس أنا بشوف مصايب من التجار اللي بيشتغلوا مع السياح و بسببهم بيتقال علينا كلام خارج مصر فظيع ........ و إن أحنا شعب حرامي و هكذا

بالنسبة للشعب المصري في الإجمال
أحنا شعب غريب جدا .........
أغلب أفراد الشعب كاره لكلمة نظام ...... لا يحب إطلاقا ..... أنه من ألد أعداء الشعب

الأهم أن الأخلاق أنخفضت بنسبة كبيرة جدا نظرا للظروف الإقتصادية الصعبة التي يمر بها أغلب افراد الشعب و التي بالتأكيد تؤثر على بقية الرعية
و طبعا كل مشاكلنا ........ مشاكل مشتركة ما بين الشعب الكاره للنظام و التعليمات ...... و الحكومة من جانب أخر

على فكرة دخل السياحة في مصر لا يمكن الإستغناء عنه بسهولة
لأن السياحة جزء كبير من الدخل القومي المصري و المحافظة على السائح ( الضيف الأجنبي ) هو شئ مهم جدا للإقتصاد

على فكرة ......... في أي بلد محترم .......... لو حضرتك زائرة لها و أتعرضتي لأي مشكلة ........ القانون هناك بيجبلك حقك تالت و متلت

أحنا بس اللي حساسين زيادة عن اللزوم بخصوص البلد و أحوالها الزفت و شعبها اللي عايز جاز يتكب عليه و نخلص كلنا

و كل سنة و أنت طيبة بمناسبة العيد
و عيد سعيد

**OlaOsman** · 27-09-2008 09:41 AM

لأ هو "حضرتك" مش انا اللي معترضة يا "أستاذ" توت.. دي نوارة هي اللي زعلانة.. الموضوع منقول زي ما هو مكتوب في آخره :)

انا اللي فعلا لافت نظري في الإعلانات التوعوية الأخيرة وخصوصا إعلانات الضرايب هو انهم بيجيبوا لنفسهم الكلام.. يعني لما يقول لي ان الطريق ده اتعمل بفلوسي.. و الكوبري ده أنشئ بفلوسي.. و الرصيف ده اترصف بفلوسي، ده معناه ان الحفرة اللي عربيتي وقعت فيها من كام يوم و بوظت لي العفشة دي تصليحها بفلوسي اللي انا دافعاها.. و فواصل الكوبري الفلاني اللي بهدل لي العربية تصليحه برضه بفلوسي.. و الحفرة اللي وقعت فيها قريب و رجلي اتكسرت المفروض تتردم برضه بفلوسي.. طيب بتودوا فلوسي فييييييييين؟ :cuss:

الإعلان ده يكون مؤثر فعلا لو كل الخدمات العامة في البلد على أكمل ما يكون.. انما ع الوضع ده يبقى ما يتقالش غير هاتوا فلوسي ياولاد النااااااااااااس :cuss:

لي عودة بخصوص إعلانات السياحة بإذن الله.

**Ramy_Ali** · 27-09-2008 01:52 PM

احلى اعلان عجبنى واكيد كل الناس للى فى الدويقة والمناطق الشعبية هيعجبهم بردة
يطلع احد الاثرياء بالسيجار ةحولة مساحة خضراء مهولة لا ترى غير اللون الاخضر ولون السماء اللبنى وماسك فى ايدة مضرب جولف ويضحك ويقولك

انا بحب الصيف عشان الاقى حد العب معاه جولف

هاهاها

يعنى الصيف ومشاكلة كلها تنحصر فى الجولف ولعب الجولف

**OlaOsman** · 27-09-2008 02:50 PM

عودة بأه لإعلانات السياحة.. أكثر ما استفذني هو الإعلان بتاع سواق الأتوبيس اللي بيعاكس السائحة و بتحصل له حادثة و هي بتنزل متنرفزة من الأتوبيس تلعن اليوم اللي عتبت فيه مصر.. اللي استفذني هو ان الحكومة عمرها ما عملت أي إعلان توعوي عن المعاكسة و التحرشات اللي بتتعرض لها المصريات من ولاد بلدها.. انما لما الموضوع ييجي على السائحة و هنضايقها بمعاكساتنا، يبقى لأ هنا لا بد من وقفة و نعمل إعلان نوعي فيه الناس انهم ما يعاكسوش السائاحات عشان ما يغضبوش علينا.. انما المصريات فعادي يتعمل إعلان توعوي ليه مخصوص عشان المصريات بيتعاكسوا و لا بيتبهدلوا؟ دول مصريات.

**Ramy_Ali** · 27-09-2008 03:00 PM

وبردة عشان دى هتخسرهم فلوس بينما المصريات مش هتخسر معاهم

اللى مستفزنى قوى قوى من السياح دول فعلا
لما دخلت احد الفنادق فى نهار رمضان وفى بهو فى الفندق وجدت مجموعة على بار والنادل يملاء لهم الخمور من كافة الاشكال والاوان والنساء مش عاوز اقول لابسين ايه يمكن مفيش الا حاجات بسيطة والقبلات بتتوزع متعرفش مين بيبوس فى مين
والنادل والجارسونة واقفين زى ********* بيخدموا عليهم
فعلا قلبى انكسر اوى
هوا احنا بنعمل ليه في نفسنا كدا
وايه الفلوس دى يعنى اللى بتيجى من الحلام وانتهاك حرمة الشهر الكريم علانا بيانا

والفلوس دى مش تعتبر حرام

الرسول صلى الله عليه وسلم يقول عن الخمر (لعن الله شاربها وبائعها وحاملها)

يعنى اللى اشتراها فى الاصل مصرى
اللى باعها للسائح مصرى
اللى حملها مصرى
اللى اخذ فلوسها مصرى
وهيصرفها على اولادة

ناهيك عن ما يحدث داخل غرفات الفندق

مش الاولى بنا ان نطهر قرشنا عشان ربنا يبارك لينا فيه

وبنستخسر فى اهل الدويقة انهم يسكونوا فى مساكن اصلا لا يقبل اى مسؤل فى المكوث بها ليلة واحده
ومش عاجبهم عاوزين يسكنوا كل 3 اسر فى شقة

مش فاهم البلد بتروح فين

**Noha.M** · 27-09-2008 03:11 PM

انا مع استاذ توت فى معظم الكلام بس انا اختلف معاك فى نقطة و هي ان اسلوب الاعلان نفسه مش كويس .. ليه لازم بقينا احنا كمان المصريين بنشوه سمعتنا بايدينا .. فى الف طريقة و طريقة لتنفيذ اى اعلان مش السياحة و بس لكن ليه بقو اسهل حاجة عندهم اهانة السعب المصري و ظهوره على الشاشات كانه حرامى و نصاب و فهلوى .. و ليه الست الاجنبية دى فعلا المستفزة تنزل من الاوتوبيس و تزعق في وشنا و تقولنا دة محصليش قبل كدة فى اى دولة ولا التانية اللى بتقول انا مبقتش عارفة امشي بحريتي فى البلد دة خلاص و نبرة صوتها و زعيقها بجد يستفز اى حد ..

ليه بقت المادة اعلانية نفسها سلبية ! انت بتشجع السياحة بانك تظهر سلبيات اهل البلد ؟ ولا تظهر الايجابيات و الاماكن السياحية اللى فى مصر .. ولا دى وصلة تربية من الحكومة على الماشي عشان نتربي مع اسيادنا الاجانب !! بجد انا مش فاهمة ..

مظنش اى دولة ممكن تنفذ اعلان يشجع السياحة بالطريقة ولا تطلع اهل بلدها بالصورة السيئة دى غير مصر ...

**Nile_Storm** · 27-09-2008 03:24 PM

صحيح معاكو حق
انا بتنرفز من طريقه العرض

في الاول كان اول اعلان معقول بتاع النيل الواد الياباني ده كان مؤدب و كده و بيقول مينفعش نلوث النيل "ال يعني احنا مش عارفين او الظاهر يسرا كانت مشغوله فجابوه مكانها يقول الكلمتين دول :) "

بس برضه مكنش وحش

انما بأه ندخل في حبه ستات تزعقلنا و تشتمنا
كان لسه امي بتقول امبارح لو واحد اجنبي فتح التليفزيون لاقانا بنقول كده علي نفسنا و في التليفزيون الحكومي هيقول علينا ايه

**Ramy_Ali** · 27-09-2008 03:27 PM

السنة دى الاعلانات بقت مقززة فعلا

1- اعلانات برتو وشاليهات وفيلات وقصور
2- اعلانات ضرائب (اعلان وحيد)
3- اعلانات السياحة
4- اعلانات الموبايلات ودولة شمبونجو
5- اعلانات التوفير فى المياه والكهرباء والاكل
عشان الناس اللى فى اعلانات رقم 1 يعرفوا يلموا من رقم 2و3 و4و5 وميصرفوش علينا

**Ramy_Ali** · 27-09-2008 03:31 PM

المشاركة الأصلية كتبت بواسطة Nile_Storm

انما بأه ندخل في حبه ستات تزعقلنا و تشتمنا

الرجالةمتنرفزين عشان المفروض محدش يقدر يزعقلهم غير مراتاتهم فقط

والستات متنرفزة عشان الست فى الاعلان خددت حق من حقوقها

هاهاهاها

لا بجد

الاعلان يوحيلك ان الفلوس اهم عند الحكومة من المواطنين
انشالا تتطلع شوية ستات تزعق فى الناس