خذوا النقطة من افواه الاعلانات

**Noha.M** · 28-09-2008 12:24 AM

المشاركة الأصلية كتبت بواسطة amir

للاسف و لأول مره
اختلف معاك يا توت باشا في النقطه اللي انا مقتبسها دي
للاسف الشديد سياحه الدعاره موجوده و متواجده من فتره ليست قصيره في مصر
و تنقسم لشقين
الشق الاول:
و هو اللي ممكن نتجاوز فيه عن كلمه دعاره
و ده بيحصل في الاقاليم و الارياف اللي فيها محامين مختصين بالموضوع ده
و اللي بيحصل بالظبط ان البيه العربي بيتجوز بنت مصريه فقيره غالبا لا يتجاوز عمرها 20 عاما و بمقابل مادي كبير بالنسبه لاهل الفتاه اللي الفقر و الحاجه بتخليهم يبيعو بناتهم, و طبعا الجوازات دي ممكن تستمر فتره الي ان يزهق منها و يسيبها هنا في مصر علي ذمته و يبقي يرجعلها تاني في الاجازات او يطلقها و في كلتا الحالتين معظم البنات دول بيتجهو بعد كده لاحتراف الدعاره للصرف علي انفسهن و اطفالهن ان وجدو

الشق الثاني:
سياحه الدعاره ذات نفسها و دي بقي موجوده في الفنادق و الديسكوهات و النايت كلوبس, و مش بس كده ده السواقين بتوع التاكسيات العاديين حتي بيبقو دليل تليفونات للعاهرات و بيعرفو السائح و بالذات العربي عليهم بمقابل مادي, ده غير سماسره الشقق اللي بجوار الفنادق و غيرهم و غيرهم لدرجه مثيره للاشمئزاز

و بعد كل ده و انت مستغرب و مستنكر للنوع ده من السياحه في مصر؟!!!!

لا حول و لا قوة الا بالله

انا حاسة انى مش عايشة فى البلد دى

**Abo_Lina** · 27-09-2008 07:06 PM

بصرف النظر عن الاعلانات و مدى سذاجتها
مافيش اعلان هايقوم سلوك او يرتقي بأخلاق امة متخلفة بين يوم و ليلة..
الموضوع عبارة عن عملية طويلة بمراحل تبدأ بوجود قانون و نظام يحكم افعال الافراد و تطبيقه بشدة و حزم..
أقصد انك لو جبت ارقى شعوب الارض و عيشتهم في مكان لا يوجد به نظام او قانون رادع ستجدهم تحولو مع الوقت الى همج و مش هايختلفو كتير عن الي بنشوفه في مصر

**MoToRiZeR** · 27-09-2008 08:07 PM

فيه حاجة انا إكتشفتها اما نزلت أشتغل في المجال الإعلامي
إن معظم اللي شغالين فيه لا يمتون إليه بأي صلة و غير دارسين له و قابلت ناس كتير في مناصب إعلامية كبيرة خريجين تجارة و علوم !

فا بيقعوا في غلطات فادحة و المفروض إنهم بيشغلوا مناصب المحترفين و لكن شغلهم في الأخر بيطلع شغل هواة .. و أي واحد في أولي إعلام و بيدرس الإعلان يقول إن اللي عامل الإعلان ده مبيفهمش حاجة .. لأن أول مبادئ الإعلان إنه ميتعارضش مع نفسه و في نفس الوقت خرج عن الهدف اللي هو معمول علشانه .

إعلانات السياحة ببساطة بتقول " يا سيدي لو علينا إحنا إعمل اللي إنت عايزه بس أصل البلد هتجيب درفها كدة ! الكاشات يا معلم هنصرف منين "

و معتقدش إن هدف وزارة السياحة إن تحولنا إلي عرائس خشب في يد السائحين في حين إن الأخلاقيات اللي السبب في ده بتاكل في جذور المجتمع .. و لو حسبتهم كدة هيلاقوها خسرانة في الأخر و يعني باصين تحت رجليهم لأقصي حد

فكرتني بلوحة شفتها في مبني التليفزيون المصري اما كنت بتدرب هناك في سنة تانية "الله لا يرجعها أيام" كان مكتوب عليها "ممنوع التدخين بأمر رئيس القطاع" !

يعني برضه .. يا باشا لو علينا إحنا دخن و إخنقنا مفيش مشاكل دنتا ضيفنا بس أصل رئيس القطاع بيضايق !

من الأخر .. سمك لبن تمر هندي

**iunknown** · 28-09-2008 12:13 AM

أستاذ iunknown
هو مصر فيها سياحة الدعارة مثلا علشان حضرتك تقول كدا ؟؟؟؟

أغلب السياح في مصر يأتون للسياحة الثقافية في الشتاء و هم السائحين الأغنياء
و يليهم السياح العاديين الذين يأتون أساسا للشواطئ و الجو الحار

للاسف الشديد كلام د/أمير صحيح

السياحة الثقافية اللي حضرتك بتتكلم عليها حجمها صغير جدا

غالبية العرب -مش هقول كلهم - بيجوا هنا لأن مصر ارخص من دبي والبحرين

الفنادق والاوتيلات والديسكوهات نشاطها الرئيسي الـ ..... الدعارة

موضوع سواقين التاكسي ده تقريبا شفته بنفسي

كان معايا اجانب في الشركة وكان القوادين بتوعهم سواقين التاكسي

بلاش الكلام ده

حد فاكر الـ (subliminal message ) بتاعت اعلان نورت مصر

الراقصات

**ehabthefirst** · 28-09-2008 12:54 AM

بجد لما قريت كلام iunknown و Ramy_ali
حسيت ان الدنيا لسه بخير
و لسه فى ناس رافعه رايه الدين والكرامه

**AhmedElsayed** · 28-09-2008 01:09 AM

يجماعة بلاش تعميم لو سمحتوا
لا كل السائحين جايين علشان الدعارة وحتى لو فى حالات مش معنى كده ان خلاص السياحة بقت كلها وحشة
هو فى بلد فى العالم مفهاش دعارة، يبقى لو سائح جه مصر وعمل بلوة يبقى خلاص السياح كلهم جايين كده؟
واظن واضح ان ترند العرب اللى بيجوا مصر بقى مختلف عن زمان
بقم يجوا بعائلاتهم مش زى زمان وان محدش بيجى بعيلته يعمل حاجة

نرجع لموضوعنا
على فكرة معروف ان النشاط الوحيد اللى الدولة مبتاخدش منه حاجة (تقريبا) هو السياحة
لان غالبية اللى السائح بيصرفه فى البلد بيروح لافراد او شركات بتشغل افراد اما الحكومة فبالكتير اوى بتاخد تكلفة التاشيرة ودى ملاليم

يبقى السياحة نفسها فى اهميتها مش محتاجة مناقشة وتغيير طريقة التعامل معاهم محتاجة مجهود كبييييييير

اما سلوكيات السياح فى مصر ومدى امكانية اننا نفرض عليهم حاجة معينة فدى برده محتاجة توعية من الناحية التانية واظن ان اى سائح بيحاول يراعى طبيعة البلد اللى هما بيزوروها

**Ramy_Ali** · 28-09-2008 10:45 AM

السياح اللى بيجوا مصر معظمهم سياح
رجة تالتة يعتبروا شحاتيين حضرتك
وبيفاصلوا وبيستنصحوا اوى فى الشراء
وميغركش الفشخرة اللى عليهم دا بس فرق العملة حضرتك
زى سعادتك ممكن تروح تتسيح فى زيمباووى مثلا هتحس انك امبراطور

ثانيا السياح مغليين على اهل البلد ومنكدين عيشتهم
تعرف حضرتك تروح شرم فى شهر 11 او 1 بدون صعوبة حجز
تعرف حضرتك ان تكلفة زهابك الى شرم والاقامة بها اغلى من انك تروح تركيا
تعرف ان تكلفة السائح اكثر منك وبيدفع اقل منك
تعرف تشوف لعب القمار وشرب الخمر على شواطئ السخنة وسيناء من السياح وخاصة اليهود

اللقمة متغمسة بمصية الله وبالذل الفعلى وباهانة اهل البلد من اجل حفنة دولارات لا تصل الى ايدى المواطن ولكن لتزيد ارصدة سويسرا

المكسب الحقيقى من السياحة (الفندق - الطيران-التنقلات بالاتوبيسات السياحية) ودا طبعا بيروح لناس معينة فى البلد
وبعد كدا انسى
يعنى متقنعنيش ان اللى بياجر مركب فى النيل لو مفيش سياح هيموت
دا اصلا مش بيلاحق فى العيد وفى اعياد الحب والعطلات

وبعدين ليه تعرض نفسك لغضب الله وللمال الحرام

مش هتكلم عن الدعارة المقننة والغير مقننة
مش هتكلم على ما يدور فى الكواليس الخلفية للفنادق

هتكلم عن جزئية واحدة بس وهيا الخمور وشربها عيانا بيانات فى رمضان حتى

مش الرسول علية السلام بيقول فيما معنها عن الخموه(لعن الله شاربها وحاملها وساقيها وبا ئعها ) او كما قال عليه الصلاة والسلام

يعنى اللى بيشتريها واللى بيبعها واللى بيحملها ملعون يعنى مطرود من رحمة الله
والدولارات اللى ناتجه عن تجارتها ملعونة ومال حرام
واللى بيسهل ليها نفس الكلام

شوف كام فندق وكام منتجع تمارس فيها تلك الرزائل وشوف عدد شاربى الخمور وبائعيها وساقيها
فلا حولة ولا قوة الا بالله
ومستغربين ليه كمية الابتلائات والمصائب اللى بتقع كل يوم علينا ما هو من غضب ربنا علينا