خذوا النقطة من افواه الاعلانات

**AhmedElsayed** · 27-09-2008 03:31 PM

يجماعة انتوا ليه واخدين الموضوع بنظام يا اما كله يا بلاش
يعنى فيها ايه لما نعلم الناس تتعامل مع السياح ازاى؟ هل معنى كده انهم بيقولوهم بهدلوا المصريين مفيش مشكلة
يعنى لما يعملوا اعلان علشان منتهربش من الضرايب نقولهم سايبين الرشوة والمحسوبية والواسطة ليه من غير اعلانات
مكل مقام وله مقال وكل اعلان وليه هدف معين
يعنى اعلان السياحة عاملاه وزراة السياحة، طيب حتتكلم على المصريين ليه؟ وهل مطلوب فى وسط اعلان زى ده اقول والنبى كمان عاملوا المصريين كويس؟

وبعدين الناس مش طالعة تزعقلنا ولا حاجة بالعكس هما عايزين يعكسوا ان تصرفات بعض الناس (اللى بتحصل فعلا) بتخلى صورتنا زفت ازاى بتعمل فيهم ايه (وبمناسبة اعلانات زمان اهو فعلا اللى كان مستفز زمان لما كان يقولك مترميش زبالة علشان الاجانب يشوفونا كويسيم) اهو ده اللى عمله يستاهل الدبح

معلش اعذرونى بس اناحاسس ان الناس بقت ماشية بنظم "وكمان بتقولى صباح الخير" اى تصرف حيتعمل من اى جهة سواؤ كان كويس او وحش لازم نطلع فيه القطط الفاطسة لمجرد النقد وبس

**iunknown** · 27-09-2008 03:39 PM

على فكرة دخل السياحة في مصر لا يمكن الإستغناء عنه بسهولة
لأن السياحة جزء كبير من الدخل القومي المصري و المحافظة على السائح ( الضيف الأجنبي ) هو شئ مهم جدا للإقتصاد

مع كامل احترامي لوجهة نظر حضرتك

بس تجوع الحرة ولا تأكل بثديها

الاعلانات بتاعة مش انت لوحدك اللي هتخسر في منتهى الصفاقة (ماعدا بتاع النيل)
اهانة شعب بأكمله علشان خاطر عيون سياح الدرجة السبعتاشر اللي بييجوا هنا يبرطعوا في التكية بتاعتهم

التكية اللي اداهم الحق فيها ناس مش هقول غير ربنا ينتقم منهم على اللي الحالة وصلونا ليها

لو اتكلمنا عن "صناعة" الاعلانات في الغالبية العظمى في مصر هنلاقيها سبوبة مافيهاش اي علم ولا فن

اي كروتة وخلاص
بنت بتتقصع وتتمايل

او شخص نصف مشهور

انا بيقى هاين عليا اكسر التليفزيون مع اعلانات البطاطس اللي بتكرر 500 مرة في الثانية ولا اعلانات السمن
ايه القرف ده

انتوا مابتشوفوش الاعلانات بره عاملة ازاي

يا عالم ارحمونا بقة

**Ramy_Ali** · 27-09-2008 04:03 PM

السياح اللى بيجوا مصر معظمهم سياح
رجة تالتة يعتبروا شحاتيين حضرتك
وبيفاصلوا وبيستنصحوا اوى فى الشراء
وميغركش الفشخرة اللى عليهم دا بس فرق العملة حضرتك
زى سعادتك ممكن تروح تتسيح فى زيمباووى مثلا هتحس انك امبراطور

ثانيا السياح مغليين على اهل البلد ومنكدين عيشتهم
تعرف حضرتك تروح شرم فى شهر 11 او 1 بدون صعوبة حجز
تعرف حضرتك ان تكلفة زهابك الى شرم والاقامة بها ارخص من انك تروح تركيا
تعرف ان تكلفة السائح اقل منك وبيدفع اقل منك
تعرف تشوف لعب القمار وشرب الخمر على شواطئ السخنة وسيناء من السياح وخاصة اليهود

اللقمة متغمسة بمعضية الله وبالذل الفعلى وباهانة اهل البلد من اجل حفنة دولارات لا تصل الى ايدى المواطن ولكن لتزيد ارصدة سويسرا

المكسب الحقيقى من السياحة (الفندق - الطيران-التنقلات بالاتوبيسات السياحية) ودا طبعا بيروح لناس معينة فى البلد
وبعد كدا انسى
يعنى متقنعنيش ان اللى بياجر مركب فى النيل لو مفيش سياح هيموت
دا اصلا مش بيلاحق فى العيد وفى اعياد الحب والعطلات

**amir** · 27-09-2008 04:10 PM

المشاركة الأصلية كتبت بواسطة amir

لو هنتكلم عن القيم الدينيه يبقي لازم نشيد بدور التلفزيون و السينما البطولي في ازاحه العديد من القيم الدينيه علي سبيل المثال و ليس الحصر طبعا
الصلاه: عمرك شفت في فيلم حديث نسبيا البطل بيصلي, اللهم الا لو كان محبط احباط فظيع جدا جدا او ارهابي متشدد حقير و عاده بيتم القبض عليه و النكايه بيه, و كمان ساعات كتير بيتم التعامل مع الصلاه و المصليين عموما خاصه في المساجد كأنهم شخصيات معقده و عندها انفصام في الشخصيه مثلا يجيبلك واحد بيصلي الفرض بفرضه و تلاقيه عينه زايغه علي النسوان او بيسرق او بيحشش, و ده ان كان متواجد في المجتمع انما مش لازم ابدا نشيع الصوره دي عن المصلين و تبقي اول صوره تيجي في دماغنا لما نشوف واحد سني بدقن او عنده زبيبه صلاه
الصوم: انا مش كبير قوي في السن بس عمري ما شفت الصيام كركن من اركان الاسلام بيعرض في فيلم او تمثيليه عرض بيوفيه حقه
الحج و العمره: طبعا في الافلام بيطلعو اللي عايز يحج او يعتمر كأنه رايح يشتري المغفره بفلوسه
الزكاه: مفيش مره في فيلم او مسلسل بتعرض كقيمه دينيه و اقتصاديه غايه في الاهميه للحفاظ علي الاقتصاد القومي
و في نقطه دينيه غايه في الخطوره, و طبعا تم التعامل معاها علي مدار سنين و ادي نتايجها بنحصدها جميعا كجيل بيعيش الايام بتاعتنا دي و هي الحلال و الحرام و طريقه فصلهم عن بعض و التعامل معهم, مثلا يعرضو الشاب"الروش" كشخصيه مدخنه مستهتره لا يبالي بشيء سوي ملذاته و خروجاته و السهرات الحمراء و ما شابه و يبجلو النموذج ده و يطلعو بيه السما كنموذج ناجح و الحياه مبتسمه في وشه
و بعد ده تلاقي الشباب في الشوارع المعاكسه عندهم شيء عادي مع ان ديننا واضح جدا في اداب الطريق و كان في حديث عن رسول الله صلي الله عليه و سلم عن اداب الطريق مش فاكره بس ممكن حد يكتبه, و مفاده انك لو واقف في الشارع مع اصحابك فعليكم واجبات كتير قوي تجاه عابر الطريق, و اكيد طبعا اللي يعرف الحديث ده عارف ان المعاكسه دي مثلا شيء عظيم الوزر
و غير المعاكسه حاجات كتير اتربينا علي انها عيب و حرام لايتم معالجتها في السينما و التلفزيون علي هذا الاساس فتحولت الي شيء مستباح من كتر ما بتعرض علي انها شيء عادي جدا و اللي بيرفض الحاجات دي بيبقي متخلف رجعي و جاهل خد عندك مثلا الزنا, كلمه لما كنت صغير كانت كبيره قوي قوي, شوف كده كام فيلم البطل بيزني و المستجد البطله كمان و بيتم التعامل مع الموضوع عادي جدا و المهم ان مفيش حمل و انك استخدمت واقي ذكري( و الله كانت كلمه قبيحه لغايه ما حلمي باشا ولا الاخ التاني سلامته الف سلامه ) طلع علينا بكلمه كنايه عنه و هي كابوت تقريبا!!
و اكيد تعاطي المخدرات تم تمجيده لاسباب مش قادر افهمها بس في بعض الافلام و بالذات الحديثه نسبيا المخدرات خدت اعلانات جامده جدا لدرجه تجب معاها معامله بعض الافلام كأعلانات عنها
وده من وجهه نظر دينيه
اما اجتماعيا فالكلام يطول عن القيم التي تم القضاء عليها نهائيا من قاموس السينما و التلفزيون و علي سبيل المثال: احترام الوالدين, احترام الاخوات, احترام كبار السن, احترام الزوج و الزوجه لبعض, احترام زملاء العمل و غيره و غيره

و انا مركز علي السينما و التلفزيون لأهميتهم القصوي كوسائل اعلام مرئيه و مسموعه لها مصداقيه و سحر خاص علي جموع الناس, و مننساش ان بلدنا القله فيه مثقفه و الاكثريه عندها جهل و اميه و ان اختلفت النسب, و لسبب ده الافلام و المسلسلات بتلاقي تسميع ضخم عند غالبيه الشعب نظرا لأنها مصدر ثقافته الوحيد تقريبا
و بعد كل ده مش لازم نستغرب قوي من ظهور الحصاد الطبيعي لمسلسل طويل قديم قدم التلفزيون ذاته, من شباب غير ملتزم بدينه ولا يعرفه اصلا, و جرائم غايه في البشاعه و علاقات اسريه مفككه و علاقات زوجيه مشوهه (الجواز بقي مرتبط بالاشباع البدني و الرومانسيه المستمره 24\7)
و احب اوضح ان الاعلام الامريكي لما بيحبو يفرضو قوانين او يغيرو طباع الشعب بيلجئو للسينما و التلفزيون و الاعلانات الموجهه(مش بطريقه اعلانات حزام المرور اللي لو يسيبوهالي هخلي الناس تربط الحزام في بيوتها و متمشيش بأكتر من 60 كيلو علي الصحراوي كمان!!) بالمناسبه حد شاف اعلانات دبي اللي كانت بتيجي علي mbc عن السرعه و تأثير الصدمات بالمقارنه بالسقوط من ارتفاعات مختلفه!!!
كان اعلان غايه في التأثير لدرجه تمنيت انه يتعرض علي القنوات المحليه
ربنا يرحمنا و يلطف بينا

دي كانت مشاركه ليا في موضوع ايه اللي بيحصل للناس في رمضان و لقيت انها تنفع هنا بردو

**Nader** · 27-09-2008 04:33 PM

المشاركة الأصلية كتبت بواسطة tutankhamoun

السلام عليكم و رحمة الله و بركاته

هو حضرتك زعلانة ليه يا أستاذة علا ؟؟؟؟

لكل مقام مقام

إعلانات المباني الفاخرة لها زبونها

إعلانات السياح أنا شايف أنها صحيحة 100 % و لو أني ما شفتش غير اعلان واحد

بس أنا بشوف مصايب من التجار اللي بيشتغلوا مع السياح و بسببهم بيتقال علينا كلام خارج مصر فظيع ........ و إن أحنا شعب حرامي و هكذا

بالنسبة للشعب المصري في الإجمال
أحنا شعب غريب جدا .........
أغلب أفراد الشعب كاره لكلمة نظام ...... لا يحب إطلاقا ..... أنه من ألد أعداء الشعب

الأهم أن الأخلاق أنخفضت بنسبة كبيرة جدا نظرا للظروف الإقتصادية الصعبة التي يمر بها أغلب افراد الشعب و التي بالتأكيد تؤثر على بقية الرعية
و طبعا كل مشاكلنا ........ مشاكل مشتركة ما بين الشعب الكاره للنظام و التعليمات ...... و الحكومة من جانب أخر

على فكرة دخل السياحة في مصر لا يمكن الإستغناء عنه بسهولة
لأن السياحة جزء كبير من الدخل القومي المصري و المحافظة على السائح ( الضيف الأجنبي ) هو شئ مهم جدا للإقتصاد

على فكرة ......... في أي بلد محترم .......... لو حضرتك زائرة لها و أتعرضتي لأي مشكلة ........ القانون هناك بيجبلك حقك تالت و متلت

أحنا بس اللي حساسين زيادة عن اللزوم بخصوص البلد و أحوالها الزفت و شعبها اللي عايز جاز يتكب عليه و نخلص كلنا

و كل سنة و أنت طيبة بمناسبة العيد
و عيد سعيد

متفق معك تماماً.

**Abo_Lina** · 27-09-2008 07:06 PM

بصرف النظر عن الاعلانات و مدى سذاجتها
مافيش اعلان هايقوم سلوك او يرتقي بأخلاق امة متخلفة بين يوم و ليلة..
الموضوع عبارة عن عملية طويلة بمراحل تبدأ بوجود قانون و نظام يحكم افعال الافراد و تطبيقه بشدة و حزم..
أقصد انك لو جبت ارقى شعوب الارض و عيشتهم في مكان لا يوجد به نظام او قانون رادع ستجدهم تحولو مع الوقت الى همج و مش هايختلفو كتير عن الي بنشوفه في مصر

**MoToRiZeR** · 27-09-2008 08:07 PM

فيه حاجة انا إكتشفتها اما نزلت أشتغل في المجال الإعلامي
إن معظم اللي شغالين فيه لا يمتون إليه بأي صلة و غير دارسين له و قابلت ناس كتير في مناصب إعلامية كبيرة خريجين تجارة و علوم !

فا بيقعوا في غلطات فادحة و المفروض إنهم بيشغلوا مناصب المحترفين و لكن شغلهم في الأخر بيطلع شغل هواة .. و أي واحد في أولي إعلام و بيدرس الإعلان يقول إن اللي عامل الإعلان ده مبيفهمش حاجة .. لأن أول مبادئ الإعلان إنه ميتعارضش مع نفسه و في نفس الوقت خرج عن الهدف اللي هو معمول علشانه .

إعلانات السياحة ببساطة بتقول " يا سيدي لو علينا إحنا إعمل اللي إنت عايزه بس أصل البلد هتجيب درفها كدة ! الكاشات يا معلم هنصرف منين "

و معتقدش إن هدف وزارة السياحة إن تحولنا إلي عرائس خشب في يد السائحين في حين إن الأخلاقيات اللي السبب في ده بتاكل في جذور المجتمع .. و لو حسبتهم كدة هيلاقوها خسرانة في الأخر و يعني باصين تحت رجليهم لأقصي حد

فكرتني بلوحة شفتها في مبني التليفزيون المصري اما كنت بتدرب هناك في سنة تانية "الله لا يرجعها أيام" كان مكتوب عليها "ممنوع التدخين بأمر رئيس القطاع" !

يعني برضه .. يا باشا لو علينا إحنا دخن و إخنقنا مفيش مشاكل دنتا ضيفنا بس أصل رئيس القطاع بيضايق !

من الأخر .. سمك لبن تمر هندي

**amir** · 27-09-2008 11:35 PM

المشاركة الأصلية كتبت بواسطة tutankhamoun

+10000000000000

أستاذ iunknown
هو مصر فيها سياحة الدعارة مثلا علشان حضرتك تقول كدا ؟؟؟؟

أغلب السياح في مصر يأتون للسياحة الثقافية في الشتاء و هم السائحين الأغنياء
و يليهم السياح العاديين الذين يأتون أساسا للشواطئ و الجو الحار

للاسف و لأول مره
اختلف معاك يا توت باشا في النقطه اللي انا مقتبسها دي
للاسف الشديد سياحه الدعاره موجوده و متواجده من فتره ليست قصيره في مصر
و تنقسم لشقين
الشق الاول:
و هو اللي ممكن نتجاوز فيه عن كلمه دعاره
و ده بيحصل في الاقاليم و الارياف اللي فيها محامين مختصين بالموضوع ده
و اللي بيحصل بالظبط ان البيه العربي بيتجوز بنت مصريه فقيره غالبا لا يتجاوز عمرها 20 عاما و بمقابل مادي كبير بالنسبه لاهل الفتاه اللي الفقر و الحاجه بتخليهم يبيعو بناتهم, و طبعا الجوازات دي ممكن تستمر فتره الي ان يزهق منها و يسيبها هنا في مصر علي ذمته و يبقي يرجعلها تاني في الاجازات او يطلقها و في كلتا الحالتين معظم البنات دول بيتجهو بعد كده لاحتراف الدعاره للصرف علي انفسهن و اطفالهن ان وجدو

الشق الثاني:
سياحه الدعاره ذات نفسها و دي بقي موجوده في الفنادق و الديسكوهات و النايت كلوبس, و مش بس كده ده السواقين بتوع التاكسيات العاديين حتي بيبقو دليل تليفونات للعاهرات و بيعرفو السائح و بالذات العربي عليهم بمقابل مادي, ده غير سماسره الشقق اللي بجوار الفنادق و غيرهم و غيرهم لدرجه مثيره للاشمئزاز

و بعد كل ده و انت مستغرب و مستنكر للنوع ده من السياحه في مصر؟!!!!