الموضوع: الحمد لله رب العالمين ... فرق الموت من الحياه لحظه

الحمد لله .. ربنا نجانى بفضله وكرمه فقط دون أى تدخل منى

كنت رايح مشوار ومعايا واحد شغال معايا ... طريق اسفلت عادى رايح جاى وياخد عربيتين كويس بس للأسف على الجنبين عواميد كهربا ضغط عالى على الجنبين
ماشى فى أمان الله ومقابلنى عربيه دبابه ومحمله موز وبيجرى ... مش عارف حصل له إيه خلاه يلم الدركسيون على الشمال فجأه .. فى إتجاهى يعنى
طبعا الغرزه دى مع الحموله العاليه خلت العربيه تميل جامد ناحيتى وخلاص بقى بينى وبينه خمسين متر .. طبعا الحموله وقعت كلها قدامى والعربيه جايه عليا ... لم الدركسيون الناحيه التانيه ... وعربيته اتقلبت على جنبها وبعدين على ضهرها وكل ده الحمد لله فى يمينه هو .. العربيه رجعت تانى اتعدلت بعد القلبتين دول وقامت حاضنه عمود الكهربا بالوش
كل اللى حصل ده كان فى ثانيتين ... طبعا نزلت انا والراجل اللى معايا جرى ... طلعنا الاتنين من العربيه وكان وقف ولاد حلال اخدوهم على المستشفى .. والحمد لله سألت عليهم قالوا كويسين
طبعا العربيه الدبابه مش نافعه تانى من منظرها .. حاجه ربنا ما يكتبها على حد يا رب
انا الحمد لله كان من نصيبى الموز اللى على الطريق ... على ما لحقت افرمل كنت اخدت بتاع ٥ سبايط موز بالإكسدام وفى بطن العربيه
يعتبر عندى الحمد لله مافيش خساير .. الفبره بتاعه الاكسدام اللى تحت اتخلعت وخلاص .. من قوه الصدمات بتاعه الموز
انما انا بصراحه من ساعتها وانا فى دنيا تانيه ... مذهول .. لان ده كله حصل فى لمح البصر ... ولولا فضل الله كان ممكن العربيه تقابلنى فى سكتى بدل الناحيه التانيه
خلوا بالكوا يا اخوانا .. انا من ساعتها وكل عربيه تكون مقابلانى بحس بنفس الاحساس

ربنا يسترها معاكوا ومعانا يا رب العالمين