الموضوع: عايز اشتري التو 1100 سي سي

بصراحة الألتو 800 معايا وهي ماشاء الله ممتازة ورائعة بكل المقاييس ولا يعيبها سوى انها ضيقة شوية صغيريين أكتر مما كنت متوقع

الموتور 800 سي سي جميل على العربية جدا وسحبه حلو

بس التكييف لما بيشتغل العربية بتبقى تقيلة شوية في الطلعة الأولانية وده في كل العربيات عموما ماشوفتش عكس كده غير في اللى أكتر من 1600 سي سي

التكييف ممتاز وفوق الرائع وجامد جدا (مع ملاحظة اني من الناس اللى بتموت في الساقعة)

استهلاك البنزين بيعمل معايا 300 كيلو في الصفيحة الى هية بتكون 20 لتر لو ماتعرفش .... ساعات أكتر ساعات أقل حسب طبيعة السواقة

بس انا قريت هنا في المنتدى انها بتعمل حوالى 400 في الصفيحة وإن شاء الله الموضوع استفسر عنه في صيانة الـ 5000 بإذن الله

غير كده ماشاء الله عليها جميلة وناعمة وحلوة وهادية مابسمعش صوت الموتور غير لما أقفل الزجاج وأشغل التكييف واقرص عليها في السرعة بعد الـ 100 عشان العزل بتاعها على قده شوية بس حلو وكمان ماشاء الله بجيب بيها 150 كم/س لو عايز

بالنسبة لقطع الغيار ... انا أعرف انها متوافرة في التوفيقية وحتت كتير فين بالظبط مش متأكد

بالنسبة للسفر انا أول ماستلمتها كنت باعمل بيها يوميا مالا يقل عن 200 كيلو لأن كنت بسافر بيها الشرقية كل يوم لحد ماتنقلت جيت هنا القاهرة تاني بس برضه باعمل بيها في حدود 100 كيلو يوميا داخل القاهرة وطبعا في أيام متفرقة مابخرجش بيها أصلا

ولو هاتحجز من التوكيل فعلا التوكيل هايأخرك على الأقل شهرين زيادة زي ماتعمل معانا كلنا ميزة المعرض انك هاتستلم على طول