الحرارة تقل جدا على الطريق السريع

**hazem ali** · 25-08-2014 06:39 PM

المشاركة الأصلية كتبت بواسطة borio1704

إيه قصد حضرتك بالحرارة الطبيعية؟؟ وازاي سخونة وبرودة عادية؟؟

كلام حضرتك ده معناه إن ثرموستات الكوعة مش موجود.

الطبيعي هو كالآتي:

- أول ما تشغل العربية بعد وقفة طول الليل يكون المؤشر على الـCold
- لو اتحركت بالعربية خلال 30 ثانية.. المؤشر هيطلع خلال دقيقة تقريبا.
- المؤشر هيشاور على نقطة "قبل المنتصف" خلال حوالي 3 دقايق من أول ما شغلت العربية... وممكن الوقت يزيد شوية في الشتا.

على فكرة...
لو ما اتحركتش بالعربية وسبتها تسخن لوحدها.. المؤشر هيبدأ يتحرك بعد حوالي 2-3 دقائق... ويوصل لنقطة قبل المنتصف خلال 5-7 دقايق..

علشان كده بنقول إن الأفضل إنك تتحرك بالعربية "خلال" دقيقة بعد ما تشغلها .. ويفضل أقل.. علشان الحركة بتساعد الموتور إنه يسخن بسرعة.

بس لما المؤشر يوصل لنقطة قبل المنتصف دي... المفترض ما يتحركش ولا فوق ولا تحت طول ما العربية شغالة.

ولو اتحرك يبقى فيه حاجة غلط.

...

انا طول ما انا ماشي في الطريق هوا تحت النص بس لازم اكون دايس ينزين حتى ولو خفيف
لكن لما اشيل من على البنزين فترة من نصف دقيقة الى دقيقتين وانا ماشي عل 120 مثلا الاقي المؤشر بينزل لغاية ما خلاص هيدخل على الcold بس انا برجع ادوس تاني بنزين

لكن العربية محدش شال منها ترموستات -على افتراض ان كل العربيات فيها ترموستات-

وعندي سؤال بعد كلامك ... انته كده بتقول ان الاحسن ان الواحد يشغل العربية ومتستناش عليها تسخن يعني ميستناش 5-10 دقائق مثلا
مش ده غلط على الماتور انك تمشي بدون ميسخن في اول اليوم الصبح ؟؟

**borio1704** · 25-08-2014 07:24 PM

المشاركة الأصلية كتبت بواسطة hazem ali

انا طول ما انا ماشي في الطريق هوا تحت النص بس لازم اكون دايس ينزين حتى ولو خفيف
لكن لما اشيل من على البنزين فترة من نصف دقيقة الى دقيقتين وانا ماشي عل 120 مثلا الاقي المؤشر بينزل لغاية ما خلاص هيدخل على الcold بس انا برجع ادوس تاني بنزين

لكن العربية محدش شال منها ترموستات -على افتراض ان كل العربيات فيها ترموستات-

وعندي سؤال بعد كلامك ... انته كده بتقول ان الاحسن ان الواحد يشغل العربية ومتستناش عليها تسخن يعني ميستناش 5-10 دقائق مثلا
مش ده غلط على الماتور انك تمشي بدون ميسخن في اول اليوم الصبح ؟؟

انتظارك للسيارة إنها تسخن فيه مشكلتين

1- استهلاك بنزين بدون استفادة .. يعني بترمي فلوسك على الأرض

2- وقت أطول للموتور على ياخد وضع التشغيل الفعلي.. وده بيسبب تآكل للموتور وتقصير لعمره على المدى الطويل

وإذا كانت العربية عند حضرتك بتاخد 5-10 دقايق للتسخين.. فده معناه وبكل وضوح إن الترموستات مش موجود عند حضرتك.. أو على الأقل.. عطلان وهو مفتوح.

لو عايز معلومات أكتر ادخل على الموضوع ده.. فيه شرح لكل المميزات والعيوب بتاعت ثرموستات الكوعة
http://www.nilemotors.net/Nile/328708-a.html

...

**borio1704** · 25-08-2014 10:53 PM

المشاركة الأصلية كتبت بواسطة hazem ali

ان شاء الله هبقا اقرأ الموضوع بتركيز
وانا مكنتش عارف ان العربية مش بتحتاج لتسخين انا كذا واحد قالى انك لازم تستنى شوية لغاية ما الزيت يوصل للماتور عشان الماتور يبقى متزيت والزيت يوصل لدرجة حرارة مناسبة
وانا على الاساس ده بستنى لغاية ما rpm ينزل عن الواحد او مؤشر الحرارة يبدأ يرتفع وبعدين بمشي

للأسف دي كلها معلومات قديمة كان ممكن تبقى صح من 50 سنة.

دلوقتي تكنولوجيا الزيوت والمواتير خلتنا مش محتاجين تسخين... كل الموضوع إننا ناخد بالنا في الفترة اللي الموتور بيسخن فيها (قبل ما يوصل لعلامة المنتصف) إننا ما نرفعش الدوران أكتر من 3000 rpm.. وكمان يفضل إننا ما ننزلش كمان بالدوران لأقل من 1500 أثناء المشي.

كل ده علشان الموتور يطلع حرارة تخليه يسخن بسرعة... وفي نفس الوقت ما نجهدوش

فعليا.. الزيت بيوصل لكل أجزاء الموتور خلال 10 ثواني بالكتير... يعني حضرتك تقدر تمشي بالعربية بعد ما تربط حزامك وتظبط مراياتك وتتأكد من الشارع حواليك أمان علشان تطلع.

أما من ناحية درجة حرارة الزيت... فالزيت متعدد اللزوجة ( اللي كلنا بنحطه في العربية ) بيغنيك عن إنك تستناه لحد ما يسخن.

...