اختبار قيادة bmw f30 و خواطر بعد العوده للسيفيك

**hany63** · 09-02-2014 06:03 PM

مساء الخير
احب افكركم اني من مالكي الجيل التامن VTI و ده من بعد تجربه مريره مع الباسات TSI
عايزين الصراحه انا لما جبت السيفيك بعد الباسات حسيت اني نزلت بس طبعا كل ما افتكر المعاناه اللي حصلت لي بسبب الفتيس كنت بقول تغور العربيه
المهم بمرور الوقت و التعود على العربيه الصراحه ارتطبت بيها
ما علينا بما اني متعود اغير عربيه كل ٣ سنوات خصوصا ان البيت عندي محتاج عربيه زياده قلت يا واد يا هاني بيه بدل ما تجيب حاجه تعبانه خساره فيها الفلوس اديهم السيفيك و تعتبر جديده لسه عامله ٥٢ الف و متع نفسك بحاجه جديده
و بعد تفكير غير طويل طبعا قلت مفيش غير البي ام ٣١٦ اللي ممكن تحسس الواحد انه اتنقل في حته تانيه و نرجع تاني للالماني خصوصا ان الالماني الشعبي من VW مرورا بالسكودا وصولا للسيات عنده انفلونزا الفتايس
و احب اشكر العضو horas 3000 من قسم البي ام على تعبه معايا و شرح كل صغيره و كبيره عن العربيه بصفته من مالكيها
المهم حجزت اختبار قياده في البافاريه اللي في التجمع الخامس و احب اشيد بالشياكه في التعامل مقارنة بباقي التوكيلات
طبعا مش هطول في التفاصيل عشان فيه مواضيع شارحه العربيه بالتفصيل انا هركز على عدة نقاط
اولا وضعيه القياده تحس انك بدون مبالغه قاعد في الارض الكرسي واطي جدا
ثانيا التشطيبات تحفه مع شكل ال i drive و شكل الفتيس مع العدادات الكلاسيكيه لاء جميله الصراحه بس الرخامه ان الدركسيون في اول فئه مش جلد طبيعي و دي الفئه اللي اقدر على مهرها حركه غلسه جدا تقولش كانت هتفرق معاهم
نييجي بقى للمهم الطلعه الاولى و دي كانت نقطه مهمه عايز اشوف الفتيس بيطلع العربيه من الثبات بنعومه ولا طلعته خشنه زي الدي اس جي لقيته في منتهى النعومه و السلاسه الظاهر ياواد هتشتري
طلعت على الطريق الرئيسي و انا على وضع الكومفورت العربيه بتتجاوب مع اسلوب سواقتك يعني لو عايز تمشي براحه تمام اول ما تكبس هتلقى وحش على الطريق بس للامانه مواتير ال TSI سحبتها في منتهى الغباء تحس انك بتتخطف لاول وهله و يمكن ده بسبب الدي اس جي و يمكن دي الميزه الوحيده
ملحوظه تانيه العربيه ما فيهاش شيفتات في الطاره لو عايزها مانيوال يبقى عن طريق عصاية الفتيس و برضه حركه نص كم دول كلهم زرارين بيقوا تحت ايدك و هيا على الدركسيون
طبعا العزل تحفه و العفشه رائعه انا كنت متخيلها انشف من كده
وانا ماشي عربيه سوزوكي ميني فان كسرت عليا جامد لدرجة اني دوست فرامل جامد لقيتها بلا مبالغه ثبتت في مكانها بصراحه تقدر تجري و تجمد قلبك انت في ايد امينه
طبعا العربيه كماليتها معقوله من بلوتوث و مثبت سرعه و Idrive و تشغيل فلاش ميموري ده غير طبعا وسائل الامان الغنيه عن التعريف
ما علينا خلص اختبار القياده و حانت لحظة العوده للسيفيك و انا رايح بقدم رجل و اؤخر التانيه اصلي عارف اللي هيحصل و مجربه قبل كده كتير لما كنت بسوق عربيه محترمه اقعد اسب و العن في عربيتي و نظام جتنا نيله في حظنا الهباب
الحاجه الغريبه جدا و اللي كانت ضد التوقعات ان السيفيك برضه بتوفر لك متعه غير عاديه في القياده من وضعية جلوس و عدادات و موتور رياضي طبعا البي ان تتفوق بس الفكره لو بتسوق وسط البلد و اخرك ١٤٠ كم الاحساس بالمتعه قريب و البي ام طبعا في العزل و الفرامل و الفخامه حاجه تانيه
لدرجة اني لو جبت البي ام هستخسر حد غيري ياخد السيفيك يبهدلها وعرفت ليه السبب لما واحد صاحبي معاه مرسيدس E280 ركب معايا مره اشتراها لمراته
و طالع في دماغي اعمل لها كار كير عند حد محترم لانها فعلا عربيه تسوى تمنها و زياده كمان بلا مبالغه

**kirolous123752** · 09-02-2014 06:33 PM

مبروك مقدما علي البي ام و علي فكرة محدش بينزل من الهوندا الا لما يركب البي ام ام النجمة لانها فعلا عربية محترمة جدااااااا و هوندا قدرت انها تخلي الناس يقارونها بال بي ام و المرسيدس

**hany63** · 09-02-2014 07:36 PM

المشاركة الأصلية كتبت بواسطة kirolous123752

مبروك مقدما علي البي ام و علي فكرة محدش بينزل من الهوندا الا لما يركب البي ام ام النجمة لانها فعلا عربية محترمة جدااااااا و هوندا قدرت انها تخلي الناس يقارونها بال بي ام و المرسيدس

الله يبارك فيك و الملاحظ ان هوندا مستواها ما بينزلش بالعكس
سيبك من الحوارات بتاعة البلاستك و الفوانيس

**kokowasfy** · 09-02-2014 06:58 PM

مبروك مقدما انشاء اللة لو اشترتها تعملنا تقرير مفصل عنها

**hany63** · 09-02-2014 07:31 PM

المشاركة الأصلية كتبت بواسطة kokowasfy

مبروك مقدما انشاء اللة لو اشترتها تعملنا تقرير مفصل عنها

يا مسهل عامل حسابي على اول الصيف ادعيلنا ناخد الفئه التانيه

**hany63** · 09-02-2014 10:49 PM

المشاركة الأصلية كتبت بواسطة kokowasfy

مبروك مقدما انشاء الله لو اشترتها تعملنا تقرير مفصل عنها

إن شاء الله قريب

**برنس الليالي** · 10-02-2014 02:54 AM

المشاركة الأصلية كتبت بواسطة horas3000

علي البركه يا زعيم
بس انت مقلتش انك ناوي علي البريميم
بصراحه مش بعتبرها bmw اصلا
كان المفروض تجرب الاعلي و انصحك جديا تكمل و تخش فيها لانها الخلاصه
و المهم جربت ال sport mode ولا لا

و بالنسبه للاوبشن و الحركات متنساش ان كل ده مقصود عشان متقطعش علي ال 320

هو فرق البريميوم واللكجيري فرش جلد ومرايات ضم مش كدا؟ ولا في حاجات تانية ؟

- إلا قولي يا برنس إنت دا ؟

المشاركة الأصلية كتبت بواسطة hany63

إن شاء الله قريب

خلاص لو نويت شد ع اللون الابيض

**hany63** · 10-02-2014 10:38 AM

[quote=برنس الليالي;3875418270]هو فرق البريميوم واللكجيري فرش جلد ومرايات ضم مش كدا؟ ولا في حاجات تانية ؟

و تابلوه ابانوس و نواكل و حساسات ركن خلفي

**samomodrek** · 09-02-2014 07:07 PM

تجربه جميله من شخص محترم بحب اقرأ مواضيعه جدا جدا
بس كام سعر البي ام الفئه الأولى؟؟

**hany63** · 09-02-2014 07:30 PM

المشاركة الأصلية كتبت بواسطة samomodrek

تجربه جميله من شخص محترم بحب اقرأ مواضيعه جدا جدا
بس كام سعر البي ام الفئه الأولى؟؟

شكرا لذوق حضرتك
الفئه الاولى ابيض و اسود ٣٠٨ الف ٣١٦ للميتاليك
الفئه التانيه ابيض و اسود ٣٢٨ الف ميتاليك ٣٣٦ الف
و دي تزيد فرش جلد صناعي و ابانوس في التابلوه و حليات نيكل و بارك سينسور خلفي و مرايات ضم و عجلة قياده رياضيه