الموضوع: الدركسيون تقيل خصوصا على الآخر

فيه احد الاعضاء كان عنده مشكله وكتيها في المنتدى وهي انه لما بيجيب الدركسيون على الآخر بيتقل وراح للعفشجي وغير علبة الدرسيون ومظبطتش رجع اشترى واحده تانيه وجاب طرمبة باور ومفيش فايده برده وكان بيسال يعمل ايه
المهم المشكله دي كانت بدات تظهر عندي من كام يوم كنت ملاحظ لما اجيب الدركسيون على الاخر بيتقل وممكن يعمل صوت ولما قريت الموضوع بتاعه وتجربته مقتنعتش بموضوع تغيير العلبه قولت دي مشكلة باور لان الدركسيون شغال وبيلف على الاخر سواء فيه باور او لا المهم روحت للعفشجي من شويه وقولتله على المشكله وكان عندي تحت العلبه الخراطيم معرقه زيت باور المهم فك علبة الزيت ورماه وجاب بنزين ونظف مكان الزيت والعلبه وبعدين ركب وظبط الخرطوم اللي كان بيسرب او بيعرق زيت بسيط وحط زيت جديد ويلف يمين وشمال الزين نقص زود زيت تاني وسابها دايره حوالي 10 دقائق ورجع لف يمين وشمال وظبط مستوى الزيت قفل على كدا وقالي جرب وكانت المفاجئه الدركسيون خفيف جدا بفرق ملحوظ ولفاته سلسه جدا عن الاول مفيش تقل خالص ولا صفاره ولا اي حاجه قالي زيت الباور لازم يتغير كل فتره حوالي 60 الف طبعا انا مغيرتوش خالص من ساعت ما اشتريتها وقالي اعمل 5000 ونكرر الموضوع دا تاني علشان ننظف الطرمبه لو لسه فيها اي شوائب وبعد كدا كل 60 او 80 الف
قولت اكتب تجربتي لو حد عنده المشكله دي علشان يعرف الحل خصوصا انه بسيط ومش مكلف ولا محتاج وقت حوالي 20 دقيقه والنتيجه ان الباور رجع زي العربيه ما كنت لسه شاريها جديده