الموضوع: للبيع نوبيرا 2

يا باشا العربيه زى الفل وياريت حضرتك تبعتلى سعرك النهائى على الخاص وفيها رخصه اد ايه وايه اخبار الرشاشات علشان اسمع ان النوبيرا والانوس فيهم العيب ده وهل العربيه رشه اى جزء خارجى واخبار تكيفها ومشكور جداااااا

العربية يا باشا فيها رخصة 3 سنين تنتهى فى 7/2011 ... و بالنسبة للرشاشات حضرتك عندك خلفية عنها و دة كويس انا مغيرها برشاشات Bmw و العربية زى الفل و تدور من اول مرة و مفهاش مشاكل الرشاشت اللى بتبقى موجودة .. و بالنسبة للتكيف انا من شهرين لسة مغير الفلتر و عملت شحن للفريون بالكومبيوتر و التكيف فعلا تلاجة و دايما اشغلة بين 2 و بعدها 1..و بالنسبة للرش انا رشت اكصدامات بس رشة نضافة لكن باقى دهان العربية ماتلمسش و زى ما هو بتاع الفبريكة .. و البطارية الجافة انا لسة جايبها من 3 اسابيع يعنى العربية مش ناقصها اى حاجة ... شوف حضرتك لو فى اى حاجة عايز تستفسر عنها تانى و السعر هنتكلم فية على الخاص

بجد حضرتك راجل محترم فعلا ومعلش حتعبك معايا فى كام سوال كده
1- العربيه بتعتك من الزيرو والا اليد الكام؟
2- ايه اخبار الاتوماتيك معاك لان ناس كتير خوفتنى من الاتوماتيك بتعها انا ابن عمى معاه واحده 2001 بس مانويل عربيه ماشاء الله عليه لكن الناس خوفتنى من الاتوماتيك حتى ابن عمى ده؟
3- العربيه عامله عداد كام بالظبط؟
4-استهلاك البنزين معاك ايه النظام يعنى بتعمل كام كيلو فى الصفيحه داخل المدينه وكام كيلو فى الطوالى؟
5- ايه اخبار العفشه معاك ؟؟
6- العربيه معاها المفتاحين الاصلين اللى فيهم زراير السنتر؟
7- السماعات البايونير اللى فى العربيه كام وات والكاسيت الاصلى بتاع العربيه؟؟
8- الفلتر الاسبور مأثر فى سحب العربيه والصوت وياريت تفيدنا مركبه بقالك اد ايه؟؟
9- معلش عارف انه سوال رخم بس معلش بقى سبب البيع؟؟

واخيرا مستنى ردك على الخاص يا باشا فى السعر النهائى الاخير وانا إن شاء الله راجع من اسكندريه يوم الخميس إن شاء الله ومش حنختلف باذن الله

يا باشا ربنا يخليك دة بس من ذوقك و ترجع بالسلامة ان شاء الله

1- العربية تانى يد كانت مع خالى و هو كان مخليها للسفر دايما و هو من كتر ما كان مهتم بيها كان نفسى فيها من زمان بصراحة :D
2- الاوتوماتك شغال زى الفل و المشكلة ان الناس كلامها كتير و عملين سمعة للعربية و كل واحد يسمع الكلمة دى يكررها مش عن تجربة و العربية طول الفترة اللى كانت معايا و قبل كدة مع خالى مفيش اى حاجة الحمد لله حصلت ناحية الفتيس و طول ما الواحد بيصون العربية و مش هاينها مش هتشوف اى مشكلة ان شاء الله و انا لسة من شهرين مغير زيت الفتيس و نفس العربية مع واحد صاحبى و دة بتاع لعب و حرق و اوتوماتيك بردة و زى الفل معاة ..
3- دلوقت العربية عاملة 54 الف بالظبط و انا مشاويرى بيها كلها على الدائرى عشان الكلية
4- استهلاك البنزين تمام اوى و انا كنت غيرت الرشاشات برشاشات BMW و غيرت سلوك البوجيهات و البوجيهات و العربية سحبها بقى احسن و بعمل بيها 185 كم جوة البلد فى الصفيحة و 220 طوالى فى الصفيحة
5- العفشة بتاعتها تمام و انا من سنة اول ما خدتها من خالى كان فى صوت طقة فى الخلف و كان جاى من المساعد اليمين و غيرت المساعدين الاتنين ورا بمساعدين kyb يابانى و باقى العفشة مفهاش اى مشكلة خالص
6- معاها مفاتيح العربية الاصلى اللى فيا الزراير بس انا ركبت انذار تانى لكن مفاتيحها الاصلية موجودة
7- السماعات اللى راكبة قدام 120 وات و ورا 400 وات و الكاسيت الكلاريون الاصلى الجى معاها و الصوت جامد جدا
8- الفلتر بعد ما ركبتة حسيت بفرق فى السحبة طبعا و صوتة لما تكبس بنزين بيدى صوت قوى و يخض :D .. لكن طول ما انت ماشى على الهادى ملوش صوت
9- سبب البيع انى عايز اغير لعربية سبور كوبية او هاتش باك و بيع العربية دى مش سهل عليا بجد عشان انا موضبها و العربية نضيفة اوى و عارف انى مهما جبت حاجة تانى مش هعمل فيها نص اللى عاملة فى دى بس اهو تغير و عارف انى هندم علية :D

حضرتك تيجى بالسلامة ان شاء الله و تشوف العربية و مش هنختلف باذن الله