الموضوع: اتثبت على الكورنيش و فاصلت الحرامى

سلام عليكم

ايوه زى العنوان بالظبط اتثبت و اتقلبت على الكورنيش مش حطول عليكم حدخل عالطول فى الموضوع

يوم السبت اللى فات 8/2/2014 كنت مسافر اجتماع فى مقر ادارة الشركة فى اسكندرية
انا اصلا شغال محاسب فى شركة فى المنصورة
ركبت قطر 5.20 الفجر من المنصورة علشان الاجتماع كان بدرى خلصت حوالى الساعة 5.30 المغرب الشركة مقرها فى محطة الرمل قلت اطلع يا واد اتمشى شوية على الكورنيش و بعدين اروح كارفور اشترى شوية حاجات و ارجع فى قطر 9.10

المهم طلعت على الكورنيش قعدت شوية قدام البحر و صورت شوية صور اللى فى الموضوع ده

http://www.nilemotors.net/Nile/405122-a.html


المهم قلت اركب الموقف الجديد علشان اروح كارفور فبسأل واحد لو سمحت اركب الموقف الجديد منين
لسه الراجل حيتكلم لاقيت واحد تانى بيقولى انت عاوز تروح فين فالراجل اللى انا سألته مشى
قلت له اركب الموقف الجديد منين ؟
قالى انت منين ؟؟ قلتله من المنصورة مرة واحده لاقيته فاتح مطواه وحاططها فى جمبى و بيقولى هات الموبايل
الموبايل بتاعى سامسونج جراند . تقريبا هو كان شافنى وانا بتكلم فى الموبايل و بعدين حطيته فى جيبى . قلتله مش حديك الموبايل انت متعرفش انا مين وممكن اعمل فيك ايه
بس انا برضه حراضيك . الصراحة اخدت حوالى ثانية تفكير قبل ما اتكلم .
انا كنت حضربه بس فكرت هل حيلحق يضربنى بالمطواه ولا لأ فقلت مش مستاهله اديله اى مبلغ و خلاص انا كان معايا حوالى 500 جنيه فى المحفظة . اديته 50 قالى هات تانى قلتله كده كفاية
اخد الفلوس وطلع جرى ركب ميكروباص
طلعت اجرى ورا الميكروباص وانا بكلم البوليس اللى رد عليا قالى هاته و تعال (ههههههههههههههههه)
المهم الحرامى نزل من الميكروباص جرى ونزل وراه اتنين قالولى هو اخد منك حاجه قلتلهم اه قالولى شكله مكنش على بعضه . الناس اللى نزلت وراه كان شكلها محترم الصراحة عموما دخلنا وراه الشارع الجانبى ملقناهوش علشان الشارع كان زحمه .
استفسار
هل كان المفروض اضربه و لا أنا اتصرفت تصرف صحيح ؟؟؟

المشاركة الأصلية كتبت بواسطة fepsceasar

حمد الله على سلامتك ..للاسف الحال كده ما يسرش.. كنت قولهم مسكت ارهابي بينفذ مؤامرة صهيو امريكية ماسونية تقودها المخابرات الدولية يمكن كانوا جم

معاك حق بس كان معاه مطواه ممكن نعتبرها مطواه نووية

المشاركة الأصلية كتبت بواسطة ahmedteam

وجهه نظرى تصرفك صحيح 100 % و فيه قدر كبير من الحكمه و سرعه التصرف و الحمد لله ان ربنا نجاك

فى داهيه ال 50 جنيه المهم انك بخير

الله يخليك وربنا ميوقعش حد فى موقف زى ده

المشاركة الأصلية كتبت بواسطة ihabyossef

حمد الله على سلامتك
والله ينور على سرعة البديهه

الله يكرمك ربنا بيسهلها

المشاركة الأصلية كتبت بواسطة miceg

50 ج ولا موبيل جراند ب 2000 ج
عين العقل
واعتبرها وقعت من جيبك ولقاها صاحب النصيب
وبال 50 شمعة دول هتاخد بيهم حسنات يوم القيامة
ابسط ياعم

قدر الله وماشاء فعل مشكور يا باشا

المشاركة الأصلية كتبت بواسطة zarif

قول الحمد لله
انت ربنا الهمك واتصرفت صح
50ج فى جزمتك وفديت نفسك ومالك بيهم

الحمد لله

المشاركة الأصلية كتبت بواسطة mody112

اولا حمد الله على سلامتك وتصرفك سليم 100*100 وفى داهية ال50 ج وحتى لو الموبايل برضد فداك
انا حصل معايا حاجة شبيهة لدى وفى منطقتنا بس على الشارع الرئيسى وكنت ماشى بتكلم فى الموبايل وفجاة لقيت حاجة جاية من ورايه وبتشد التليفون منى لكن الحمد لله لحقت النليفون ومسكته جامد لدرجة انه خربشنى فى ودنى جامد كل ده وانا لسه مش شايف فى ايه وبعدين لقيتهم اتنين على موتوسيكل وراحو طالعين جرى كل ده فى حوالى اقل من دقيقة فكرت اجرى وراهم او اركب توكتوك وكده بس الشارع كان فاضى والعيال فص ملح وداب .

اما بالنسبة لموضوع الشرطة فبصراحة كل الناس غير حضرتك بتشتكى من الموضوع ده لان انا ليه اتنين صحابى واحد من المنطقى والتانى من الشغل الاول سرقه عربيته من تحت البيت واتصلو بيه وساوموه ولما بلغ الشرطة قالوله هنبعت معاك اتني امناء شرطة على مسئوليتك يعنى لو ماتو هو اللى هيلبس تهمة ودفع 10000 ج وجابها اما التانى فثبتوه على الطريق الزراعى وهو جاى الشغل الساعة 7 الصبح والدنيا زحمة ونزلوه من العربية وكانو عاوزين ياخدو منه الموبايل لكن هو مرضيش قامو ضربينه بضهر الرشاش فى صدره وبعد كده ضربو نار على الارض عشان يبعدوه عن العربية ويخوفو اى حد يفكر يعمل اى حاجة تانية ولما راح يبلغ لقاهم نايمين فى النقطة ولما صحيو قالوله انت هتتعرض على النيابة وهو ده اللى عندنا وطبعا اخد بعضه ومشى وفى الاخر دفع 25000 ج .والحادثة الاخيرة بتاعت الدكتور المرحوم احمد عمارة على المحور خير دليل على انتشار البلطجة عن حدها المعقول والادهى انى مشيت على المحور بعدها بيومين ومفيش حتى عسكرى مرور واقف.
كان لازم تقولهم على الحرامى اللى مسكته انك مسكت ارهابى اخوانى عامل مظاهرة ورافع اشارة رابعة كانو هيجو على طول .( للاسف بقى هو ده الحل الوحيد )

معاك حق . فعلا الداخلية مش فاضيه لحاجه غير المظاهرات والاخوان وده الفشل انهم يسيبو البلطجية و يمنعو الناس انها ترفع رابعة

المشاركة الأصلية كتبت بواسطة kar!m

أحسن تصرف عملته بصراحه .. انت فلوسك حلال.

الحمد لله