متابع باهتمام
عرض للطباعة
متابع باهتمام
انا اقصد شفاط مش شداد لا مؤاخذه الشفاط هو حاجة كده عامله زي ولاعه السجاير ف الشكل بتشدها كده وهتلاحظ ان دواسة البنزين نزلت شوية كده وده عامة عبارة عن ميكانيزم جوة الكربراتير بتكون بالكهربا او يدوي
وظيفتها
بتخنق مسار الهوا وبترفع بكرة الاكسراتير سنة صغيرة زياده
كل ده عشان الموتور يدور بسهولة وهو بارد
بحيث يبقى نسبة البنزين للهوا اعلى شوية
لان الموتور وهو بارد بيبقى محتاج بنزين اكتر وهواء اقل ( البنزين بيكون في حالة سائلة وبيتكثف على جدران البستم وبيكون صعب الاشتغال )
السيناريو بيكون كالتالى ، والعربية باردة الصبح ، بيكون في ازدواج حرارى في وضع منكمش ، الوضع المنكمش بيخليه يقفل الخانق (الشفاط) ويعلى السلانسيه والعربية تدور بسهولة
اول ما العربية تسخن الازدواج الحرارى متوصل بسخان كهربا و بيتمدد وده بيخلى الخانق يفتح تدريجيا والسلانسيه يرجع طبيعى
طبعا لو فضل الشفاط مقفول هتكون النتيجة ان العربية مكتومة وهى سخنة ( لان هى دى وظيفته اصلا ) بالاضافة للاستهلاك الزيادة للبنزين لانك بتضطر تدوس بنزين اكتر لتعويض نقص الهوا
طبعا اكيد في اشكال تانية للشفاط الاوتوماتيك في العربيات المختلفة ( مش شرط تكون فكرته ازدواج حرارى في كل العربيات )
بالنسبة للى بيكون يدوى بيبقى عبارة عن مفتاح شدة زي زرار فتح الشنطة مثلا ، متصل بسلك زي سلك الاكسراتير بيقفل ويفتح الشفاط يدويا وبتقفله الصبح قبل ما تدور العربية واول ما العربية تسخن وقبل ما تتحرك تفتحه
هو لو فى عربيه الفتيس بتاعها فيه عضه على التالت وبيقول من الغويشه
يبقى تصليح الموضوع دا مكلف ولا ايه وهل تاثر على العربيه
ماهو ده اللي هيحصل هتحل الفتيس وبعدين ييجي واحد بتاع فتايس يفتح الفتيس ويشيل الغويايش حضرتك عارف الست اللي تبقي لابسه 6 غوايش ده نفس الكلام يعني لو الغيار الثالث هو اللي بيعض وبينطر الغيار اول ماتجيبه ويرجع للمور تبقي غويشة الثالث بقيت ناعمة وعايز تتغير فهيفك غويشة الاول والثاني عشان يوصل للثالث ويغيرها وهكذا ف باقي الغيارات يعني عشان يوصل لغويشة غيار لازم يفك غوايش الغيارات اللي قبلها فده بالذات محتاج واحد خبره عشان مايعكش الدنيا اما الاسعار العبيطه اللي انا كتبتها فوق دي توفعات وبعد السؤال اكتشفت ان الغويشة ب 120 جنية ولسة هتحط زيت ما لايقل عن اربعه كيلو وبالمره وانت فاتح الفتيس لو في بلية خشنة غيرها لو الديسك والاسطوانة قربوا يخلصوا غيرهم هو الواحد بيحل الفتيس كل يوم بالنسبه للراي ف انك تشتري واحد جديد ولا تصلح انا شايف ان موضوع الاستيراد ده زي البطيخه انت وحظك لكنة افضل لانك بتاخد الحاجة وليك اسبوع علي الاقل تجربها فيه ولو فيه اي حاجة يرجعله وتاخد فلوسك انما التصليح الخوف انك تقع ف واحد كنفنجي يعك ف العربية ويقولك ماليش دعوه فانا شايف ان لو الميزانية تسمح هات واحد استيراد احسن من وجع الدماغ مع الصنايعية هو هيتراوح ف رينج ال 500 حسب الحاله والتاجر وخاصة لوجبت حاجة فيات زي بتاع ال 131 ال خمسة غيار بعيدا عن الفتيس ياسلام لو مستقبلا تجيب مكنة ال 132 بالفتيس اللي هي 2000 سي سي 2 كامة صراحة سافله ف الجري وسفاحه بنزين بس هتحتاج تعديل فرامل ودوشة تانية خالص ده لو حضرتك من هواه الجري
انا النهارده روحت شوفت واحده موديل 86 وروحت من غير ميكانيكى ولا اى حاجه انا قريت شويه فى المواضيع ازاى تشترى عربيه لوحدك وكان الناتج كالتالى
العربيه من بره واقفه على حيلها والدهان الخارجى جيد جدا
العربيه مفهاش بارومه غير فى الدواسه وجزء بسيط فى الشنطه
الموتور صوته حلو ولما تكبسله بنزين بياخده عادى
الصالون ماش الحال
التابلوه الرج بتاعه الباب بايظ ومكان التسجيل فاضى والكونسول فى اماكن فاضيه ومفيش ولاعه والجزء تحت الدركسيون باين فيه حته مكسوره
عصاية الفتيس معلهاش كسوه والفتيس فى عضه فى التالت
فرش الابواب جيد
الباب بتاع السواق اول ما تفتح يفتح حته صغيره بعدين تزقه علشان تفتح على الاخر تلقيه عمل طقه وانفتح
الشكمان لما خليت واحد يزود وعطيت ايدى عليه لقيت ايدى اتهببت هباب ممزوج بسائل خفيف
مفيش استبن
العربيه مبتدورش الا لما اكارك
المساعدين كويسين بس اللى قدام لما اتك عليهم تحسهم ناشفبن
ده كان اجمالى اللى قدرت عليه وعرفته وكنت عاوز اعرف تقيمكم وخصوصا صديقى استاذ احمد حسنى
لان انا بفكر فيها بس موضوع الشكمان والتابلوه والكونسول دا مضايقنى شويه فهل دا موضوع ولا ايه
ورايكم تعمل كام
الله يكرمك ياباشا ده بس من ذوقك نبتدي حاجة حاجة مبدايا البارومة دي لو علي كده بسيطه مافيش حاجة مقلقه اخبار حوض الموتور والقوايم و الحته اللي عند كاوتش البربريز الخلفي ايه ؟ الحتت دي مهمه جدا ثانيا الشكمان لو لسة بارده عادي الاهم من كده مافيش دخنة من الشكمان ظاهره مع كبس البنزين ثالثا العضة لازم تعرف سببها ايه هل ماكنتش دايس دبرياج للاخر او الدبرياج كان واطي شوية وياريت برده لو كان حد بص علي زيت الفتيس رابعا هل جربت تمشي بيها شوية ؟ لو جربت هل سمعت صوت ونة بتزيد مع السرعات او تخبيط او تزييق بعد ماتاخد مطب خامسا سيبك من التابلوه وعصاية الفتيس والكاسيت دول موضوعهم سهل بس اخصم تمن التابلوه وتمن الاستبن من سعرها وبرده حضرتك ماذكرتش قال علي كام ؟ بس علي فكره انا من رايي لو تعرف ميكانيكي امين الافضل توريهاله عشان يبصلك علي الدواخل صح وباقي الحبشتكانات دي
اه نسيت برده بالنسبه للتابلوه ده امره سهل تابلوه البولونيز تسعينات في عزبه شلبي ب 350 جنية بس اتاكد انه نفس فيش العدادات اللي عندك