الموضوع: تقرير مفصل عن الفلوانس 2014

السلام عليكم ورحمه الله
تقريري عن الفلوانس فيس ليفت الفئة الثالثة فتحة سقف وسنسور خلفي اللون موكااااا


في البداية أحب أن أوجه الشكر الى أعضاء قسم رينو وخصوصا ملاك الجميلة فلوانس
كنت بدخل على مواضيع كل واحد وأشوف سلبياته وإيجابياته عن العربية دي ...
وأحب أشكر أخويا أستاذ حاتم saint 2011 على تعبه معايا وقت إلاستلام والذي ظل معي فترة كبيرة جدااا
بدأت الرحلة في البحث عن سيارة تكون خلفا للصني وده بقاله فترة كبيرة جداااااااا
لدرجة إني زورت معظم أقسام المنتدى
من تويوتا – لبي إم – لمرسيدس – لستروين – لبيجو – ل رينو - ل أوبل – ل هيونداي – ل هوندا – ل كيا ......الخ



العربية القديمة هي صني أوتو 2010 وبأمانة هي فالجراج من ساعة ماستلمت
وماشي بالفلوانس من غير رخص لغايت دلوقتي
[COLOR="rgb(139, 0, 0)"]تقييمي للسيارة :-
أولا الشكل الخارجي :-
مقدرش أقول غير إن دي أزواق
لاني كنت محتار بين الكورولا والفلوانس وشوية الاسترا
ثانيا :- ألانتريور والصالون الداخلي
قعدت فالكورولا وقعدت فالفلوانس
والقعدة شدتني أكثر فالفلوانس
عجباني خامات التقفيل فالفلوانس أكثر والشياكة في إستخدام ألاوبشنز
بإستثناء أماكن ألأكواب مش عجباني نوعا ما
لكن دعونا نتكلم عن إلاضاءة الأمامية وألاضاءة الخلفية ولوحة العدادات
ماشاء الله وهم
ناقص إنك تجيب سواق وتخلص Tasks بتاعتك وانت راكب جوه العربية
* الكاسيت بقا مشروع تاني :- انا عارف يعني إيه ساوند سيستيم لإني شغال في ألانظمة ألامنية وال Light Current
انا مركب فالصني نظام صوتي سماعات دوبل بيز وكاسيت بايونير وجي إم بايونير والموضوع مكلفني حوالي 2500 ج
ومحدش بيسمع السماعات عندي غير لما بيتوهم بمعنى الكلمة لدرجة إني فكيته من الصني قبل ماستلم وقولت أكيد ألاستوك بتاع الفلوانس مش هيبقا كويس
لكن فالفلوانس :-
الصوت حاجة تاني خالص نقاوة مع علو رائع بمعنى الكلمة
التحكم في الكاسيت من الطارة روعة وانت المالك ألاساسي لكل شيء
اعتقد عشان يتعمل الساوند سيستيم ده فمصر هيكلف مش أقل من 5000 جنيه ومش هيبقا زي اللي فالعربية
• التكييف ياجدعان ماشاء الله في قمة الجماااااال وانا كنت راكب صني وهي معروفه بطبيعتها ان تكييفها ثلاجة ....
• فالفلوانس :- ماشاء الله ثلاجة أخرى ضيف عليها كمان الهواء الذي يأتي من أسفل الرجل .
• بالنسبة للفوجات والفوانيس ألأمامية والليدات جميله ماشاء الله ضيف عليهم كمان إمكانية رفع أو خفض الفوانيس والتحكم في توزيع إضاءة الفوانيس
بالنسبة للقيادة :-
في البداية طبعا لما استملت انا عارف ان ضغط الكاوتشات بيبقا غير مظبوط بالمرة
فولت ألاول وبعدين ظبطت ضط الكاوتشات 29 خلفي و 32 قدام زي مامكتوب عالقايم
وبرضه ألاحظ ان العفشة ناشفة نسبيا وغير سلسة عكس قول الكثير من إلاعضاء الكرام
النهاردة بعد الظهر رحت بردجيستون اللي فبنزينة توتال قبل التجمع الخامس عالدائري
فضيت الهواء كله وخليت العجل كله نتيروجين
الموضوع فرق جدااااااا وبقت الراحة والعفشة أحسن وأحسن
الموتور والفتيس ال cvt : -
الموتور قوي جدا سواء مشغل التكييف او طافيه والسرعة وصلت ل 160 وبعدين قولت لما أكسر ال 1000 كيلو هلعب شوية
التسارع بتاع السيارة ممتاز والسر في الضغطة على البنزين
الثبات تحفة
المناورات : مش عارف أحكم عليه لإني ملتزم الأدب مؤقتا لغايت ما أرخص واللي غلطان في السواقة يحاسب
بالنسبة للفتيس :-
إيه إلاحساس ده أولا مافيش حاجة إسمها نقلات ولا نتشة فتيس ولا الكلام الغريب اللي بنحسه فعربيات الفتيس اوتوماتيك العادي كتير
أسلوب قيادته مختلف ومحتاج تعود من وقت لإخر
وضعيه السواقة :- انت كاشف الدنيا وشايف الكبوت بتاعك وأبعاد الطريق وبختلف مع الناس اللي بتقول انها مش عارفه تاخد على أبعاد العربية
كرسي السائق بيتم ظبطه للأسفل وألاعلى وللامام والخلف طبعا وكمان فيه أوكرة جانبية لعمل دعامه ونفخ الكرسي او للإلغاء
اللون : الموكا – من وجهه نظري هو الورقة الرابحة في السيارة دي الكل لا يعرف اللون الحقيقي للسيارة في مختلف ألاوقات
تكاد سوداء الون – وبتنجاني – وموكا في الشمس الساطعه –نبيتي – ورمادي في الغمام أو لو العربية عليها تراب لدرجة إنها كانت راكنة أمام المعرض وكنت بقول عليها مش دي اللي هستلمها
الأوف وايت جميل جداااااا أيضا وكانت راكنة جمب أختها وكنت حاسس ان الموديلين مختلفين نظرا لأن اللون ألابيض مدي فخامة أكثر لإنه مكبر العربية بس ملفت جداااااا للنظر وربنا يكفيكو شر العين


السلببيات من وجهه نظري :-
الرؤية الخلفية ضعيفة نظرا لإرتفاع السيارة من ألاعلى ..
المرايات الجانبية بالرغم إنها ممتازة لكن على الحواف في نسبة تقريب وإنعكاس لدرجة ممكن تخليك تتزاول ان في حد لازق جمبك وهو في ألاصل بعيد عنك (( مش عارف لو حد لاحظ الموضوع ده ))
وجهه النظر أن الفرش ناشف شوية ده طبيعي :- زي ماتشتري أنتريه ويكون ناشف في البدايه وبعدين الفوم ينضغط ويصير أطرى مع الوقت
عندي مشكلة مبدأية في الزواياااا والعربية بتحدف بسيط فالطرق المستوية وده مش عارف أظبطه في أول صيانة ولا أشوف بريدجيستون واعمل زوايا وترصيص . .
ملحوظة : - انبهاري بالسيارة لا يعني بإن السيارة هي رقم 1 في العالم ولكن أتحدث عن السيارة مقارنة بالسيارات اللي ركبتها
على سبيل المثال :- راكب البي إم او المرسيدس لا ينبهر بالفلوانس او الفئات السعريه المحيطة حولها ممكن ينوله إعجاب بيها كسيارة ولكن لا يزيد عشقا بمعنى أصح

ويارب أكون قدرت أفيد حضراتكو ولو فيه عيوب ظهرت أكيد هذكرها هناااااااا

المشاركة الأصلية كتبت بواسطة هانى القناوى

الف مبروك يا باشا وربنا يكفيك شرها ويدك خيرها

بس فى حاجه انا مش فاهما فى جزء السلبيات اللى بتقول فيها

ملحوظة : - انبهاري بالسيارة لا يعني بإن السيارة هي رقم 1 في العالم ولكن أتحدث عن السيارة مقارنة بالسيارات اللي ركبتها
على سبيل المثال :- راكب البي إم او المرسيدس لا ينبهر بالفلوانس او الفئات السعريه المحيطة حولها ممكن ينوله إعجاب بيها كسيارة ولكن لا يزيد عشقا بمعنى أصح

تقصد ايه مش فاهم ياريت توضحلنا ؟؟!!

والف مبروك للمره الثانيه

الله يبارك فيك
اللي أقصده ان لو واحد كان معاه فيات 128 او 131 ولسه جديد فالسواقة وجاب فيرنا او لوجان وخلافه
هيحس بنقلة رهيبه جدااااااااا وهيقعد يقول كلام عاطفي عن سيارته بشكل يخلي غيره يقتنع
الشخص اللي ممكن يقتنع يحيب العربية وبعدين يلاقي صاحبنا أداله وصف وحجم للسيارة أكبر من حجمها الطبيعي لانه مكنش بادىء من الصفر زي الراجل ألاولاني . وهكذا
نفس الكلام كلامنا ده ممكن يشوفه ناس فقسم مرسيدس أو bm وجوه نفسه يقول الناس دي غلابه
يارب تكون وجهه نظري وصلتك

المشاركة الأصلية كتبت بواسطة هانى القناوى

معلشى ياباشا انا تهت شويه هههههههههههههه
انا معاك ان لو واحد كان راكب فيات 128 وجاب فيرنا هيحس طبعا بنقله كبيره ويمدح فى الفيرنا ويقول اشعار
بس حته المرسيدس والبى ام مش فاهمها شويه
حضرتك انا فى حيره من شهووووور بين
مرسيدس عيون e200 من اول موديل لحد 2000 ودخل معاها ال c200 و c180 موديلات من 2004 الى 2007
وبعد كده دخلت على ال s320 موديل من 96 الى 98 ( الشبح )
وبعد كده دخلت على البى ام الفئه الخامسه 523 موديلات 2001 الى 2002
وبعد كده عرفت الفلوانس الشكل الجديد وعجبتنى
وبعدها عرفت الاوبل كوزمو وبرضوا عجبتنى
وبعدها الكورولا وبرضوا عجبتنى
وفى الاخر ماعرفتش اختار كل عربيه ليه ميزه وعجبانى ومش عارف اختار

(يعنى دلوقتى اللى راكب المرسيدس والبى ام يجى يغير ويركب الفلوانس هايحس انها اقل من المرسيدس والبى ام ؟؟ ولا ايه ؟؟)

والف مبروك للمره التانيه وربنا يبعد عنك العين (الحاقده والحاسده )

ولا يهمك ياهاني باشاااااا
بص ياريس هل شعورك لما تركب مرسيدس وبعدين تركيب كاتوجري أقل زي ماتبدأ بالكاتوجري ألاقل وبعدين تركب المرسيدس
هو ده إللي أقصده
إنما الفلوانس رائعه بمعنى الكلمة
بتجذب إلانتباه بشكل خطير ومش قارد أقولك القعده عاليه ومريحة
لغايت دلوقتي مش قادر أخد راحتى فالسواقة لغايت ما أرخص
وأول مارخص هنزل الصعيد وتحديدا أسيوط
كي أعيش التجربة بشكل أكبر وأجرب التسارع والمناورات وإستهلاك البنزين الخ
بس صدقني لو بتفكر في النقلة بجد الثلاث عربيات اللي انت ذكرتهم هيحسسوك بالنقلة
وإن كنت بفضل الفلوانس لعلوها الغير عادي عن ألارض عن الموديلين اللي انت ذكرتهم