الموضوع: مطلوب مساعده من الاستاذ Mohamed Hany

المشاركة الأصلية كتبت بواسطة eng.mohamed

مساء الخير ا محمد ... انا بحيره شديده بين كورولا 2014 الفئه الثانيه المعدله ورينو فلوانس هاى لاين علما بانى مايل للفلوانس اكتر لانه كان معايا كورولا 2014 ولكن الفئه الاولى كانت واطيه جدا وكمان مفهاش اوبشن وايضا كان معايا فلوانس e3 السياره بجد رائعه لوجود الاوبشن ...... فما رأى حضرتك انا سمعت ان الكورولا بعد التعديل اصبحت افضل من الدفعات الاولى .... اسف للاطاله وتقبل تحياتى

بشمهندس محمد,,
انا اسف اني اتاخرت عليك في الرد.
كورولا 2014 كانت واطية فعلا, بس دلوقتي اتعدلت وبقت زي الفل و الناس اللي استلمو مبسوطين و مفيش اي مشاكل حتي الان.
لو عاوز تركب كورولا و تتبسط يبقي من الفئة التانية ليييه:
لأنها افضل قيمة للفلوس يعني
هتزود 10000 جنيه و هتاخد زيادة :

1.مثبت سرعة
2.تكييف أوتوماتيكي Dual Zone
3.تحكم بالنظام الصوتي والتليفون من عجلة القيادة
4. Bluetooth
5.راديو 6CD سماعات + مدخل USB+AUX
6.ضبط مستوى الاضاءة الامامية
7.كاوتش مقاس 55/16 205 R(جنوط سبور )
8.حساسات ركن امامية وخلفية
9.خاصية الركن التلقائى Park Assist
10.فوانيس شبورة أمامية وخلفية
11.مرايا كهرباء قابله للطى

فمع احترامي مقارنة كورولا الفئة الاولي مع فلوانس الفئة الهاي لاين !! غير عادلة عشان قلة اوبشنز الفئة الاولي , مع التحفظ ان الكورولا بها esp و trc من اول فئة مانيوال مش موجودين في الفلوانس هاي لاين و دول يسوا كتير قوي في نظري.

نيجي بقا لنقطة الكورولا الفئة التانية و فلوانس الهاي لاين, انا هقولك كل واحدة بتزيد ايه عن التانية و انت الحكم ليك

فى الكورولا الفئة التانية هتكسب الاتى عن الفلوانس هاى لاين

1.نظام الثبات الالكتروني ESP
2. TRC للثبات
3.حساسات ركن امامية و جانبية
4.اوتوبارك ,خاصية الركن التلقائي
5.قوة الموتور علي الاقل في الطلعة تحت 60 كم اقوى, بموتور 122 حصان مقابل 115
6.سبورت موود بالفتيس
7.تابلوه لونين اسود في بيج
8.نظام ايكو لتوفير البنزين مع امكانية التحكم به
9.سخانات مرايات بزرار منفصل
10.كاوتش بريدجستون v سرعة 240 كم/س مقابل 210 كم/س للفلوانس قوة احتمال اعلي
11.استبن نفس المقاس و جنط سبور مش حديد بعكس الفلوانس
12. وزن العربية 1300 كج مقابل 1258 للفلوانس
13. الوسع الداخلي اوسع سنة بسيطة عن الفلوانس خصوصا في الخلف لاتساع شنطتها.

14. الكورولا 5 نجوم و الفلوانس 4 نجوم في مواصفات السلامة و الامان الاوروبية علي الطريق Euroncap
15. اضواء نهارية DRL

فى الفلوانس هاى لاين هتكسب الاتى عن الكورولا الفئة التانية:

1.وحدات رفع للاربعة زجاج مع الكارت الذكى او بصمة اكرة الابواب فى الفلوانس و بتقفل الاربع زجاج مع بعض و كمان بتضم المرايات و بتقفل فتحة السقف و الكاسيت و الاضواء.
2.مفيش غير زجاج السائق فى الكورولا اللى بيشتغل طلوع و نزول لمسة واحدة و ده موجود فى الاربعة زجاج فى الفلوانس مع خاصية أمان الأطفال anti pinch و هى نزول الزجاج لأسفل فى حالة اصطدامه بعائق موجوده فى الاربعة زجاج و فتحة السقف.
3.ضم و فتح المرايات مع الغلق و الفتح و الكارت الذكى او تشغيل السيارة .
4.زينون في الفلوانس بضبط مستمر اتوماتيكى للارتفاع باربع حساسات
5.فتحة سقف فتح و امالة و غلق مع البصمة و الكارت
6.٣ ستائر مدمجة داخل الابواب و الزجاج الخلفى
7.مخرج تكييف خلفى
8.مخرج ١٢ فولت خلفى للركاب الخلفيين
9. شنطة٥٣٠ لتر فى الفلوانس مقابل ٤٦٠ لتر
10.حلية شكمان من النيكل كروم
11.تانك بنزين سعة ٦٠ لتر فى الفلوانس مقابل ٥٥ لتر فى الكورولا
12. 8way audio
13.عدد 6 ايرباج
14.مفتاح ذكي

القرار يرجع ليك, العربيتين ممتازين جدا بس انا برجح الكورولا عشان الموتور و ال Esp و ال Trc و طبعا اعادة البيع

المشاركة الأصلية كتبت بواسطة insurancebroke

الله ينور عليك في الشرح والتوضيح
وشكرااااااااااا علي المجهود

اشكرك يا باشا علي الكلام الجميل

المشاركة الأصلية كتبت بواسطة eng.mohamed

شكرا جزيلا أ محمد على ردك المحترم الوافى .... عندى استفسار اخر فى وجهة نظرى المتواضعه ان اللون الفيرانى من افضل الالوان فى الكورولا لكن ايه راى حضرتك فى التابلوه لونين اسود وبيج ولا اجيب الفيرانى تابلوه لون واحد لان السياره بتنزل كده .... ولا اجيب مثلا لون اسود وتابلوه لونين ... بعتذر للازعاج

تحياتى لحضرتك واتمنى ان نتحدث هاتفيا لانى ان شاء الله هشترى اليوم

انا رقمي موجود في المنتدي لوحابب تكلمني.
بالنسبة للتابلوه انا شفت الاتنين و عجبني البيج في الاسود جدا و مدي شكل فخم بصراحة، و ده ميقللش من الاسود فهي ازواق وانا فضلت البيج.
خد بالك من الفئة التانية في عربيات بتنزل تابلوه اسود وفيه عربيات بتنزل بيج، فتاكد قبل متشتري لا ن حسب معلوماتي الفيراني تابلوه اسود و الاسود تابلوه لونين.

المشاركة الأصلية كتبت بواسطة eng.mohamed

شكرا جزيلا لسرعة رد حضرتك وسعة صدرك .... توكلت على الله ودفعت الفلوس الان الفئه الثانيه لون فيرانى وطبعا التابلوه اسود .... وأشكرك مره اخرى

على فكره اللون الفيرانى بجد اسطوره بس للاسف مبينزلس غير بتابلوه لون واحد فقط .

مع تحياتى

بصراحة الوانها محيرة جدا جدا و الفيراني ملوش حل و هو بيلمع.
الاحمر برضو شوفته رائع مع الفرش البيج.
الف الف مبروك و هستناك في المقابلة يوم الخميس انشاء الله

المشاركة الأصلية كتبت بواسطة walyamw

عندي سؤال عن مسوجر الدريكسيون في كورولا 2014
مساء الفل يا مهندس محمد والف شكر لك علي كل مشاركاتك الهايلة ومعلوماتك الوفيرة وتجاربك عن العربية واللي كان ليهم الفضل بعد ربنا سبحانه وتعالي في أني أختار وأشتري الكورولا 2014.الغير معدلة .

لاحظت في عربيتي(كورولا 2014) ان مسوجر الدركسيون لا يعمل الا اذا لفيت الدركسيون لآخر اليمين أو نص لفة الي الشمال علي عكس المعتاد في كورولا 2004 اللى مسجورها بيشتغل من لفه بسيطة يمين او شمال.
يا تري كل الكورولا 2014 كده ولا عربيني فيها مشكلة؟ا
فيدوني جزاكم الله خيرا...


ملحوظة: انا جربت الكورولا 2014 المعدلة في التوكيل وكان المسوجر بيشتغل من لفه بسيطة يمين او شمال فهل انت عربيتك اللي مش متعدلة كده ولا ارجع للتوكيل يصلحه وشكرا

مش فاهم قصد حضرتك، هل تقصد لو بطلت العربية و جيت تلف الدركسيون هتعشق بعد كام لفة؟
لو ده السؤال فانا لازم اجرب و اعتقد صعب قوي تلف الدركسيون و العربية مبطلة عشان مبيبقاش فيه باور و بتبقي تقيلة جدا.