عاوز اشتري فوكاس و محتاج رأيكم

**teefa1985** · 23-02-2014 11:39 AM

السلام عليكم و رحمة الله وبركاته

اخيراً ربنا كرمني بمبلغ محترم و دورت في حدود المبلغ ده لقيت احسن اختيار هو الفوكاس 2004-2007
فعاوز اخد رأيكم انا اخري 85000 ده بعد ما اكون جبت اخري اوي بس في نفس ذات الوقت عاوز اركب عربية نضيفة اوتوماتيك و امكانيات و قطع غيار متوفرة و سعرها مناسب و حالتها كويسة
ياريت لو حد قدامه حاجة يقولي و شاكر ليكوا مجهودكوا و يارب انضم ليكوا

**ibrahiiimooo** · 23-02-2014 08:02 PM

بص يا سيدي الفوكاس ٢٠٠٤_٢٠٠٥ لها شكل مختلف عن الفوكاس ٢٠٠٦_٢٠٠٧ و الاتنين عربيتين مختلفتين تماما
الفوكاس ١ عربية لو حالتها كويسة تبقى عربية مالهاش حل ثبات و نعومة و قوة و تسارع لكن عيوبها انها مش عربية فخمة يعني العزل بتاعها سيء و الاوبشن بتاعها مش كتير لكنها عربية جراية و اعتماديتها اكتر من فوكس ٢ بمراحل و مشاكلها و اعطالها قليلة قوي و قطع غيارها زخيصة و مترمية في الحرفين و عند بتوع قطع الغيار الاستيراد
الفوكس ٢ حوار تاني عربية اوسع و اعرض و فخامتها عالية اوي و عزلها جامد تمتلك نفس الثبات و النعومة و لكن اهدا كتير من فوكس ١ و اشيك و تحس انها عربية غالية قوي بس الحلو ما يكملش تسارعها اقل من فوكس ١ لانها اتقل كتير بنفس المتور و مصاريفها م و مشاكلها اكثر بكتير من فوكس ١ بس الصراحة عربية بشوات
طبعا لو هاتجيب فوكس لازم تكون حالتها كويسة و مكشوف عليها كويس و الا حاتطلع عينك

**teefa1985** · 23-02-2014 09:14 PM

طيب متوسط سعر كل موديل فيهم كام؟
ومعلش كمان سؤال، بما انيي جديد علي الفوكاس فانا مش عارف مستويات الكماليات و اسمائهم يعني وانا بادور لقت جيا و baseline و انا مش عارف فرق الامكانيات بينهم ايه
معلش طلب أخير، لو حد عاوز يبيع عربيته يقولي

**ibrahiiimooo** · 23-02-2014 10:01 PM

بص يا سيدي الفوكس ١ متوسط سعرها من ٥٥ الى ٦٥ الف حسب الحالة و الموديل و كل العربيات الي موجودة في مصر لها نفس الاوبشن و هو العادي بتاع عل العربيات تكييف و باور و سنتر و زجاج و مرايات كهربا و وحدات رفع و abs ,ebd و ايرباج واحدة للسواق
اما بقى الفوكس ٢ ففي فروق كبيرة بين الفئات طبعا البيزك اقلهم و فيها اللي فات اما الجيا اعلاهم و فيها فتحة سقف و مثبت و فوجات و تكييف تتش ديوال زون و اربعة ايرباجو و فرامل ورا ديسكات و سعرها من ٦٦٠٠٠ لغاية ٨٠٠٠٠ حسب الاوبشن و الحالة

**teefa1985** · 24-02-2014 08:33 AM

طب معلش حضرتك بتقول ان في فرق كبير بين الاعطال و قطع الغيار بين فوكاس 1و 2 طب ممكن اعرف الفرق ده اد ايه و هل قطع الغيار متوفرة للاتنين بسهولة و رأيك ايه ادور في فوكاس 1 ولا 2 مع العلم اني مش فارق معايا موضوع الجري و الكلام ده الواحد عقل وبطل جري بس بادور علي حاجة شيك و مريحة و عائلية و امكانيات و تعيش وتعمر
وشكرا لتعاونك

**ibrahiiimooo** · 24-02-2014 06:34 PM

الفوكس ٢ فيها كل الي انتا عايزة بس قطع غيارها اغلى من قطع غيار فوكس ١ لكن متوفرة برده و بيركبلها حاجات كتير من فوكس ١ حتى ان الميكانيكية لما بيغيرولها ماتور و فتيس بيركبوا ماتور و فتيس فوكس ١ لانهم زي بعض تقريبا

**AhmedNaeem** · 24-02-2014 06:42 PM

بعد اذن صاحب الموضوع بالنسبة لفوكاس 2009 ايه اخبار قطع غيارها واسعارها ايه .؟

**ibrahiiimooo** · 24-02-2014 06:46 PM

الفوكاس ٢٠٠٩ يفرق فيها فقط تغيير شكل الفوانيس و الجزء المتوسط من التابلوه اللي فيه الكاسيت و مفاتيح التكييف و اسعارها بتوصل لي تسعينات حسب الاوبشن و الحالة

**teefa1985** · 24-02-2014 10:00 PM

المشاركة الأصلية كتبت بواسطة ibrahiiimooo

الفوكس ٢ فيها كل الي انتا عايزة بس قطع غيارها اغلى من قطع غيار فوكس ١ لكن متوفرة برده و بيركبلها حاجات كتير من فوكس ١ حتى ان الميكانيكية لما بيغيرولها ماتور و فتيس بيركبوا ماتور و فتيس فوكس ١ لانهم زي بعض تقريبا

طب مفيش مقارنة بين اسعار قطع غيار كل موديل فيهم لأني باحسبها كتكلفة ادور علي فوكاس 2 عشان الامكانيات فيها اعلي و اشيك ولا اشتري الفوكاس 1 عشان علي اد الايد في سعرها و سعر قطع غيارها
دلوقتي انا عرفت متوسط سعر كل موديل فيهم فاضل اعرف متوسط سعر قطع الغيار في كل موديل منهم عشان اقرر فياريت مساعدة في الموضوع ده

**ibrahiiimooo** · 24-02-2014 11:14 PM

يعني ببساطة تمن قطعة الغيار في الفوكس ٢ قد مرة و نص او مرتين سعر قطعة الغيار في فوكس ١ بس كمان عمر قطع الغيار في فوكس ٢ طويل اه بس اقل شوية من عمر قطع غيار فوكس ١ ( يعني بالبلدي مستهلكه لقطع الغيار اكتر)