تعديل الفوانيس الى ليدات والباغة الشفافة

**medo mahdy** · 24-02-2014 02:26 PM

بسم الله الرحمن الرحيم
السلام عليكم ورحمة الله وبركاته

انا عضو جديد بالمنتدى بس كنت متابع معاكم من من زمان شوية وكنت مهتم اوى بمواضيع تعديل الفوانيس الى ليدات وفعلا قررت ابدأ فى الموضوع دا
ونزلت جبت الليدات والبوردة والمقومات وجميع الادوات الاساسية اللازمة لتعديل الفانوس وبعد ماجبتهم كنت فى غاية غاية الفرحة ولكن........... يافرحة ماتمت
مش عارف افك الباغة من على الفانوس حاولت اكتر من ساعة انى افكها بطريقة *** انى اسخن سكينة رفيعة واسخن السليكون من بعيد على النار
وارشق السكينة بين الباغة والفانوس وفعلا فكين جزء من غير مشاكل والجزء الثانى كان فيه شفة كدة ومينفعش ادخل السكينة فيه بس وشرخت حتة من الباغة

وفى الاخر الباغة مش هتتشال الا لما تتكسر وياريت لو فى حد عنده حل يقول.

تانى حاجة الجزء بتاع لمبة الاستوب فيه ثلاثة سلوك وانا المفرود اخرج من البوردة اتنين مش عارف ؟؟!!
والحاجة الاخيرة لو الباغة لازم تكسر ياريت حد يقولى على واحد بيعمل الباغة الشفافة فى فيصل او الهرم او اكتوبر وتقريبا هتتكلف كام.

انا أسف انى طولت عليكما بس مفيش غيركوا اعرفة ف ادمت كل الاسئلة ليكوا

وشكرااااااااااااااا

**O.M.S** · 25-02-2014 12:10 AM

السلام عليكم

باشا الموضوع بصراحه صعب وانا مجربوا حوار انك تفك الوش بسكينه دا غريب انا عن نفسي حطيت الفانوس في الفرن بتاع البوتاجاز وحطيت تحتيه طبقات كتير قصدير وحتت خشب علشان مايسحش من سخونيه الحديد الي جوه وسيبتوا فتره صغيره وطلعتوا وانا لابس ميت جوانتي على بعض وشلت الوش بسرعه وطلع معايا حلاوه وفي طريق تاني انك تسخن بال heat gun ودي اامن بكتير من الفرن

وبالنسبه للي بيعملوا وشوش انا اعرف 2 في الحرفيين وواحد في اكتوبر لو عاوز تعرف ماكنهم ابعتلي على الخاص

**medo mahdy** · 25-02-2014 01:07 AM

شكرا ياباشا على الرد وانا هكلمك خاص

**ahmedshawky** · 25-02-2014 08:58 AM

ممكن مكان الصنايعي بتاع اكتوبر
و هو بيعمل تعديلات في الفوانيس ؟

**medo mahdy** · 03-03-2014 03:31 PM

انا بعتلك ارقام الصنايعى بتاع اكتوبر على الخاص وهو بيعدل الفوانيس

**Salamonti** · 08-03-2014 06:17 AM

تانى حاجة الجزء بتاع لمبة الاستوب فيه ثلاثة سلوك وانا المفرود اخرج من البوردة اتنين مش عارف ؟؟!!

الثلاث سلوك دول واحد أرضي واتنين كهربا..
ودول بيبقوا معمولين للمبة اتنين بول..
بمعنى ان اللمبة بتنور درجتين،
درجة إضاءة خفيفة مع النور الصغير ودرجة تانية بإضاءة أعلى مع نور الفرامل..

يبقوا التلات سلوك عبارة عن:
1- أرضي مشترك
2- كهربا مع النور الصغير
3- كهربا مع نور الفرامل