الموضوع: المصري و الدور و الانسانية

الزمن : نوفمبر 2009
المكان : تاكسي متوجه من منزلي نحو احد المستشفيات الخيرية في شبرا

كان معايا والدتي و اخويا الصغير
و آلام مبرحة عرفت لاحقا انها آلام التهاب الزايدة الدودية
بعد موجة مفاجئة و مستمرة من الآلام المبرحة و القيء المستمر , على قدر خبرة والدتي اخدتني في تاكسي لأقرب مستشفى حيث اني كنت لا اقوى على القيادة ولا المشي ولا حتى التفكير

بعد وصولنا للمستشفى اكتشفنا ان المستشفى مافيهاش قسم استقبال ...
الاستقبال في عيادة الباطنة , بالدور في الكشف عادي خالص
و رفض التمرجي يدخلني للطبيب تخطيا للآخرين في الدور خوفا منهم زي ما قال
بعد ربع ساعة الى نص ساعة من الآلام المبرحة و قيء مرتين تقريبا .... رق قلب شاب هناك للمريض صاحب الآلام اللي هو انا , و دخلني في دوره ........
و كانت النتيجة ان اغلب المنتظرين دورهم اتخانقوا معاه
"ما كلنا عيانين"
"كلنا بطننا وجعانا امال جايين للدكتور ليه ؟"

بعد الدخول للدكتور اللي شخص الالم انه التهاب حاد في الزائدة الدودية و ضرورة عمل عملية استئصالها و كتابته لحقنة مسكنة فورية
و اعتذاره بخصوص رفضه لادخالنا فورا لأن المرضى بيحتجوا بشدة على كده و بيعملوا مشاكل !!
خرجنا من باب العيادة انا و والدتي

بمجرد ما اتفتح الباب و خرجنا ... بدأ الهجوم العظيم
الشاب اللي دخلني مكانه اتزق بعيد عن الباب , و هجم عدد معتبر من المرضى اللي ماحدش فيهم بيتألم على الباب عشان يدخل في غير دوره زيه زي اللي دخل في غير دوره ده , اللي هو انا

و كانت دي اول مرة في حياتي اوصف الشعب بالقذارة رغم رفضي دايما لأي كلام زي كده
و كان موقف ما نسيتوش ابدا


كمالة قصة الزايدة و دي مش مهمة اوي , الحقنة المسكنة ما كفتش , اخدت حقنة كمان , بعدها رجعت لي قدرتي على المشي , و على التفكير
اخدنا تاكسي لمستشفى خاص محترم , و هناك دكاترة الاستقبال شخصوا الحالة انها الم في القولون و كتبوا لي دوا قولون رغم اني كنت قايل لهم اني واخد حقنتين مسكن :)))))))))))))
و تاني يوم الصبح مع اول احساس خفيف بعودة الالم تاني - مع انتهاء تأثير المسكن - اخدنا بعضنا و طلعنا على مستشفى خاص محترم تاني و عملت عملية استئصال الزايدة هناك

الموقف ده افتكرته و انا باكتب الموضوع بتاع عربية الاسعاف
عمار يا مستشفيات مصر
و عمار يا اخلاق المصريين

المشاركة الأصلية كتبت بواسطة samyyousef

ما الذي ازعج هؤلاء في انك اخذت دور انسان...هل هذا عطلهم في شئ...انت اخذت دوره و هو اخذ دورك!!!

لا انا بالطريقة دي دخلت قبلهم كلهم , مش عارف اللي دخلني كان هايتأخر ولا لأ , مش عارف ايه حصل و احنا عند الدكتور , بس اللي حصل انهم حتى ما ادوهوش دوري و ركنوه للآخر (و ده اضعف الايمان لأن اللي بيفرفر ده مفروض يدخل على طول انسانيا يعني) , دول هجموا كلهم