مشكلة في موتور الباراتي

**noon** · 30-09-2008 12:36 AM

كنت موجود في أسكندرية المهم بدور العربية بعد كام يوم .. حسيت أن في صوت رفة كدة ظاهر .. بحثت وبحثت .. لقيت أن الصوت طالع من الموتور .. عديت علي ميكانيكي .. قال حاجات كتير مفهمتش منها حاجة .. مثل أن السبيكة في قاع الموتور هي دي المشكلة وعايزة تتغير .. أستنا شوية أفك لك الموتور ( موتور ايه اللي تفكه ياأسطي ) المهم رفضت فك الموتور .. قالي أصل أنا خايف لو نزلت بيها مصر كدة يحصل حاجة .. وقذف الرعب في قلبي .. المهم مالقتش حل هناك .. وصلت مصر والحمد لله .. لكن الصوت موجود لابيعلي ولا بيوطي ..
مش عارف أعمل أيه والتوكيل نصابين .. العربية 2006 عاملة 45 ألف .. كنت بستعمل زيت موبيل 1 ثم زيت الأمارات وبقالي 3 مرات بحط الأمارات ال 5000 .. أنا في حالة ذهول ومش عارف أعمل أيه .. حد يعرف ميكانيكي بيخاف ربنا .. علي الأقل في رمضان ( المشكلة أن رمضان كمان خلص )
وأنا سواقتي هادية دا يوم لما جبت 140 علي الطريق عملت فرح ..
المضحك أن الميكانيكي الأسكندراني قالي ماتقلقش دي هتعوز حاجات للموتور بتاع 300 جنيه ومصنعية 50 جنيه مايعرفش يظهر أسعار حاجات البارتي الننننننننننننننننننننننن نننار ..

يارب يسخرلشي حد من المنتدي يفيدني لحسن المسألة جاية مش في وقتها خالص ..

**mismail** · 30-09-2008 09:04 PM

هو الصوت أيه بالضبط وموجود وإنت واقف ومدور ولا وإنت ماشي بس ومع الجري 100كم/س مثلا بيزيد ولا بيقل وأنت فاتح الكبوت بتحس الصوت جاي من قاع الموتور ولا من غطا التاكيهات . الرد على الأسئلة دي ممكن نحدد مكان المشكلة

وممكن تروح لميكاتنيكي شاطر جدا باتعامل معاه من 8 سنين وراجل جدا ومش بتاع أفلام إسمه سيد جولف وهو في الحرفيين ومتخصص جولف وسيات وكان شغال في أتوموتيف تليفونه : 0103326060

وربنا معاك

**dr_3eshoo** · 01-10-2008 11:01 AM

بص يا باشا
اصوات الي تطلع من متور الفولكس فاجن هما
اولا راجع بلي بتاع الكاتينه و الدينمو و التكييف
ثانيا راجع مقياس الزيت لان ده ممكن يكون طالع من صوت التاكيهات لان التاكيهات بتتظبط بضغط الزيت في المتور
و ممكن يكون السيور بتجيب اخرها
دول الي اعرفهم و ماعرفش غيرهم

**M!NA** · 14-10-2008 12:28 PM

لو عايز رأيي الشخصي.. روح اكشف بس في التوكيل... عشان تشخص المشكلة (كشف فقط).. و اللي هيقولولك ليه اعمله برة...

أصلا معظم اللي شغالين في التوكيل عندهم ورش برة... (دا لو مكانش كلهم)

**original** · 03-12-2008 05:56 AM

بلية الفتيس

**noon** · 20-01-2009 08:47 PM

وأخيرا تم التعرف علي العيب .. وطلع طلمبة المية .. وتم تغيرها .. جبت واحدة من عند فتح الباب .. هي شكلها صيني بس نضيفة .. مع أنهم حلفوا ميت طلاق وميت يمين أنها ألماني .. وكتوب عليها أنها ألماني .. بس برضة صاحب العقل يميز .. والحمد لله شغالة كويس .. لأني ركنت السيارة فترة طويلة .. لظروف خاصة .. وأشكر كل من ساهم بالنصيحة والرأي .. ومحدش يجيلكم في حاجة وحشة ..

**umoussa** · 20-01-2009 09:52 PM

استفسار بسيط

ما هو نوع سائل التبريد المستخدم ولونه؟

ثانياً مينفعش تغير من زيت تخليقي لزيت معدني انت كدا بتقرف الموتور ولكن العكس صحيح

**noon** · 25-02-2009 01:45 PM

سائل التبريد الأخضر الذي أتي مع السيارة لم يتم تغييره لحد دلوقتي وهو مقاسه مضبوط .. وبالنسبة للزيت التخليقي .. أنا خلاص أتورطت وبحط زيت الأمارات 5000 .. فهل ينفع أرجع مرة تانية لزيت 10000 وهو تخليقي .. وللجميع كل الشكر والتحية

**umoussa** · 26-02-2009 03:39 PM

المشاركة الأصلية كتبت بواسطة dr_3eshoo

بص يا باشا
اصوات الي تطلع من متور الفولكس فاجن هما
اولا راجع بلي بتاع الكاتينه و الدينمو و التكييف
ثانيا راجع مقياس الزيت لان ده ممكن يكون طالع من صوت التاكيهات لان التاكيهات بتتظبط بضغط الزيت في المتور
و ممكن يكون السيور بتجيب اخرها
دول الي اعرفهم و ماعرفش غيرهم

التوقيع بتاعك فيه اخطاء إملائية

اسمها إذا مس ازا