تعديل فوانيس كورولا 2012 h/l بالصور

**sonaeg** · 27-02-2014 03:06 PM

بسم الله الرحمن الرحيم ,, السلام عليكم جميعا وكل عام وأنتم بخير : )

من فترة كنت بفكر أضيف شئ جديد للعربية وأولها كان الفوانيس ركبت في الفوجات و النور الواطي والعالي زينون ,, لحد ما قررت أغير الفوانيس ,, وبفضل الله وصيت علي حد يجيبلي فانوسين تعديل لينسات أمامي ويكونوا بسخانات مش ليدات وده كان شرطي : )) ,,

الفوانيس جت تمام ودي صورتها ,,,

الشريط اللي تحت خالص ده سخان بيبقي زي اسطوانة كده ,, وعاليمين خالص لينس وده للنور الواطي ثم قمرة للنور العالي ثم الاشارات اتعكس مكانها وبقت جوه و الحركة دي عجبتني جدا لما بتنور أحمر مع نور الفانوس الأبيض,, وفيه رينج بينور حول اللينس ورينج حول القمرة ,,,

المشكلة ان اللمبات اللي تركب عليه مش زي لمبات العربية الأصلية ولكن لمبات H1 للنور العالي و H7 للنور الواطي اللي في اللينس,,, فغيرناهم الحمد لله ,,, بلمبات مناسبة 8000K

ده قبل ما ننزل الاكصدام عشان نفك الفوانيس القديمة ,,, ثم تركيب الفوانيس الجديدة ,,,

نزلنا الاكصدام وبدأنا بالفانوس الشمال الأول ونركب الفيش الاول واللمبات ونتأكد منه قبل ما نركب,,, وظهرت مشاكل في اللمبات بترعش فروحت للمحل رجعتهم وجبتهم من محل تاني واشتغلوا تمام الحمد لله,,,

ركب الفانوسين وبيربطهم بعد ما اتاكدنا انهم تمام وجربناهم ,,,,

بدأ الراجل الطيب يركب الاكصدام بعد ما اتأكدنا من اللمبات تمام ,,, وده لأن الفانوس كبير اوي من ورا ناحية حوض العربية عن الفوانيس الأصلية لدرجة مش مدي مساحة تغير أي لمبة الا لما تفك الاكصدام تنزله وتفك الفانوس كله بره !!!!!!

الراجل قفل الاكصدام كويس ماشاء الله كتر خيره لان الموضوع ده اللي كان قالقني,,,,

سمي الله كده يا دكتور ,,,, ونور : )))))))

نور كمان الناحية التانية يا باشا ,,,

تمام أوي ماشاء الله ,,, وقاللي تعالي بالليل نظبط مستوي النور ,,, واللي لاحظته ان الفانوس الواحد فيه عدد 2 رجلاش,,,, لما سألته قاللي رجلاش تعليه وتوطيه ورجلاش يمين وشمال ,,,

حاسبت الراجل واتوكلنا علي الله انا وزميلي وروحت مدخلها الجراج ,,,, وقلنا نجرب في الضلمة شوية,,,

في الصورة اللي فاتت دي ,,, عدي راجل طيب كده من الشارع عارفني ,,,,, وكنت مشغل النور الواطي أشوف اللينس,,,

أهلاااااااااااا ازيك أضوكتور ,,,, هوب لقيت لمبة اللينس رعشت وطفت في ساعتها والله ,,,,, (بركاتك أحاااااج) ,,,,, قلت الحمد لله انها جت علي كده ,,,, طلعنا روحنا للكهربائي تاني ,,, طبعا فك الاكصدام كلاكيت تاني مرة عشان يغير اللمبة وفك الفانوس وغير اللمبة واشتغلت تمام الحمد لله بس لون تاني ,,,,

لون نور الفانتازيا الابيض ده بتاع اللينس ,,, مع انها 8000K برده زي اللي راكبه ,,, لكن اللي راكبة لونها مدي علي ازرق شوية ,,,, قلت حلو مصلحة روحت جايب اللمبة التانية بتاعتها وغيرت اللي في الفانوس التاني بالمرة عشان يبقي اللون واحد ابيض تلجي ,,,,,

طبعا ماروحتش ناحية الشارع تاني لحسن أقابل صاحبنا ,,,,فقولت أغسل العربية ,,,

روحت للكهربائي تاني بعد ما الدنيا ليلت ,,, ظبط النور ماشاء الله فوق تحت يمين شمال ,,, والنتيجة جميلة ماشاء الله ,,, نور اللينس ألطف كتير من نور القمرة العادية وتحس انه مية واحدة مافيهوش خطوط ,,, غير ان شكل الفوانيس بلليل غير ,,,

ماشاء الله الفوانيس لافتة للأنظار جدا وكذا واحد سألني عليهم ,,,, وغيرت وش العربية بدرجة كبيرة الحقيقة ,,,

بالنسبة للتكاليف:

الفوانيس 2750
أجرة الكهربائي اكصدامات وفوانيس 90 ثم 20 لما فكيناه تاني مرة
4 لمبات 200

تم بحمد الله علي كده ,,, وأي استفسار العيد لله في الخدمة ,,,, واسف لو اتاخرت في الرد بسبب ظروف الشغل والسفر لكن اجازتي يوم الاربعاء والخميس,,,,

ودمتم سالمين والسلام عليكم ورحمة الله وبركـــــــــــــــــــات ه : )))))

**MR . Gold** · 27-02-2014 04:15 PM

بسم الله ماشاء الله فعلاً شكلهم جميل والف مبروك .. وربنا يباركلك في عربيتك

**sonaeg** · 27-02-2014 04:24 PM

المشاركة الأصلية كتبت بواسطة lancar

بسم الله ماشاء الله فعلاً شكلهم جميل والف مبروك .. وربنا يباركلك في عربيتك

الله يبارك في حضرتك تسلم ... و يباركلنا جميعا ان شاء الله

**sfi** · 27-02-2014 06:55 PM

مجهود تشكر عليه يادكتور ^^
المشكلة الوحيدة هي انك تفك الصدام عشان تغير لمبة
بس حبيت اعرف ايه الفرق بين السخانات والليدات
واحسن حاجة انك معدلتش او غيرت الفوانيس الي ورا اه هيا بتغير شكل العربية بالليل بس العربية بيبقي ملهاش منظر خالص من ورا في النهار وهو اساسا الي مديها منظر الوقار +السبويلر من بعد المنظر الغريب بتاع ال 2008 @
وبستغرب الناس الي بتحط نيكل عليه من ورا بيضيع شكله خالص هههههه
كنت بدات افكر في الفانوس ده بس مشكلة كبيرة ان مفيش مكان وراه
وتكلفة الشحن لوحدها طلعت كام ؟ لان اكيد وزنه لوحده خذ سعر محترم
ولو كنت جبتلك شوبة فلين وحشيته ورا الصدام احسن عشان مشكلة فك كلبسات الصدام المشهورة ومعظم الناس عاملين كدة

**Mohamed.Hany** · 27-02-2014 10:28 PM

تقرير اكتر من رائع.
و العربية شكلها ماشاء الله جميل

**sonaeg** · 28-02-2014 12:06 PM

المشاركة الأصلية كتبت بواسطة mohamed.hany

تقرير اكتر من رائع.
و العربية شكلها ماشاء الله جميل

جزاك الله كل خير يا فندم ...تسلم : )))

**sonaeg** · 28-02-2014 12:10 PM

المشاركة الأصلية كتبت بواسطة sonaeg

شكرا علي ردك ... فعﻻ موال عشان تغير لمبة ... الفوانيس اللي ورا شكلها حلو تحس متظبطة جاهزة فمابفكرش اغيرها الحقيقة ... هوا الشحن بالغوانيس 2750 زي ماقلت لحضرتك ﻻن واحد جايبهملي من القاهرة بس ماعرفش منين .... وموضوع الفلين ده ماجاش علي بالي للاسف بس جزاك الله خير انك فكرتني : )))

اه متاسف نسيت ... الفرق بين الليدات والسخان كشكل ان الليدات تﻻقي اللمبات باينة جنب بعضها تقدر تفرق اللمبة من اللي جنبها اما السخان ماعرفش فكرة عمله الحقيقة بس هوا اسطوانة بتنور مية واحدة مانتش شايف لمبات ..

**sherif_taher** · 28-02-2014 05:10 PM

شغل نضيف جدا ما شاء الله....
الفوانيس ذوقها ممتاز بالنسبة لي و تغيير مكان لمبات الاشارات حركة حلوة
ربنا يبارك لك و يديك خيرهم ان شاء الله

**sfi** · 28-02-2014 09:29 PM

المشاركة الأصلية كتبت بواسطة sonaeg

اه متاسف نسيت ... الفرق بين الليدات والسخان كشكل ان الليدات تﻻقي اللمبات باينة جنب بعضها تقدر تفرق اللمبة من اللي جنبها اما السخان ماعرفش فكرة عمله الحقيقة بس هوا اسطوانة بتنور مية واحدة مانتش شايف لمبات ..

اها علي كدا السخانات احسن بكثير