زملائي الاعزاء بالقسم, كثرت السرقات و كل واحد فينا خايف علي عربيته و دايما عاوزين نعرف ايه اللي بيميز عربية عن التانية من حيث الامان و مقاومتها للسرقة.
طبعا الايموبيليزر من الحاجات الاساسية دلوقتي في العربية , وده من العوامل اللي بتقلل السرقات و بتصعب المهمة علي الحرامي .
طب هل الايموبيليزر ده بيمنع السرقة نهائيا ؟ الاجابة اكيد لأ , و الحافظ هو الله , لأن بمنتهي البساطة الحرامي ممكن يسحب العربية علي ونش .
خلينا نجاوب علي شوية اسئلة و بعدين نرجع للنقطة المهمة اللي هي ازاي احمي عربيتي بقدر الامكان.
* ما هو الايموبيليزر ؟
هو نظام حماية الكتروني في السيارة يحميها من السرقة عن طريق انه بيستشعر كود معين من المفتاح الاصلي للسيارة و يقارنة بكود العربية عن طريق موجات راديو تسمي RFID او Radio Frequency IDentification زي بالضبط اللي موجود في المحلات للتنبيه ضد سرقة الملابس , ولو محصلش تطابق مع كود العربية بيبعت اشارة لوحدة ال ECU او كمبيوتر العربية بغلق وحدة الاشعال او الاحتراق و وحدة طلمبة البنزين فالعربية متدورش او تدور و تفصل فورا حسب تصميم الوحدة الكهربائية.
* طيب الايموبيليزر ده موجود في المفتاح الاصلي ولا في العربية ؟
هو وحدة الكترونية بتبقي موجودة في العربية و تحديدا في الدركسيون من تحت جنب مكان دخول المفتاح و هي اللي بتقرا كود المفتاح اللي بيدخل الكونتاكت.
* طيب لو الحرامي حاول يفك مفتاح الكونتاكت و يلمس الاسلاك ؟
العربية عمرها مهتدور معاه ابدا لو عمل ايه الا بالكوود الاصلي اللي في المفتاح.
* طيب ازاي اعرف عربيتي فيها ايموبيليزر ولا لأ؟
بسيطة جدا , رمزه عبارة عن عربية و جواها مفتاح بتنور اول لما بتحط مفتاح العربية و تدور الكونتاكت و في عربيات تانية زى كورولا قبل 2014 بيبقي لمبة حمرا جنب مفتاح التحكم في المرايات . وديه صورهم للتوضيح :
* طيب لو ضاع مني كل المفاتيح الاصلية بتاعة العربية اعمل ايه ؟
بكل بساطة , هتروح التوكيل و تقلهم علي كوود المفتاح عشان يطلعولك بادله !! طب اعرف الكود ده منين ؟
الكود ده بتستلمه مع مفاتيح العربية و هو عبارة عن قطعة معدنية محفور عليها رقم الكود. ولو ضاع منك ممكن برقم الشاسيه بس بيبقي اصعب.
* طيب هل الايموبيليزر ممكن يخترق ؟
بالفعل , حصلت بعض الاختراقات و لكنها قليلة جدا , و قدر بعض الاشخاص انهم يقلدو مفتاح مشفر لبعض الماركات المنتشرة و ذلك عن طريق رقم شاسيه العربية.
طيب الايموبيليزر و عرفناه, احمي عربيتي ازاي ؟
1. متركنش في مكان فاضي او مظلم.
2. خلي عربيتك قدر الامكان قريبة منك بحيث تقدر تطل عليها من حين الي اخر.
3. ركب جهاز انذار محترم.
4. ركب قفل للدركسيون , الحرامي لما بيشوفه بيفضل يسرق عربية تانية من غيره عشان اسرع.
5. متسيبش اي حاجة في العربية حتي لو كيس فاضي.
6. بعد متركن و تبطل العربية لف الدركسيون شوية لغاية ميعشق.
7. حاول تركب جهاز تتبع لو امكن .
8. اول متستلم العربية شيل من عليها اي ورقة ملزوقة تدي للحرامي اي معلومة زي رقم الشاسيه, و في عربيات رقم الشاسيه بيقي ظاهر من الزجاج الامامي حاول تخبيه بوضع كارت من جوة العربية.
9. اتاكد من قفل الزجاج جيدا و من قفل الابواب بصورة صحيحة .
10. وانت سايق متقفش لحد مهما كان السبب.
11. و انت سايق اقفل المسوجر و الزجاج .
12. لو حد خبطك لاقدر الله متنزلش الا للضرورة القصوى و قبليها بطل العربية و خد المفتاح فجيبك و موبايلك و اقفل العربية.
13. نفض لبتوع الكاوتش نايم ياكابتن , واركن بعديهم بمسافة كبيرة شويتين و انزل بص و المفتاح في جيبك برضو.
14. متسيبش مفتاح عربيتك لاي سايس ابدا مهما كنت مستعجل حتي لو هتركن اخر الدنيا.
15. لو بتشيل حاجات مهمة في شنطة عربيتك و محتاجها طلعها قبل متروح المشوار بتاعك و تجنب فتحها في المكان اللي هتركن فيه فتلفت انتباه حرامي او واحد شاف اي حاجة في الشنطة.
و الحافظ هو الله .
المفضلات