الموضوع: تجربتى مع استخدام بنزين 80 لمده عام كامل مع الاكسيل و استخدامى لزيت موبيل دلفاك وزيت

[b]تجربتى مع استخدام بنزين 80 لمده عام كامل مع الاكسيل و استخدامى لزيت موبيل دلفاك وزيت
منقول للافادة صاحب الموضوع الاصلى هو
sayed2077
السلام عليكم ورحمة الله وبركاته

طبعا انا لسه عامل موضوع كنت بحكى فيه تجربتى مع عمل نصف عمره لماتور الاكسيل بتاعى ال 1300 سى سى

ولكن انا قولت انى هعمل موضوع تانى هقول فيه عن تجربتى مع بنزين 80 وهقول عن خلاصة التجربه معاه بما يرضى الله

وهقول برضوا عن خلاصة تجربتى مع زيت موبيل ديلفاك mx 3 مع كانز ابرو (زيت الشنبر )

اولا : خلاصة تجربتى مع بنزين 80 لمده عام

انا جبت العربيه فى شهر 9 فى سنه 2012 ومن اول ما جبتها كنت دايما بفولها بنزين 80 وكنت بحاول على قدر الامكان اظبط رجلى على دواسة البنزين على قد ما اقدر علشان اتفادى صوت التسقيف اللى بيحصل غير كدا سواقتى كانت دايما هاديه جدااا ومفيش عندك امكانية التسريع المفاجىء يعنى مثلا انت لقيت عربيه داخله عليك ولازم تدوس بسرعه على دواسة البنزين فالعربيه المفروض اول ما تدوس بنزين تطلع تجرى علشان متلبسش فى العربيه او على حسب الموقف اللى قدامك البنزين ال 80 بقى لو فكرت تعمل كده هتيجى تدوس على دواسة البنزين هتلاقى الماتور بقى عمال يطلع صوت تسقيف بس ولا بتسرع ولا بتعمل بل بالعكس هتلاقى بتبطىء معاك عن الاول وهتلبس هتلبس

غير كدا النزين ال 80 فى المطالع بجد اداءه مزبله
وده ظهر لما كنت رايح المقطم وطبعا المقطم علشان تروحوا بتطلع مرتفاعات البنزين ال 80 بقى بيخليك غصب عنك تقرص على الغيار فبالتالى بتطحن فى الماتور علشان الماتور ميسقفش منك يعنى مثلا اخرك وانت طالع المقطم تبقى جايب التالت و تجيب اخر التالت بقى لو معملتش كدا هتلاقى العربيه بتنخع معاك وهتنقل غصب عنك للتانى و بعدها غصب عنك هتنقل للاول واطلع بقى المقطم كله على الاول يا كبير ومعاك ربنا والله يرحم الماتور بتاعك

برضوا حاجه تانية فى البنزين ال 80 التكيف لو حضرتك عربيتك فيها تكيف وحاطط بنزين 80 اسمع احلى سنفونية تسقيف يعنى موتسارت لو بيعزف الجمهور مش هيسقف على اد ما الماتور هيسقف وانت مشغل التكيف برضوا نقدر نقول اداء البنزين 80 مع التكيف مزبله

حاجه عاشرة وديه صعبه جدااا للناس اللى معاها اكسيل بس الفتيس بتاعهم 4 غيار زى حالاتى هتعيش معاناه بجد بقى مع البنزين ال 80 ناس هتقولى ليه حضرتك معنى ان معاك الفتيس الاربعه غيار وبتحط بنزين 80 معنى كده ان حضرتك لازم تقرص اوووى على كل غيار علشان تجيب اللى بعده والعربيه متنخعش منك يعنى مثلا الاول لازم تجيب سرعة 20 والتالى لازم تجيب 40 والتالت لازم تجيب 60 لو مجبتش اى سرعه من دول وانت حاطط 80 مع الاكسيل يبقى انسى انك تجيب الغيار الرابع خصوصا فى الفتيس الاربعه غيار زى اللى مع حلاتى

وبرضوا بمناسبة انى عامل عمره قريب عاوز اقولكم ان لما فاكينا الماتور لقينا البساتم عليها طبقة كربون عامله زى البلاك اه والله زى البلاك اللى بيرصفوا بيه الشوارع حتى الصبابات حالتها وحشه جداااا وكان لازم نودى وش السلندر عند الخراط علشان ينضف الوش من اثار الكربون اللى كانت بتخلى الصبابات تسيل بنزين بالتالى العربيه تاكل بنزين جامد
فبرضو البنزين ال 80 كان ليه عامل كبير اووى ان حالة الماتور تبقى سيئة للدرجه اللى وصلت لها ديه

حاجه بقى اخيره وديه مزعجه و مقرفه اوووى
انك لما تحط بنزين 80 لمده شهر مثلا ورا بعض وجيت مره ملقيتش بنزين 80 وجيت حطيت بنزين 92 يبقى يا ويلك يا سواد ليلك لانك تانى يوم على طول بتلاقى العربيه من ورا بتطلع دخان اسود كتير اوووى وده دليل ان الكربراتير عاوز تنضيف
وطبعا كنت كل شوية اروح عند بشمهندس متز المصرى لصيانه الكربراتير وكان بيفك الكربراتير والله العظيم وربنا يشهد على اللى بقوله بتلاقى الكربراتير من جوه لونه احمر و مليان تراب بالهبل تحس اننا بنحط زيت مش بنزين سبحان الله وطبعا كان كل شوية بشمهندس معتز يقولى ابوس ايدك بطل بنزين 80 بقى وانا مكنتش مقتنع ساعتها من ان البنزين ال 80 وحش وكنت دايما اقوله ان كل اللى بيتقال عن البنزين ال 80 ده اشاعات
وكان ينضف الكربراتير ويطلع ان اللى عمل كدا ان البنزين 80 بيخزن سورى فى الكلمه وساخه وكربون كتير جوه الكربراتير تيجى تفول بنزين 92 لما متلقيش 80 يروح طبعا يبداء ينضف الكربون والحاجات اللى سايبها البنزين 80 فبيسد ثقوب الهوا فى الكربراتير وعلى فكره كربراتير الاكسيل فيه ثقوب هواء صغيرة جدااا فى رفع الدبوس مثلا فبالتالى اقل حاجه تخلى اداء الكربراتير يختل فورا

طيب دلوقت هنقول بطريقه مبسطه علشان فيه ناس بتسئل انهم عاوزيين الخلاصه مع البنزين 80

اولا بس لازم نعرف ان اكبر عدو بيظهر لنا لما بنحط بنزين 80 هو التسقيف طيب انا سامع واحد بيقول ايه يا عم الحج التسقيف ده

اقوله
التسقيف : هو ان البنزين اللى بيدخل الماتور بيولع من تلقاء نفسه قبل ما بوجيه العربيه يولعه يعنى بمعنى اخر واشد بساطه معنى التسقيف ان البنزين بيولع من نفسه من غير ما العربيه تولعه بمعنى اشد بساطه يعنى البنزين بيولع بمزاجه وطبعا احنا مش عاوزينه يولع بمزاجه هو احنا عاوزيينه يولع بمزجنا احنا

طيب ايه يا حج اضرار التسقيف ده

اضرار التسقيف : هى ان لما البنزين يولع من نفسه بيضيع قدرة الماتور يعنى الماتور بيبقى ضعيف و بيقلل من القدرة الحصانيه للماتور و الاضرار اللى على المدى البعيد انه بيشتغل عكس الماتور فبالتالى بيحمل على الماتور اوووى بدل ما يساعد الماتور انه يشتغل اسرع وبيكون سبب من اسباب تلف شنابر البساتم و لو لم نراعى حكاية التسقيف وخففنا رجلنا من على دواسة البنزين وسيبنا الماتور يسقف هنلاقى عمود الكرنك الى فى الماتور اتقطم مننا وساعتها هتلاقى العربيه بركت على الارض وقالت والله ما انا ماشية

طيب بكل بساطه ليه مينفعش نحط بنزين 80 فى الاكسيل
1: لان الاكسيل نسبة انضغاط الماتور بتاعها عالى والكتالوج بينصح باقل بنزين تحطه يبقى اوكتان 87 ويفضل وخلى بالكم من يفضل بنزين 91 اللى هو اقرب حاجه ليه بنزين 92 عندنا وده الحمد لله متوافر

2:علشان تسوق وانت مرتاح ومتبقاش مقيد بطريقة سواقة ممله بطيئة

3: علشان تاخد اقصى قدرة حصانية من الماتور والماتور مينخعش منك فى المطالع ولو جيت فى موقف واتزنقت وكان لازم تشد بالعربيه بسرعه تلاقى الماتور فايق تحت رجلك وميكسفكش .

4:علشان تحافظ على عمر الماتور و اداء مكوناته زى الكربراتير ووش السلندر والصبابات والبساتم وتاخد افضل اداء وتعمل اقل صيانات لان بالذات صيانات الماتور اللى بيبقى فيها فك بتكون مكلفه مش اى كلام

طيب ايه اضرار بنزين 80

1:بيقلل جدا من القدرة الحصانيه للماتور يعنى مثلا المفروض ماتورك بيطلع 80 حصان هتلاقيه مع البنزين 80 بيطلع 50 حصان وبدون مبالغه .
2:العربيه تبقى ممله جدااا فى السواقه وظهور صوت التسقيف المقزز واللى بتحس ا فيه حاجات بتتكسر جوه
3:هتعمل صيانات كتير للكربراتير كل شوية وطبعا بتكون مكلفه غير هتلاقى زيادة استهلاك البنزين جداااا

4:بتقصف عمر الماتور بسرعه وبتبوظ اجزاءة الداخليه

وعلى فكره ده بيرجع ان نسبة الكربون فى تكوين البنزين ال 80 بتكون كبيرة جداااا فالكربون لا يشتعل فبالتالى بيكون اثارة على الماتور من جوه


كده احنا خلصنا من نصايح البنزين وانا انصح باستعمال بنزين 92 لانه هو المتوفر ومفيش 90 ولو لقيت 90 برضوا ميضرش
بس 80 استخدمه للظروف القصوى فقط فى حالة انك ملقتش بنزين وكمان حط 10 ليتر يكفوك عقبال ما تلاقى بنزينه تانية

وعلى فكره انا كنت من اشد مناصر البنزين 80 وكنت من محبيه جدااا بس لما فتحت الماتور وشوفت بعينى اتاكدت من الكلام اللى كان بيتقال ان البنزين ال 80 مش كويس وبالتالى مش غلط ان الواحد يصلح غلطه ويقول عن اخر ما توصل ليه حتى لو كان عكس ما قلته زمان

نيجى بقى لتجربتى مع زيت الموبيل دلفاك و زيت شنبر الابرو

كلنا طبعا جه فتره فى المنتدى ولقينا كلام كتير كان بيتقال عن استخدام زيت موبيل دلفاك mx 3 مع علبة كانز ابرو وعن نتائجه المذهله بصراحه انا استخدمته من حوالى ثلاث شهور

وكنت بعانى جدااا قبل ما احطه من وجود دخنه مع التدوير فى الصبح وكانت كتتير اوووى و وجود دخنه زرقاء دليل على تاكل زيت اثناء المشى على السريع وبرضوا كنت بعانى من نقص الزيت اللى كان لازم كل شوية افضل ازوده وطبعا كان حاجه ممله جدااا ان كل شوية تلاقى الزيت بينقص وتلاقى الفايظ بيبهدل الماتور من جوه ببخار الزيت اللى بيطلع منه وطبعا كده كده كان الماتور خفيف عندى فمفيش مانع لو اجرب هذا الخليط العجيب
روحت اشتريت الزيت من بنزينه موبيل و اشتريت زيت الشنبر وحطيتهم فى العربيه اول حاجه لاحظتها ان
الدخنه بتاعت اكل الزيت تعتبر بقت معدومه نهائيا ومبقاش فيه اى دخنه نهائيا


وديه الحسنه الوحيده اللى عملها

لكن صوت الماتور اخذ فى الارتفاع
و
مازال طلوع بخار الزيت من الفايظ اللى بيبهدل الماتور من جوه وتحس ان العربيه كانت غرقانه فى برميل زيت
و
طلوع الدخنه بكثافه من الشكمان اثناء الجرى على الطرق السريعه مع انى كان مثلا اخرى على سرعة 90 يعنى يعتبر مش جرى برضوا
و
مازال مسلسل نقص الزيت وتزويده كل شوية مستمر
وطبعا حاجه ممله ومقلقه علشان لو نسيت فتره متبصش على الزيت ممكن الزيت يقل جدا والماتور يقفش منك

ونصيحتى لو الماتور خفيف وعاوز تقلل شوية من الدخنه اللى بتطلع استخدم نوع الزيت اللى بتستخدمه عادى مش لازم تشترى موبيل دلفاك مع علبة الابرو مع العلم انها فقط لتقليل الدخنه شوية بس اكل الزيت هيستمر نقص الزيت هيستمر و الدخنه اللى هتطلع منك اثناء الجرى فى الطرق المفتوحه من الشكمان هتفضل مستمره معاك

وهنا وصلنا لاخر موضوعنا واتمنى يكون مفيد ليكم
وديه خلاصة تجربتى مع البنزين 80 و الزيت الموبيل ديلفاك مع زيت شنبر ابرو

وانا نقلت ليكم من خلال ما عشته ما حدث لى بالظبط خلال مده حوالى عام كامل امام ايديكم لتستفيدوا من ما واجهته بدون ان تواجهكم اى مشاكل ان شاء الله
واتمنى ان يجعله الله فى ميزان حسناتنا
والحمد لله الذى علمنى
وديه ضريبه اى حاجه الواحد ربنا علمهاله انه يعلمها لغيره
واتمنى ان يرضى الله عنى يارب

و

السلام عليكم ورحمة الله وبركاته
[/b

منقول للافادة