اولا السلام عليكم ورحمة الله وبركاته :)

احب اشكر الناس الخدومه هنا جدا على اضافاتهم الجميلة و المفيدة اللي كونت منها معلومات كويسة عن العربية :)

السؤال بكل بساطة و تفصيل في نفس الوقت ..
أنا بدور على عربية في حدود ال 45000 حتى 50000 .. وقع تحت عيني الفابيا و عجبني امكانيتها المترافقة مع سعرها .. لكن كطبيعة السوق المصري مش امكانيات العربية هي الحكم الفيصل في قرار زي ده ..
لذلك هقسم الاستفسار ده في صيغة اسئلة صغيرة و محددة و ارجو من أي حد عنده خبرة في العربية دي يفيدني ربنا يجازيه خير :)

1- امكانيات العربية
.... a- أنا عارف إن العربية نزلت بكذا سعة للموتور 1000 و 1200 و 1400 و كل واحد ليه المواصفات بتاعته من حيث الصمامات و إذا كان HTP أو MPI و ده كله بيفرق في الPower ...... لو حد يعرف إيه اللي نزل السوق في مصر هنا و إيه المنتشر و الاقل شكوى منه
.... b- الثبات و عوامل الأمان

2- الشكاوى المتكررة ؟؟ "يعني إيه أكتر جزء بيحصل فيه اعطال .. و هل دي اجزاء حيوية ؟؟" كل عربية ليها جزء مميز كده بيبوظ ديما :D

3- اعتمادية و توافر قطع الغيار و اسعارها ؟ " أنا عارف إنها مشتركة مع كذا حاجة تانية خصوصا إنها تحت مظلة "VW" و إن الاجزاء ليها serial و ليست مقتصرة على نوع واحد"

4- إيه هي الحالة اللي اقدر اقول عليها حالة جيده ؟؟
من حيث الكيلوات و إيه اتغير و إيه لسة

5- لو جيت اكشف عليها .. إيه اهم حاجة اركز عليها و إيه ممكن يكون ثانوي ؟؟


أنا عارف إني اطلت جدا جدا .. لكني فعلا حيران و اكيد حضراتكم عارفين الإحساس ده لما جيتو تشتروا :)

ملحوظة: أنا هندسة ميكانيكا .. بحب افك و أركب و افهم ده ليه وإزاي و كده و أعمل حاجتي بنفسي فإن شاء الله ناوي اعلم نفسي عليها كتير .. فهل ده هينفع معاها ولا العربية هتزعل مني ؟؟ :D

شكرا مقدما ليكم و ارجو الرد قريبا قبل ما البس في الجوليت :D " مع تقديري ليها و إنها ايضا عربية مناسبة لإحتياجاتي" بس قلبي اقرب للفابيا