الموضوع: عايز أغير موتور عربيتى (ريجاتا85) أرجوكم الافادة!!

السلام عليكم جميعا

أنا عندى عربية فيات ريجاتا موديل 85 (1500cc) مكيفة وانا ماشى بيها سير الكاتينة اتقطع (حظى هباب و طلع عين اهلى زقيتها لما أنقطع نفسى)
روحت لميكانيكى وبعد يوم طويل و ظريف فى تركيب سير الكاتينة, فاجئنى وقلى... باشا العربية جابيت صباب!! ومحتاجة نص عمرة يعنى اعمل حسابك فى 500 ج.م. وقالى ممكن تمشى بيها عادى لحد متجهز نفسك
فمشيت بالعربية مروح فجئة سمعت فرح عندى فى الموتور ودخنة رهيبة كلمت الميكانيكى قالى... كدة تقريبا جابيت وش سليندر!! وممكن تخش فى عمرة كاملة يعنى اعمل حسابك فى باكو ونص والعربية هاتقعد عندى اسبوع!!..
ناس كتير قالتلى سقط موتور تانى أحسن وهيبقى اوفر وأحسن من العمره ,أنا عندى شويت اسئلة ارجو من سيادتكم الاجابة عليها للحاجة الضرورية.

1-أنهى أحسن موتور التمبرا ولا اللانشيا ينفع لعربيتى؟ وهل فى أحسن منهم؟ و أجيبو كام سى سى؟.

2-هل أجيب الموتور بس ولا لازم اجيب الفتيس بتاعه معاه(يعنى ينفع الموتور الى هجيبة يركب على فتيس الريجاتا)؟ و الفتيس تكليفته تقريبا كام؟.

3-أنهى أحسن منطقة أجيب منها الموتور(انا ساكن فى القاهرة الجديدة بس مش مشكلة لو المنطقة بعيدة)؟ وتقريبا سعرة كام؟.

4-هل هغير حاجة فى العربية عشان الموتور الجديد وسعرها كام؟.

5-مصنعية الميكانيكى تقريبا كام(ولو حد يعرف ميكانيكى ابن حلال بيفهم ياريت يكتب بياناته)؟.

6-هل المواتير كلها استيراد ولا فى زيرو(لو فى زيرو بكام )؟.

7-اية هو الورق المفروض أنى اخده من بائع الموتور؟.

8-موضوع تسقيط الموتور دة ياخد وقت اد أية؟.

9-موتور الريجاتا لما يتفك يتباع بكام تقريبا؟.

أرجو من سيادتكم الرد السريع عشان العربية وقفة فى الشارع عطلانة وحلها لايسر عدو ولا حبيب D: . وارجوكم تكتبوا الاسعار عشان أبقى عارف هتتكلف كام تقريبا $$

وأسف جدا جدا على الاطالة ولكم جزيل الشكر مقدما.

اولا بلاش الميكانيكى ده لانه بيستسهل و مفكرش يكشف على طقم الصباب و خلى العربيه جابت وش سلند و الله اعلم حصل ايه تانى للصبابات.

راى ان حضرتك تسال على ميكانيكى كويس يكون جنبه خراط ووريله الموتور و شوف هيقولك ايه و اخر حاجه فكر فيها تغيير الموتور لان تغيير موتور ريجاتا لتيمبرا او لانشيا هيتطلب تعديل فى ادوات التغذيه و دفيره الكهرباء و العددات و طبعا مشاوير شراء الموطور و موال المرور