حكايتى مع توكيل رينو....قصة حقيقية

**Hany Saad** · 14-03-2014 01:01 AM

طبعاً اللى أنا بقوله هنا دى وقائع حصلت معايا شخصياً و مش قصص حد حكهالى
الحمدلله كل الحمد أستلمت رينو فلوانس 2014 فى شهر فبراير 2014
أول ما أستلمت العربية و يمكن حكيت الموضوع ده قبل كده لقيت لمبة من لمض مسطرة ال LED الشمال مطفية....طبعاً محتاجة عين خبير علشان تقدر تبص فى الوهج بتاع ال LED و هو منور و تشوف ان فيه لمبه من 6 لمض مطفية
استلمت العربية الخميس، روحتلهم بيها السبت لأن الجمعة هما أجازة
لم أحجز ميعاد صيانة و توجهت مباشرة للتوكيل....ال LED موجود، شربت النسكافية بتاعى على ما غيروا مسطرة LED كاملة، العربية اتغسلت و مشيت و أنا عميل فى قمة الرضا

الموضوع اللى جاى ده هو البوب الكبير:
بعد اسبوعين تلاتة كده و انا بركن العربية اسمع صوت تكه فى الدريكسيون فى منطقة معينة من دوران الطارة و انا بكسر يمين فقط، طبعاً اتخضيت...اجرب تانى مفيش حاجة، اجرب تالت ترجع التكه...
انا دايماً احب اروحلهم و انا محدد العيب علشان منضيعش وقت بعض...طبعاً و انا ماشى مفيش الهوا العربية زى الفل، الموضوع مبيظهرش إلا فقط أثناء الركن و مش دايماً.....
المهم سافرت بالعربية مرتين و انا مركز مع الموضوع، و مفيش زيادة أو نقصان فيه، صوت تكه واحدة بيظهر ناحية اليمين و أنا بركن على أرض خشنة أو أرض مايلة

طبعاً أنا شكيت فى airbag coil و روحت على التوكيل و قولتلهم الحكاية، طبعاً لليعرفوا التوكيل الأرض فيه ناعمة، جيت أجرب أطلع الصوت و لا الهوا.....دريكسيون ناعم و جميل و بعدين ربنا ألهمنى أنى أخد المهندس بالعربية بره الورشة و كانت الأرض أسفلت عادى، المهم مرة أتنين ظهر الصوت

الحل:
طبعاً التوكيل زى تماماً شك فى airbag coil، راح عامل حركة ظريفة و شايل ال airbag coil من مكانه علشان يتأكد، لو راح الصوت يبقى منه اما بقى لو مرحش يبقى .................
.
.
.
تشويق و إثارة معلش علشان اللى جاى مش سهل
يبقى
يبقى
قطمة دريكسيون و يلزم تغيير عامود دريكسيون كامل مع موتور الباور الكهربا اللى راكب فيه ثم إعادة برمجته على النت.....
ان ان تش....
اول حاجة فيه عامود متوفر
ثوانى يا باشا نشوف.....
هنا فى اسكندرية مفيش بس فيه حته فى القاهرة و هنبعت نجيبها
طبعاً الكلام ده كان السبت اللى فات، انا قلت دى اشتغالة و هنبعت نجيبها يعنى فيها كام شهر
طيب يا برنس و دى تيجى امتى، قالى بكره الصبح!!!!!!!
نعم بالسرعة دى....
حضرتك فاضى بكره تيجى تركبها
للأسف كان عندى مشوار مهم فى القاهرة و مينفعش أأجله فقلتلهم هاجى الاتنين ان شاء الله
سافرت الأحد القاهرة، طبعاً الملاحظة ان صوت التكة بقى بيظهر اكتر من مرة فى لفة الدريكسيون و بشكل متكرر أكثر لان الفنى فى التوكيل حاول يقرط على صامولة القطمة يمكن الصوت يروح و لكن غالباً ضرها اكتر باللى عمله....انا طبعاً مخدتش فى بالى لانى هغيرها تانى يوم، بل بالعكس كنت سعيد اكتر لان الصوت اصبح اكتر وضوحاً و سهل تمييزه و هيبان جداً لو تغيير عامود الدريكسيون هيحل المشكلة و لا لأ.....
طبعاً لمن لا يعلم القطمة هى زى صليبة فى نهاية عامود الدريكسيون متصلة بالاسكترا و لكن للاسف لو فيها مشكلة مش بتتغير لوحدها
طبعاً طلبوا منى الحضور يوم الاتنين مبكراً علشان هتحتاج وقت و كمان هسيب العربية و هاجى اخدها اخر اليوم
كلمتهم و انا راجع يوم الاحد من القاهرة....لانى طبعاً عارف المواعيد فى مصر و كلام الهرى و سألت القطمة وصلت و أكدولى أنها وصلت
يوم الاتنين الساعة 8:30 صباحاً كنت عندهم و سلمت العربية و بصيت على عامود الدريكسيون و ألاقى حاجة ضخمة مالية مركزها....طبعاً مفاتنيش أتأكد أنه أصلى و عليه الباركود و بادج رينو و كده.....
قالولى على الساعة اتنين تيجى تستلم......
بصراحة مكنتش متفائل خير، و حاسس ان فيه حاجة هتحصل....المهم سبت العربية و روحت الشغل
كلمتهم الساعة 3 كانوا بيقفلوا فيها
روحتلهم الساعة 5:30 كانت مغسولة و بتلمع.....
جرب يا باشا
و اللى خايف منه حصل
حصل
حصل
تشويق برده
الصوت راح خالص....ايه البواخه دى
يعنى مش هتخانق و هعلى حسى
همشى كده على طول و انا مبسوط من غير ما اتخانق
المهم المهندس قالى انت تروح و تجرب زى ما انت عايز و بكره معلش تعدى عليا الصبح علشان تقولى لو فيه ملاحظات و كمان بصراحة الانترنت كان قاطع و محتاج ادخل العامود الجديد و ابرمجة على كمبيوتر العربية
قولتله جايلك طبعاً بس ايه حكاية البرمجة دى؟
قالى لما قطع كهربية بتتبدل و علشان محدش يلعب فى العربية برا عند الورش يجب تعريف القطعة الجديدة على كمبيوتر العربية و الا العربية تعمل error و متدورش
طبعاً مفتنيش أسأل بكام بأه الحوار ده كله للمعلومة
عامود دريكسيون بالقطمة و اللوك و الموتور الكهربا و كارتة البروجرام= 14000 جندى ايون ١٤ باكو
مصنعيات و برمجة و خلافه فى حدود 2000 جنيه ٢ باكو
+ ضريبة مبيعات
و احسبوا انتم بأه
روحت البيت ميت فل و ١٤....
تانى يوم روحتله مفيش نت برده، بس أخوكم كان جاهز....اديته ال usb بتاعى ، شغل النت....وصل الجهاز بتاعه على العربية....دخل العربية على السيستم....دور العربية يا بنى...اكسر الدريكسيون للاخر شمال...السيستم قال اوكيه...طيب اكسر كله يمين...السيستم قال اوكيه...طيب هات الدريكسيون فى النصف...تمام...اطفى...مبروك يا باشا كله تمام

فى النهاية لما تسألونى انت زعلان من العربية أقولكم أبداً و الضمان اتعمل علشان كده
طيب مضايق من التوكيل: أحسن توكيل فيكى يا مصر
طيب و شعورك ايه: Satisfied Customer
هذه القصة حقيقة و ليست من واقع الخيال و أبطالها حقيقون موجودون معنا هنا انا واحد منهم و الطرف الاخر توكيل رينو المحترم
انا اشتريت الفلوانس علشان توكيلها و بشكرهم جداً على هذا الشغل الأحترافى....

**Hany Saad** · 14-03-2014 01:00 PM

المشاركة الأصلية كتبت بواسطة amr011111

مبروك حل المشكله
بس السعر غالى اوى

الله يبارك فيك...طبعاً السعر عالى و لكن للأمانة مقارنة بأسعار قطع غيار التوكيل و بالنسبة لحجم و مكونات هذه القطعة فده لازم يكون تمنها.....

**ahmedelfeky** · 14-03-2014 01:29 AM

علي فكره الدفعه بتاعه يناير دي في اكتر من حد اشتكي من موضوع التكه ده الحمد لله انها اتظبطت مع حضرتك انا عندي سؤال بقي والفتيس في وضع ال p واكسر الدريكسيون للاخر سواء يمين او شمال بسمع طقطقه خفيفه واما اغير وضع الفتيس لل n مفيش ولا الهو السؤال التاني حضرتك التكه دي كانت بتظهر في اي منطقه بالظبط وانت كاسر الدريكيسون لاخر مشواره ولا في النص

**Hany Saad** · 14-03-2014 01:14 PM

المشاركة الأصلية كتبت بواسطة ahmedelfeky

علي فكره الدفعه بتاعه يناير دي في اكتر من حد اشتكي من موضوع التكه ده الحمد لله انها اتظبطت مع حضرتك انا عندي سؤال بقي والفتيس في وضع ال p واكسر الدريكسيون للاخر سواء يمين او شمال بسمع طقطقه خفيفه واما اغير وضع الفتيس لل n مفيش ولا الهو السؤال التاني حضرتك التكه دي كانت بتظهر في اي منطقه بالظبط وانت كاسر الدريكيسون لاخر مشواره ولا في النص

معقولة....أنا كنت فاكر عندى فقط!!!!!
انا الناحية الشمال عندى مفهاش اى صوت خالص......سواء قبل او بعد التغيير
أنا محصلش معايا موضوع الطقطقه ده فى الشمال خالص على اى وضع للفتيس و لما كان صوت الطقة عندى كنت لما بركن فى الجراج بجيب ال p و اقعد الف الدريكسيون يمين و شمال علشان احدد مصدر الصوت و عمر ما الموضوع كان مرتبط بنوع الغيار عندى و لكن للتأكد، بكره ان شاء الله هجيب ال p و اجرب و اقولك....لاحظ برده الصوت كان طقه واحدة فقط عاملة بالظبط كأنك ضارب اشارة و بتلف الدريكسيون ناحيتها...هو ده بالظبط وصف الصوت
بالنسبة للسؤال التانى: لو فرضنا ان الدريكسيون بيلف ٣ لفات كاملة شمال و زيهم يمين، الصوت التكة كان بيظهر فى اللفة التانية يمين فقط......و بيظهر اكتر كلما كانت الأرض خشنة و غير متساوية، أو بمعنى اخر مقاومة الأرض للعجل جامدة، اما فى حالة لو الارض ملساء او فيه ميه او طين يعنى مفيش مقاومة عالية على العجل فاستحالة يظهر الصوت....طبعاً مع الاخذ فى الاعتبار ان و انا ماشى مفيش الهوا، يظهر الصوت فقط أثناء الركن و مكنش دايماً كمان...يعنى بمزاجه

**ahmedelfeky** · 14-03-2014 07:23 PM

المشاركة الأصلية كتبت بواسطة Meggieboy

معقولة....أنا كنت فاكر عندى فقط!!!!!
انا الناحية الشمال عندى مفهاش اى صوت خالص......سواء قبل او بعد التغيير
أنا محصلش معايا موضوع الطقطقه ده فى الشمال خالص على اى وضع للفتيس و لما كان صوت الطقة عندى كنت لما بركن فى الجراج بجيب ال p و اقعد الف الدريكسيون يمين و شمال علشان احدد مصدر الصوت و عمر ما الموضوع كان مرتبط بنوع الغيار عندى و لكن للتأكد، بكره ان شاء الله هجيب ال p و اجرب و اقولك....لاحظ برده الصوت كان طقه واحدة فقط عاملة بالظبط كأنك ضارب اشارة و بتلف الدريكسيون ناحيتها...هو ده بالظبط وصف الصوت
بالنسبة للسؤال التانى: لو فرضنا ان الدريكسيون بيلف ٣ لفات كاملة شمال و زيهم يمين، الصوت التكة كان بيظهر فى اللفة التانية يمين فقط......و بيظهر اكتر كلما كانت الأرض خشنة و غير متساوية، أو بمعنى اخر مقاومة الأرض للعجل جامدة، اما فى حالة لو الارض ملساء او فيه ميه او طين يعنى مفيش مقاومة عالية على العجل فاستحالة يظهر الصوت....طبعاً مع الاخذ فى الاعتبار ان و انا ماشى مفيش الهوا، يظهر الصوت فقط أثناء الركن و مكنش دايماً كمان...يعنى بمزاجه

طيب الحمد لله انا بسمع صوت تزييق خفيف بس لما بجيب اخر الدريكسيون شمال او يمين يعني اخر مشوار الدريكسيون قبل ما يقف لما بغير الفتيس من P ل N الصوت بيختفي .صوت التزييق التاني اللي بسمعه عندي الجراج زي مايكون في مطب صناعي يعني وانا بركن بيبقي العجلتين الللي قدام مستواهم اعلي بحوالي 10 ل 15 سم من العجلتين الورانيين في الوقت ده ببقي حاطط الفتيس علي الR وضاغط علي الفرامل لو خفيت رجلي علي الفرامل وزودت تاني فرامل بسمع الصوت ده واول ما ارجع الفتيس للوضع N عشان العربيه تنزل لوحدها لانه يعتبر منزل بيختفي الصوت مهما كانت قوه ضغطتي علي الفرامل وبجمله بقي متعلقات الدريكسيون العربيه عاوزه ظبط زوايا بعد ماوصلت 15 الف كيلو الدريكسيون وانا سايق وخليتها في النص بتحدف يمين عشان تمشي مظبوط الدريكسيون بيبقي كاسر سنه ناحيه الشمال مش عارف اقولهم في التوكيل عليها مع صيانه ال 15000الف (مش متأكد عندهم ظبط زوايا ولا لأ) ولا اظبطها عن Fix & fit وخلاص