نيسان X-Trail...اختبار قيادة!

من حوالي اسبوع جاتلي الفرصة اني أسوق عربيتين X-trail...عشان كان لازم أودي واحده من مكان الشركة للموقع و أرجع التانية اللي في الموقع للشركة

العربية الأولي كانت عاملة 593 كم....يعني زيرو و لسه دي تعتبر أول طالعة ليها....عشان كانت قبل كده ماشية في الترخيص و التأمين و الذي منه...
العربية الثانية كانت ماشية 8760 كم يعني اتلينت و بقت زي الفل

مجموع اللي مشيته بيهم حوالي 30 كم داخل التجمع الخامس

الإنطباع الأول عن السيارة من الخارج انها قوية و تصميمها جيد و متناسق...و معزز بوجود جنوط و كاوتشات كبيرة....مما يعطيك الإحساس بانها قادرة علي الدخول في الصحراء بدون خوف!
http://images.carzone.ie/images/rand...%20%281%29.jpg

http://www.virtual-showroom.co.uk/im.../9904_1172.jpg


أول ما تدخل العربية تفاجأ بالفقر و عدم التكلف في الخامات...و احساس البلاستيك الطاغي علي المقصورة...و ده واضح جدا في التابلوه و الجزء الأسفل من الأبواب....http://www.carpages.co.uk/nissan/nis...r_11_12_03.jpg

عجبني في المقصورة كثرة أماكن التخزين و مواقعها...يعني مثلا استفادوا من الفراغ اللي قدام السوق و عملوا درج حلو....بعكس الياريس و الماتريكس...فراغ:)

عجبني جدا بردو فتحة تكييف أمام السواق خلف عجلة القيادة...و دي بتوجه الهواء علطول في وش السواق....بس خد باللك لا تاخد برد:)

جاي فيها سي دي\كاسيت كينوود اللي هو بيتجمع في مصر...ماجربتش أسمعه عشان ماكنتش فاهم فيه أي حاجة:ph34r:..

التكييف بتاعها أوتوماتيكي...و تبريده كويس جدا

الكراسي كعادة الكراسي الجلد الخاصة بالسيارات المجمعة في مصر...ممتازة...و مريحة جدا.

معجبنيش قعدة السواق...حسيت ان رجلي نازلة بزاوبية 90 و الدواسات تحتي علطول...يعني كنت قاعد مش مرتاح قوي

نيجي بقي لاختبار القيادة....و انا تعمدت اني اجرب العربية في كل الظروف عشان يبقي تقييم شامل (الحمدلله مكانش فيه حد من الشركة معايا:))

ندور الموتور...هادئ جدا و ملهوش صوت....مع العلم انه 2500 سي سي بيطلع حوالي 177 حصان...

دوسة البنزين بتخلي العربية تفط من مكانها و تفرك في الأرض...بس ده في الأول بس....

التسارع بتاعها عادي جدا جدا جدا....مش 2500 سي سي خالص...ممكن يكون 1800 أو 2000 بالعافية...و ده كان في العربيتين...حتي الكيك داون كان صوته عالي بس مش مديني اللي انا عايزه

سرعة ال100 كانت علي 2000 RPM...و ده كويس جدا...بس مناسب للسي سي....

العفشة و الثبات و الفرامل:

العفشة سيئة جدا جدا...بترزع بعنف شديد ...و علطول بتتنطت...يا ويلك لو نزلت في حفرة ولا بلاعة...العربية بحس انها بتفك من بعضها...الدركسيون كان فيه خبط في ايدي لو دخلت في طريق مكسر كأن في حاجة مفكوكة من تحت...
ده غير ان الأبواب و التابلوه شغالين تزييق و تكتكة...

جربت أعمل بيها مناورة علي سرعة 80....(حرف S)...كل اللي أقدر أقوله اني مقدرتش أكمل باقي الحرف....و حسيت اني ماشي بجمب العربية:funny34d:

علي سرعة 100 انا حاسس اني ماشي بسرعة...و ده بسبب عدم استقرار العفشة و التنطيط المستمر

بعدها بكام يوم ركبت مع سواق واحدة تانية بس كانت عاملة 39000 كم...و دخلنا بيها في الصحراء....حسيت اني راكب الملاهي و كانت بتعدي بصعوبة لو فيه حتة وعرة ده غير احساس التفكك:2003126104835_wrc:

و سالت السواق ايه رأيك فيها؟؟
قالي ولا ليها أي لازمة....هي منظر و تكييف و شوية كماليات...و موتور نوعا ما كويس...بس ماتعديش بيها 120....و ماتخشش بيها في الصحراء!

ده باختصار تجربتي مع الXtrail...و حاولت علي قد ما أقدر اظهر أهم العيوب و المميزات في العربية
__________________________________________________

شكرا لحسن استماعكم و كل عام و انتم بخير:thinking:

عفوا نسيت أتكلم عن الفرامل:

للأسف سيئة لأقصة درجة....عمري ماحسيت ان مافيش فرامل تحت رجلي غير في العربية دي و عربيتي ال127 القديمة...

الabs ملهوش لازمة...و لبست في مطب محترم مع ان السرعة و المسافة كانوا طبيعين جداا!!

الدواسة ناشفة و مافيش استجابة!!!

هى دى نيسان اللى بيقارنوها بلانسر و بيقولو احسن

اقتباس:

---

المشاركة الأصلية كتبت بواسطة Rsarabia

هى دى نيسان اللى بيقارنوها بلانسر و بيقولو احسن

---

حضرتك قصدك الباجيرو؟؟ اصل اكيد مش قصدك الانسر!!

انا مستغرب جدا يا نادر.. بس انا اعرف 3 في الشغل كان معاهم ليبيرتي لمده سنتين و غيرو قريب لأكس ترايل... و كلهم اجمعو ان النيسان (عربيه اكتر)... يعني انعم و مناورتها احسن. قالو ان اللبيرتي سحبها احسن... بس الفرق مش كبير بينها و بين الاكس تريل. يا ترى جربت ليبيرتي قبل كده؟؟

الليبرتي قعدت فيها بس ما سقتهاش....كل اللي حسيت بيه اني كنت هاجيب اللي في بطني و ظهري اتقسم نصين :)

بس كشغل صحراء و فحت و ردم الليبرتي تكسب بمراحل...و ده بردو كان كلام السواق...

ما أنكرش ان ال xtrail انعم ...بس مش عربية ياباني !!

اخبار العزل بتاعها ايه

كل عام وانتم بخير
الانطباع الاول عند قراءة تجربتك فى القيادة لمسافة 30كم ان الحكم كان سريع , قيادة أى عربية داخل التجمع الخامس على 120 كم سوف تعطيك نفس الشعور بعدم الثبات والاصوات وخلافة
دعنى اقص عليك تجربتى (عندى منذ اغسطس 2007 اى منذ عام) واليك النتيجة
- اتفق معك فى ان التابلوة فقير فى الشكل والخامات - وهو طابع مشترك لسيارات الدفع الرباعى
- التكييف قوى جدا كما اوضحت بالاضافة الى وجود فتحات تخزين لحفظ المواد مبردة على الجانبين وفى المنتصف اسفل التابلوة
- الكماليات الموجودة بالسيارة مناسبة وعملية جدا ومثبت السرعة ذو حساسية عالية
- الموتور ناعم جدا على الرغم من قوة الاداء التى يوفرها والعزل داخل العربية ممتاز سواء لصوت المحرك او اصوات الريح على السرعات العالية
- موضوع التسارع مظبوط - ليس بالقوة المتوقعة , على كل الاحوال فكل سيارات الدفع الرباعى مزودة بناقل حركة مصمم لنقل العزم مما يؤثر سلبا على التسارع
- الثبات ممتاز - على كل السرعات وقد تجاوزت 170كم فى طريق السخنة مع ثبات تام واعتقد ان الموتور كان يقبل المزيد ولكنى تراجعت للامان
- سافرت بالعربية اماكن كثيرة لقيادة مستمرة لمدة 6 ساعات متصلة , وفى جميع الحالات لم اشعر بتخاذل العربية او ارتفاع الحرارة او اى اصوات غير اعتيادية- بل احسست ان العربية مستعدة للاستمرار وكانها لازالت فى نقطة البداية
- اداء العربية سلس جدا ولا يقارن بسيارات سيدان كثيرة مثل الصنى والانسر فهى تتفوق عليهم فى النعومة وسلاسة الاداءوبالطبع الاداء انعم من سيارات مثل الليبرتى والباترول
- الدفع الرباعى فى هذة السيارة مناسب كسيارة SUV مصمة للعمل داخل المدن وعند الضرورة كسيارة دفع رباعى , ولكن لا يقارن بالسيارات المصممة للعمل كسيارة دفع رباعى تام حيث لاتحتوى على 4 lock والذى يتيح العمل لكل العجلات الاربعة مستقلة , على الرغم من وجود اشارة 4 lock داخل السيارة ألا انة يشير الى ان العربية تعمل بالعجلات الامامية والخلفية فى أن واحد
- ملحوظة اود تأكيدها لمحاربى التجميع المصرى انة ممتاز ويؤكد على مهارة العامل المصرى والادارة المصرية
- معلومة اخرى: هذة الموديل ينتج منذ 2001 حتى الان وقد قامت نيسان ببيع 850 الف سيارة من هذا الموديل فى كل انحاء العلم وقد احتلت المركز الاول فى فئتها لمدة ثلاث سنوات متصلة من 2004 الى 2006
- معلومة اخيرة : تم انتاج موديل جديد فى 2008 الشكل جديد ولكن بنفس المحرك ومجموعة الحركة وتم تسويق هذا الموديل فى اسواق اوربا وكندا , علما ان الشكل الحالى المنتج فى مصر لا يزال يباع فى الخليج والشرق الاقصى دون توقف

أهلا بك يا أستاذ nehadh:)

يعني حضرتك معاك العربية ...ليه ماشوفنلهاش تقييم مفصل من زمان:)...انا منتظره منك بالكامل في أقرب وقت:)

بالنسبة لقصر المسافة ال 30 كيلو اللي سقت فيهم العربية...فا عايز أقوللك اني بقالي 5 سنين بسوق في التجمع الخامس و بأنواع عربيات كتير جدا...من ال 127 و ال 128 و الادا مرورا بالأكسنت و الكورولا و البيكانتو لحد الجولف و الأوكتافيا و البي ام....يعني الحمد لله عندي خبرة متواضعة في التفرقة ين مستوي الثبات بين السيارات ...و كلهم علي نفس الطريق...مش علي طرق مختلفة....

مفهوم الثبات مش ان العربية تبقي ثابته في طريق مستوي و حرير...بل بالعكس...لما يكون الطريق مش مستوي و مليان مرتفعات و منخفضات هو ده اللي نقيس فيه الثبات...عشان كده التجمع مكان جيد لاختار القيادة

حاجة كمان مش معني ان العربية جابت 170 يبقي هي كده ثابته....ما البيكانتو بتجيب 170...و ال127 جابت 160 مره....بس الكلام ده كله في طرق سفر يعني طريق مستقييم و مافهوش ملفات او غرز أو أو .....يعني أي عربية مهما كانت هاتجيب السرعة دي مستريح....بس نيجي عند المواقف الحرجة...هو ده اللي بيبين ثبات العربية علي السرعات العالية...و ده لاحظته اما حاولت أعمل حرف الS علي سرعه متوسطة....و ماقدرتش تسد معايا

باقي النقاط احنا تقريبا متفقين فيها....:)

صباح الخير,,,
رآيك يحترم يانادر

انا كان عندي X-trail موديل 2004 و كانت ياباني و مش التقفيل المصري

بصراحة العربية تختلف في انه التقفيل من الداخل و الخامات أفضل بكثير من المجمعة مصري و شكلها مريح اكثر لكن ده يمكن علشان الموديل كان اقدم و مختلف

بس انا مستغرب من كلامك عن التسارع و الثبات , X-trail الياباني كان تسارعها جيد جدا و دواسة البنزين كانت حساسة جدا لاقل ضغط عليها , زائد انه الثبات و العزل كانه هايلين

عيبها الرئيسي هو ضعف الصاج المستخدم بها , و اخويا عمل بها حادثة و اتبهدلت جدا و مرجعتش زي الاول

علشان كدة اضطرينا نبيعها ...

بس هل الفرق ده كله له علاقة بالتقفيل المصري ؟

اعتقد ان الرابط التالى لا يحتاج الى مزيد من الشرح ويؤكد قوة اداء وثبات السيارة
http://www.arabic.arabia.msn.com/Aut...sanXTrail.aspx

على كل الاحوال فموضوع ثبات وعدم ثبات العربية اثناء القيادة يختلف من شخص لاخر

ألف شكر يانادر على التجربة وأنا شايف إن سعر العربية بعد التجميع المصري لسه مبالغ فيه شوية يعني أنا متأكد إن الفولكس تيجوان تتفوق عليها في كل حاجة

اقترح ان تبادر وتجرب العربيتين وتشوف هل الفرق يستاهل تدفغ 250 الف زيادة فى سعر التيجوان
اعتقد ان الفرق فى صالح الاكس تريل

التيجوان فيها 3 فئات مانوال 1.4 Tsi
و أسعارهم:
230,000
245,000
275,000

أما الأوتوماتيك فهي 2000 سي سي فقط...عشان كده سعرها مرتفع جدا
545,000

شكرا على تصليح المعلومة
اذا الفرق هو 300 الف جنية وليس 250 كما كنت اظن
وكمان فرق 500 cc فى سعة المحرك
اعتقد جميعها فى صالح الآكس تريل

اقتباس:

---

المشاركة الأصلية كتبت بواسطة nehadh

شكرا على تصليح المعلومة
اذا الفرق هو 300 الف جنية وليس 250 كما كنت اظن
وكمان فرق 500 cc فى سعة المحرك
اعتقد جميعها فى صالح الآكس تريل

---

بس أنا قصدي أقارن الإكس تريل بالتيجوان 1.4 وهما في سعر بعض والقوة الحصانية فرق 25 حصان لصالح الإكس تريل لكن يعوضها وزن التيجوان الأخف لإن تسارع التيجوان ل 100 في 9.6 والإكس تريل في 11ثانية

مع احترامي لشركة فولكس الا انها فشلت في تصميم تيجوان 1.4 tsi لاسباب كتيرة :

1- اجماع كل مختصين السيارات في العالم ان السوبر تشارجر يكافح لتوليد العزم لتحريك التيجوان من حالة السكون للحركة وده يؤدي الى تقصير العمر الافتراضي للسوبر التشارجر

2- الصوت العالي جدا الصادر من سوبرالتشارجر واللي اكيد ناتج من حجم السيارة الفظيع

3- الحرارة المرعبة الناتجة من وجود سوبرتشارجر والتيربو في موتور سعته 1400cc وللي بالتالي هيحتاج نظام تبريد عالي جدا + الحرارة العالية الموجودة عندنا في مصر في الصيف

4- تاكيد اكتر من مالك لهذه السيارة في اوروبا انا التيربو قابل انه يكون في خبر كان بعد انتهاء فترة الصيانة وللي بالتالي لازم يتغير بمبلغ مرعب وده قياسا على تكرار نفس الحدثه في 4 جيتا اوروبي بتشتغل بمحركات tsi turbo .

5- المصيبة الاكبر من كده انها عاوزة بنزين 95 باي شكل من الاشكال وده اكده كتير من الناس في اوروبا لان الموتور من ناقص

6- الاهم من كده هل التوكيل هيوفر الناس الفهمه وقطع الغيار ؟؟؟؟؟؟ اشك بكل تاكيد
تعليق بسيط على نقطتين:
1- بيقال ان محركات tsi حاصلة على جائزة افضل محرك 2007 في المانيا ....الكلام ده صحيح بس الموتور التجريبي خد الجائزة وهو محطوط في جووووووولف مش تيجوووووووووووووووووووووو ووووووووووووووووووووووووو وووووووووان

2- يقال ان التيجوان لها اعلى مبيعات في اوروبا ومتفوقعة على BMW X3 .....الكلام صحيح بس التيجوان 2000CC مش 1400CC

كل الكلام ده ملخص لما هو موجود في المواقع التالية:
http://www.autocar.co.uk/CarReviews/...-150-S/228236/
http://www.autocar.co.uk/forums/t/1438.aspx
http://www.whatcar.co.uk/car-review-...x?RT=2790#Road

نصيحتى للعايز يشترى 4x4 جيدة ومناسبة لشوارع مصر واسعار بنزين مصر وبكماليات ممتازة وقيادة تجمع بين نعومة السيدان وقوة الجيب
يشترى الاكستريل
العربية دى لو مستوردة حيكون سعرها مش اقل من 500 الف بس الحظ انها تجميع محلى وكمان ممتاز على عكس بعض الماركات الاخرى اللى تسببت فى انطباع غير جيد عن التجميع المحلى

الف شكر علي التقييم يا نادر:):)

يا جماعة محدش يبنى تقيم عربيه suv
بناء على سواقته لعربيه سيدان
الفرق بينهم كبير جدا فى الثبات و الراحة طبعا لصالح السيدان
والا مكنش حد جاب مرسيدس و كله جاب باجيرو و لاند روفر و....................الخ

كلام مظبوط ياحسين
اتمنى ان يكون هناك مشاركيين اخرين من اصحاب الاكستريل
مش معقول الكل صنى صنى صنى

كلام مظبوط ياحسين
المقارنة فى الثبات لايمكن تكون بين سيارات سيدان وجيب
على كل الاحوال هناك مؤشرات على مدى فعالية ثبات العربية
مثلا : تآثير التيارات الهوائية اثناء عبور تقاطعات انفاق او سيارات النقل او الاتوبيسات اثت=ناء القيادة على الطرق السريعة
كذلك مدى تحكم السائق فى اثناء الدورانات

بس ياجماعة الثبات مش هو كل حاجة فى العربية علشان نتكلم عنها طول الموضوع اتمنى لو ان احد اخر من اصحاب الاكس تريل يشارك فى الموضوع - مش معقول كل موضوعات نيسان صنى صنى صنى

شكرا ياباشا على التقييم
ولكن لى تعليق على كلام حضرتك
المقارنه ظالمه جدا للحكم على سياره دفع رباعى بسيارات سيدان
ومع ذلك الكل بيشكر فى ثبات الاكس تريل (بالنسبه للسيارات ال suv ) وليست السيدان
وعلى فكره شوف مثلا تقييم موقع توب جير للثبات فى الاكس تريل 13 من 20 والراحه 13 من 20
انما شيروكى الجديده 6 من 20 فى الثبات و الراحه 7 من 20
حتى التوجان واخده 12 من 20 فى الثبات و 9 من 20 فى الراحه
يعنى كدا كدا الاكس تريل متفوقه فى الراحه والثبات عن الاتنين
http://www.topgear.com/uk/nissan/x-trail
يعنى كل حاجه فى صالح الاكس تريل
ولكن الحق يقال ان الشيروكى ليها سمعه ممتازه فى الصحراء فقط كدا عربيه ثباتها ضايع وعفشتها سيئه لابعد الحدود ولكن السحب خيالى
انا مثلا عندى الكورولا اثبت بكتير من التويوتا برادو رغم خفة وزن الكورولا بالنسبه للبرادو ولكن البرادو suv وده لا يعيبها اطلاقا
تحياتى

شكرأ يا نادر على التقييم :)

ياجماعة انا مستغرب جدا جدا ازاى 177 حصان وتسارعها عادى....التقييم دة وحش اوى فى حق العربية :)

شكرا جدا طبعا للتقيم

هحكيلكم موقف ياجماعة مظنش أنه ممكن يتكرر على الأقل معايا
فى يوم طلعت أجرب إكستريل فى طريق المقطم-الهضبة الوسطى-بعد الكمين فى الجهة اليمنى
فيه هناك كشك كهرباء وحوليه طريق داير أسفلت وكان فيه شكوى من الفرامل قولت أجرب بالراحة الأول وأجى عند الملف وأضرب فرامل لقيتها كويسة.المهم بدأت أزود السرعة وأضرب فرامل زى الفل طب زود كمان
سرحت ياجماعة مع العربية لحد ماوصلت لسرعة 160 كم/س وأخدت الملف بكل سلاسة وضربت فرامل مفاجأة بعد الملف-يعنى منتهى الغباء-
وكانت بجد مفاجاة ليا إن فى ملف زى ده منحنى جامد بجد والعربية كلبشت فى الارض وقتها وبكل ثبات حسيت بقوة طرد مركزية فظيعة عليا بس العربية متحركتش كانت ثابتة وزى الفل الحمد لله
أنا ركبت عربيات كتير مظنش إن عربية ممكن تكون بالثبات وقوة الفرامل دى وأظن إن لو الموقف إتكرر مش هيكون غير بإكستريل ده لو اتغابيت وفكرت يعنى إنى أكرره

شكرا على المعلومات والموضوع والردود

موضوع وتقرير راااااااااااائع كالعادة يا نادر باشا .. :S_thum1[1]:
وبكده يبقى عليه العوض ومنع العوض فى نيسان الاكس ترايل خلاص :B4_556:
أكدت ظنونى فى العربية دى من زمان !!!!!

ما تستاهلش دمعة واحدة من دموعنا :stink[1]:

تقييم كويس جدا

انا سقت العربية دي في السعودية وكانت 2005 تقريبا وكان صاحبها معايا وان كنت بعاملها باحترام ماتغابيتش عليها

بس الحقيقة حسيت بقيادة رائعة وممتعة جدا ومريحة جدا والتابلوه بتاعها كان فيه اجزاء ابانوس مش كله بلاستيك

وركبتها على سرعات عالية بس مسقتهاش على السرعات دي
بس حسيت انها ثابتة ومريحة جدا

شكرا يا باشا على سرد التجربة و الحيادية فى العرض

لو سمحت بالنسبة ااأستاذ nadernabil ممكن تقول رايك فى ثبات ال جين 2 والبيرسونا و ايه احسن ثبات عربية جربتها

ممكن تكلمنا على ثبات ال gen2 يا استاذ nadernabil و تقولنا رايك فيه
تحياتى

أحييك يا نادر على رأيك

http://img707.imageshack.us/img707/7559/60399078.gif

معلش اصل الى ركب النيسان x-tril غير النيسان الصنى جامدة اوى وجميلة بس مش شبابية زى العربيات التانية زى الهوندا سيفيك والكيا سيراتو والتويوتا طبعا

السلام عليكم احب اتكلم معاكم على نفس الموضوع عن تجربه العربيه معايا ليها سنتين و عامل 25 الف لغايه دلوقتى العربيه ممتازة معايا استهلاك البنزين ممتاز حتى مع استعمال التكيف , سحب العربيه كويس بدرجه جيد جدا بالنسبه لعربيه اتوماتيك ,الثبات فى السرعه العاليه معقول وصلت 180 ومعتقدش حد بيقدر يمشى على طريق بسرعه عاليه غير طريق وادى النايطرون ومنصحش حد يمشى بسرعات عاليه لان الطرق فى مصر عموما مش مهيئه للسرعات العاليه فى خطورة يعنى بجد خسارة حد يجيب عربيات تمتاز بالسرعات العاليه لانه مش حايقدر يستعمل الميزة دى كتير عند قفل الزجاج متسمعش صوت للمحرك او الهواء الا فى حدود بسيطه فى شىء برضه مهم ان العربيه مع حجمها تصلح للسير داخل شوارع القاهرة الزحمه حتى شارع عبد العزيز , ارتفاع العربيه من الارض مناسب مش عالى اوى زى الجيب رنجلر او الشيروكى مساحه الشنطه ممتاز , متفق ان التابلوة كملياته عاديه و الصالون مش فخم لكن لو وضعنا فى الاعتبار سعر العربيه بالنسبه لاسعار العربيات suv نلاقى ان سعرها منخفض عن اى عربيه تانيه بحوالى 70 الف على الاقل واعتقد ان اللى بيدور على كماليات و شكل و قوة يبقى بيدور على الاكس فيف او لاند روفر او الباجيرو او لاند كروز و غيرها وهنا تبقى المقارنه ظالمه مع الاكس تريل مع الوضع فى الاعتبار اسعار الموديلات دى , بالنسبه للصاج متفق ان الصاج مش قوى بدرجه بس برضه دة بقى سما فى معظم العربيات الحديثه .

السلام عليكم احب اتكلم معاكم على نفس الموضوع عن تجربه العربيه معايا ليها سنتين و عامل 25 الف لغايه دلوقتى العربيه ممتازة معايا استهلاك البنزين ممتاز حتى مع استعمال التكيف , سحب العربيه كويس بدرجه جيد جدا بالنسبه لعربيه اتوماتيك ,الثبات فى السرعه العاليه معقول وصلت 180 ومعتقدش حد بيقدر يمشى على طريق بسرعه عاليه غير طريق وادى النايطرون ومنصحش حد يمشى بسرعات عاليه لان الطرق فى مصر عموما مش مهيئه للسرعات العاليه فى خطورة يعنى بجد خسارة حد يجيب عربيات تمتاز بالسرعات العاليه لانه مش حايقدر يستعمل الميزة دى كتير عند قفل الزجاج متسمعش صوت للمحرك او الهواء الا فى حدود بسيطه فى شىء برضه مهم ان العربيه مع حجمها تصلح للسير داخل شوارع القاهرة الزحمه حتى شارع عبد العزيز , ارتفاع العربيه من الارض مناسب مش عالى اوى زى الجيب رنجلر او الشيروكى مساحه الشنطه ممتاز , متفق ان التابلوة كملياته عاديه و الصالون مش فخم لكن لو وضعنا فى الاعتبار سعر العربيه بالنسبه لاسعار العربيات suv نلاقى ان سعرها منخفض عن اى عربيه تانيه بحوالى 70 الف على الاقل واعتقد ان اللى بيدور على كماليات و شكل و قوة يبقى بيدور على الاكس فيف او لاند روفر او الباجيرو او لاند كروز و غيرها وهنا تبقى المقارنه ظالمه مع الاكس تريل مع الوضع فى الاعتبار اسعار الموديلات دى , بالنسبه للصاج متفق ان الصاج مش قوى بدرجه بس برضه دة بقى سما فى معظم العربيات الحديثه .

متابع