السلام عليكم ورحمة الله وبركاتة
حيرة مستمرة لعدة شهور بين عدة أنواع وموديلات .. وأخيراً تم الإستقرار على الجميلة DS5 2014 وتم دفع المقدم وفى إنتظار إنتهاء الإجراءات بإذن الله
أحكيلكم بقى القصة من البداية
بداية القصة كانت حيرة متناهية بين 6 موديلات
1 - السيتروين DS5 Sport
2 - أوبل إنسجنيا Top Line
3 - Volvo S60
4 - BMW 316i
5 - بيجو 508 Hi Line
6 - مرسيدس CLA180
وبدأت أصفى فيهم واحدة واحدة ... أقولكم أسباب إستبعادى للموديلات الأخرى
- نبدأ بالـ volvo s60 : عربية ملهاش حل ومحترمة آخر 3 حاجات ... بس السعر اللى زودوه بطريقة إستهبالية ... 338 ألف جنيه ... طبعا انا بفكر فى الفئة اللى ألاقى فيها كماليات كويسة ... قلت بلاها الـ volvo
- الـ BMW 316i : طبعا برده عربية ركوبة ومفيهاش غلطة .. بس بـ 334ألف .. من غير زينون من غير حساسات أمامية .. بالنسبالى كماليات كان نفسى فيها ده غير إنى مش هجيب اللون الأسود ولا الأبيض .. يعنى الميتاليك ... يعنى هزود 8000 كمان .. يعنى 342 ألف ... معدية ... قلت بلاها الـ BMW
- مرسيدس CLA : طولى 190 سم .. قعدت فيها راسى خبطت فى السقف ... حجز وإستلام يوليو 2015 .... قلت بلاها المرسيدس
- بيجو 508 : عربية ممتازة ... برده اللى منعنى عنها قلة كمالياتها ... وقلت بدل كده كده فرنساوى يبقى خلينى فى الأشيك
حصرت الحيرة بين عربيتين الإنسجنيا وال سيتروين ... الأوبل ممتازة وكماليات كتير بس مش عارف ليه مستريحتش لشكلها زى السيتروين ... جبت أصحابى وأقاربى وفرجتهم على دى ودى .. كله إختار ال DS5
قلت ياللا على البركة
واللى شجعنى كمان إن بنك PNB عامل عرض شفت إنه معقول على التقسيط بفايدة تصل بعد الإشتغالات ل 8%
رحت على المعرض وكنت ناوى على اللون البنى أو الفيرانى أو الأبيض
شفت عنده واحدة سوده عجبتنى .. عيبها الوحيد إن مش باين فيها السقف البانوراما بس شكلها فخم جداً
إن شاء الله الإستلام هيكون خلال 3 أو 4 أيام
هستلم وأصورلكو العربية وإن شاء الله لو ربنا كاتبلى عمر هعمل تقرير الإستلام
أنا طالب منكو بقى خدمة .. ياريت أى حد عنده ال DS5 يقولى المفروض أستلم معاها أيه لأنى مش جايبها من عز العرب .. أنا هجيبها من أباظة