الموضوع: وأخيراً وبعد تفكير ... إخترت الوحش الجميل ds5

السلااااااااااااام عليكم ورحمة الله وبركاااااااااااااااااااتة
آسف جداً على التأخير يارجالة بس غصب عنى بسبب ظروف الشغل
الحمد لله تم الترخيص بسلاااااااااااااام
أحكيلكم بقى اللى حصل
في البداية تم الإتفاق مع مندوب المعرض على ميعاد الذهاب للمرور .. وإتفق معايا على الساعة العاشرة صباحاً .. ومع إنى قلتله 10 ده متأخر أوى علشان خزنة المرور بتقفل الساعة 12 قاللى متخفش وهنلحق .. تانى يوم جالى الحمد لله في ميعاده بالظبط الساعة 11:20 ظهراً من أوتو أباظة في التجمع الخامس .... وانطلقنا إلى مرور الوايلى حيث عنوان سكنى القديم
قبل ما نبتدى الطريق قلتله إعمل حسابك إنى مش هجرى بالعربية لأنى لسه محفظتش أبعادها .. قاللى على مهلك وقعدنا نحكى .. ولقيته فتح في الكلام عن زباين راحو معاه علشان يرخصوا .. الزبون الفلان عربيته إتخبطت وهوه في المرور بيرخص وزبون تانى عربيته معرفش حصل فيها أيه وهوه طالع من المرور .. طبطبت على رجله وقلتله صللى على النبى وإفتكرلنا حاجة عدلة
يادوب دخلت المرور من هنا ... .................. وفى نفس المكان اللى لسه معدى منه بعدها بـ 3دقايق 3 عربيات لبسوا في بعض .. حمدت ربنا
المهم وصلنا المرور على 11:45 ... خرجت من المرور الساعة 3 العصر وأنا معايا الرخص والنمر الحمد لله
نيجى بقى للعربية .. طبعاً مش هقدر أديلكم تقييم كامل لأنى مسقتهاش في اليومين اللى فاتو غير بتاع 25 كيلو
بس مبدأيا التقييم المبدأى لغاية إن شاء الله مارجع من السفر وأعملكم تقرير شامل عنها
هحاول أذكرلكم المزايا والعيوب اللى إكتشفتها في الفترة البسيطة اللى سقتها فيها
1 - العربية بسم الله ماشاء الله فخمة جداً من بره ومن جوه
2 - المساحة الداخلية مريحة جداً مع إنى من طوال القامة
3 - العربية عالية عن الأرض ( الحمد لله محكتش في ولا مطب لحد دلوقتى )
4 - السحب بتاع العربية محترم مع إنى لسه مقرصتش عليها لغاية دلوقتى بس شكلها مش هتخزلنى لما أحتاجها
5 - إشتغلت ببنزين 92 ومسمعتش فيها أى كركرة لحد دلوقتى
نيجى للعيوب البسيطة برده اللى إكتشفتها
1 - لا يوجد نواكل على إطار النوافذ ( كان هيبقى شكله حلو أوى )
2 - صوت الموتور عالى شوية عند بداية التدوير ... بس بعد العربية مابتسخن مبتسمعش صوت الموتور نهائى
3 - العفشة إلى حد ما ناشفة شوية في المطبات .. بس نعمت شوية لما ظبطت ضغط الكاوتش ونفخته نيتروجين .المشكلة إنى مبقتش عارف أظبطه على كام والباليته اللى على الباب مفهمتش منها حاجة .. المهم ظبطته على 32
ومش قصدى إنها ناشفة في المطبات إنها مش ناعمة .. بمعنى لو قيمت العربيات اللى ركبتها في نعومية العفشة هدى الكيا سيراتو 2010 ( 3 من 10 ) ... الهيونداى نيو أكسنت 2008 ( 4 من 10 ) ... الفولفو S80 2012 ( 9 من 10 ) .. ساعتها هدى السيتروين ( 8 من 10 )
4 - العربية الموتور بتاعها بيسخن أوى مع إن مفيش أى حرارة دخلالى جوة .. يعنى لما رحت المرور الجو كان حر ... يادوب المسافة من التجمع للعباسية .. رحت وسيبت العربية مش شغالة لأكتر من ساعة .. ولما جه الراجل ياخد البصمة بتاعة الموتور كان الموتور لسه سخن جداً
وكمان مشيت بيها مشوار صغير بالليل .. رجعت وغطيتها .. وبعد ساعتين رحت مشوار بالعربية التانية وجيت أعدلها في الجراج لقيت الكبوت لسه برده سخن من الناحية الشمال .. مش عارف بقى ده طبيعى ولا لأ
5 - حوض الموتور صغير جداً .. الراجل قعد ربع ساعة علشان يرفع بصمة الموتور
بس يمكن العيوب دى علشان أول مرة أسوق السيتروين مع إنى لا أعتبرها عيوب
في المجمل العربية أقل وصف تتوصف بيه إنها ممتعة .. وطبعاً أنا إلى الآن مش عارف أستخدم الأوبشن اللى فيها كله علشان فيها زراير كتييييييييييييييييييييير لسه مأخدتش عليها علشان الوقت مش مساعدنى
وعلى وعدى إن شاء الله هعمل تقرير كامل عنها بعد أول صيانة أكون أخدت عليها شوية
وبرده علشان مزعلكمش أنا صورتها شوية صور وهيه واقفة في المرور


عروسة واقفة أهيه


حوض الموتور






شكلها حكاااااااااااااية من ورا بنت الأيه


كفاية عليكو كده .. لما أرجع بأى من السفر أبقى أكمل

المشاركة الأصلية كتبت بواسطة densfog

السلام عليكم
وعليكم السلام ورحمة الله وبركاته
شكرا على سعه صدرك .... و عاوز اوضح حاجه بس انى معجب جدا باختيارك ... وانى من ساعه العربيه ما ظهرت وانا تقريبا بتابع كل فيديوهاتها .... واللى بيعجبنى فيها باختصار انها تقريبا سياره تصوريه على ارض الواقع ... وليها شخصيه متفرده.... وصراحه كنت بفكر معاك بصوت عالى ... بس انا منكرش انى بتمنى اجيبها .... وفرحت جدا لما لقيت اخوه اتنين افاضل فى المنتدى معانا اشتروها .... وليا كام سؤال بعد اذنك :
إسأل زى ما إنت عايز
1- عند حضرتك اى فكره عن اسعار اى قطع الغيار او اسعار الصيانات وهل قطع غيارها مع انتشار السياره الضعيف جدا موجوده فى التوكيل ولا لو احتاجت حاجه هضطر استنى لما تيجى من بره ؟؟
لا والله معنديش أى فكرة عن الموضوع ده لحد دلوقتى .. بس عموماً بالنسبة لعز العرب والعربيات الفاخرة اللى عنده معظم قطع الغيار بتيجى بالطلب وده عن تجربة مع أخويا والفولفو ( إتكسرت عنده المراية الجانبية اللى فيها كاميرا جت بعد حوالى شهر وكان سعرها 12000 جنيه )
2- حضرتك متعرفش هيا باعت كام عربيه تقريبا ؟
على كلام مندوب أوتو أباظة بيقولى إنه باع منها 3 عربيات في أسبوع وبالنسبالى كان فيه عربيتين هناك واحدة كانت متباعة والتانية أنا اللى اشتريتها ... وكمان ياسيدى إنت مالك إتباع منها كام عربية .. أيه المشكلة يعنى لما تبقى راكب عربية وتبقى ماشى في الشارع الناس كلها بتبصلك ... ده في حد ذاته تميز .. مش أحسن ماتبقى راكب حاجة مرطرطة .. إركب ومتع نفسك ياجدع

3- هيا بتاخد اد ايه بين الحجز والاستلام لو من التوكيل ؟
من التوكيل بتاخد حوالى شهر لو اللون مش موجود وسعرها الرسمى 299800 ...

4- هيا سحبها عامل ايه بالنسبه لعربيات حضرتك جربتها قبل كده ؟
بص ... العربيات اللى جربتها طبعاً أقل منها ماعدا الفولفو S80 ... حكاااااااااااااية ... سحب الفولفو جبار لدرجة إن ساعات كنت بحس إن فراملها ضعيفة بسبب إنها كانت بتسحب منى من غير ماحس ( 180 حصان ) ... بالنسبة للـ DS5 لسه معرفش لأنى لسه مقرصتش عليها ,.. بس أنا شايف إن إستجابتها حلو اوى وناعمة جداً
5- بالنسبه للسقف الزجاجى هل ليه اى نوع من الحمايه للنقر او الكسر ( سؤال رخم انا عارف بس انا ساكن تقريبا على البحر والبوت القديمه هنا بتتفتت بسبب عوامل الجو )
أعتقد إن السقف مش هايبقى زجاج عادى .. أكيد مقاوم للكسر والخدش .. على الأقل مش هيتنقر لو جت فيه طوبة زى السقف العادى ... بس متجيش توقع عليه دبش وتقول إتكسر ليه ؟

6- على حسب علمى ان اللون الابيض كان بينزل فى الاول بس وبعد كده مبينزلش مصر هل ده ىحقيقى ؟ وهل فيه امكانيه طلب الانتريور البيج ؟
العربية التانية اللى كانت في أوتو أباظة كانت اللون ابيض .. ولما رحت B Auto كانت العربية اللى هناك برده أبيض ... وأنا كنت هاطلبها بيضاء لولا المدام عندى عجبها اللون الأسود قلتلها والله ماهكسفك .. وعلى فكرة اللون الأبيض مع السقف البانوراما تحفففففففة .. وعلى فكرة برده اللون مش أبيض زى باقى العربيات .. ده أبيض لؤلؤى
وبالنسبة للإنتريور البيج نو واى .. إسود فقط لا غييررررررررررررررررررر
دعاتك ربنا يطمنى من ناحيتها ويرزقنى انى اجيبها فى الكام شهر اللى جايين بأذن الله ...
ربنا يرزقك إن شاء الله .. وإنت ممكن تستنى شوية يمكن موديل 2015 ينزل .. بس ياريت سعرها ميزيدش لأن على حسب كلام مندوب المبيعات في أباظة سعرها هيزيد والله أعلم ... بس أعتقد إن موديل 2015 لو نزل مش هيتغير حاجة فيها

اسف على الاطاله ... بس معلش حضرتك و ا/شبراوى املنا فى اننا نعرف كل حاجه عن العربيه دى ... وفى انتظار تقرير مفصل بعد أذن حضرتك ... خاصه عن مميزات الشاشه الوسطى
ياسيدى إنت تؤمر بس وأنا عليه التنفييييييييييييييذ
بس والله أنا لسه معرفتش حاجة عن الأوبشنز الكتيييييييييييييييييير اللى فيها ... أنا سيبتها في الجراج وسافرت علشان أشوف لقمة عيشى ... هيه فيها كمية زراير تلخبط ...
بس عامة بالنسبة للشاشة مبدأياً إعمل حسابك إن النافيجيشن مش شغاااال ومفيش خرايط لمصر عليه ولا هيبقى فيه خرايط لأنى لسه مراسل الشركة اللى بتعمل الخرايط لسيتروين وقالتلى إن الموضوع متوقف على الشركة المصنعة واللى لحد دلوقتى مطلبتش منها خرايط لمصر