المشاركة الأصلية كتبت بواسطة yahia_zakareya
اتفق معاك
و أنا بقع في الغلط ده أحيانا (بس بره المنتدى) و غالبا بيكون في محيط العائلة .
المناقشات الجادة و المفيدة و كيفية الحوار الراقي هي أمور 95% من البيوت لم تقم بتنشأة أبنائها و تدريبهم عليها و إعدادهم لمخالطة الناس بكل إختلافاتهم .
اللسان هو أكثر عضو (يعمل إختياريا) في جسم الإنسان يستخدمه صاحبه ، و لو تم عزل الإنسان عن الناس لقتل نفسه من الوحدة ، و رغم أهمية الكلام و التعبير عند الإنسان لهذه الدرجة إلا إنه في نفس الوقت متعلمش و مش عايز يتعلم إزاي يتكلم و إزاي يستقبل كلام الناس و إزاي يعلق على كلامهم بدون تجريح و بدون مجاملة أيضا .
المشكلة ديه موجودة من زمان ، فقط الإحساس بيها هو اللي زاد في الوقت الحالي عند بعض الناس .
الكلام مع الناس له أصول محدش علمهالنا و إحنا صغيرين و اللي بيكبر من حجم المشكلة هو الإحساس بعدم الأهمية عند الطفل و ده جريمة بترتكبها أغلب الأسر المصرية مع أطفالهم اللي كبروا دلوقتي و بقوا رجالة و فيه منهم زملائنا في المنتدى .
إنك تكون و إنت طفل محدش بيسمعلك ديه بتبقى جارحة ليك جدا ، و بتسيب أثر سيئ عميق في نفس الطفل ، و يبتدي ينظر للمجتمع اللي حواليه على إنهم وحوش و لو متعلمش يخربش هيضيع.
و من هنا البداية .....
بداية عدم التسامح و الكلام السليط و الخربشة في المعاملة ، و كل ده بدأ بدافع حماية النفس من إجتياح الآخرين و تسلطهم و تهميشهم للطفل اللي بدأ يكبر و عايز يحس إنه كيان معترف بيه و له عقلية جيدة ممكن توصل لحلول للمشاكل أحسن من اللي بيقترحها الكبار .
و يكبر الطفل و يكبر معاه الوحش اللي جواه .
كلنا متفقين على إننا كلنا لازم نتبع الرسول - صلى الله عليه و سلم - و نقتدي بيه في المواقف المختلفة مع التسليم بإنه شاف في حياته اللي أصعب من اللي بيشوفه الواحد مننا .
و رغم ده محدش (إلا القليل القليل القليل) بيفتح سيرته و يكون مليان رغبة في التعلم من هذا الرجل العظيم .
حياتنا الدنيا واخدانا لدرجة إهمالنا للأصول اللي هتخلي حياتنا أحلى لو مشينا عليها ، بس الأول لازم نعرفها و بعدين نتعلمها و بعدين هنغلط (مفيش مشكلة) و أكيد هنتقن في الآخر كل تلك الأصول و القواعد الذهبية للحوار مع الآخرين و التعامل معهم بلباقة .
مش عيب إني أكون جاهل لمهارات معينة حتى لو سني 40 سنة (مثلا) ، إنما العيب لما أكابر و أقول أنا زي الفل ... أنا مفيش فيا حاجة غلط ... الناس هم اللي مش فاهمني ... يا سلام عليا و على أفكاري اللي مفيش زيها ... أنا عقلي يوزن بلد ........... إلخ
شكرا ليك جدا إنك فتحت الموضوع ده للمناقشة و للعظة و لعلها فرصة لكل واحد فينا يرجع يقرأ مشاركاته و يحكم بكل إنصاف على اللي كتبه هو محدش غيره و يشوف حالته الكلامية صحتها إيه ؟
لو لقى كتاباته لبقة و مفيش فيها تجريح يبقى يحمد الله و يعاهد نفسه على الإستمرار .
لو وجد كتاباته فيها تجريح أو تقليل من شأن أحد أو إستهزاء (حتى لو بالتلميح) أو سخرية مباشرة و غير مباشرة ...... إلخ ، ساعتها لازم يقف مع نفسه وقفة جادة و يفتح الكتب اللي متخصصة في مهارات الكلام اللبق و يستعين بأقرب الناس إليه اللي هيعرفوا يساعدوه في التخلص من أسلوبه الخاطئ في الكلام مع الناس و هيصبروا عليه لحد ما يتقن الأسلوب الجديد و يبقى لبق في الكلام و منصت للآخرين و يختلف في الرأي دون خسارة الود .
الكلام في الموضوع ده مينتهيش أبدا لأن المصيبة في مجتمعنا كبيرة كبيرة كبيرة .
و أخيرا كل خطأ فيما كتبت فهو من عندي ، و أي صواب فهو من توفيق الله .
طولت عليكم و كتبت كلام كتير ، لذلك أعتذر عن الإطالة .
تحياتي للجميع