الموضوع: لحظات الفراق !

صديقي المواطن
قولا واحدا لازم تعرف إن قصتك دي مش غريبة وملايين في الكرة اﻷرضية بيشاركوك هذا العشق وحب التملك أو إفتقاد عنصر مألوف ألفته في حياتك وأنا عن نفسي ممكن أوي أعيط أو أحزن على عربية ووالله لسه من شهرين تقريبا بشتري عربية كانت مرمية في مقلب زبالة قعد أخو صاحبها وهو شريك فيها قعد يعيط ويودي وشه مني الناحية التانية وبيعيط عن إنها كانت فييين وبقت فييين وعليه وأنا واحد من الناس تشكل العربية أحد أعمدة حياتي الرئيسية وممكن أتصور أضحي براحتي وبأكلي وشربي لكن لا يمكن أتخيل أتخلى عن واحده من عربياتي وفيه ناس بالملايين وأنا منهم ميحلاش ليهم التفكير ومتطلعش منهم أفكار عبقرية غير وهي بتسوق مسافات طويلة وأماكن رايقة وطبعا هناك ناس بتكلم العربية أو زي مبتقول مخنوق من البيت أو الشغل فتقعد جوه عربيتك وهي بتنقلك من مكان لمكان تبدأ تفكر بصوت عالي وتقعد مثلا تخبط عالدركسيون وشوية شوية لا شعوريا سيتربر إحساس داخلك إن بينكم عشرة
فمتزعلش مش إنت لوحدك أنا فاهمك ومتعاطف معاك قلبا وقالبا بارك لمن إشتراها وإبتسم في وجهه وتمنى له الخير وسيعوضك الله خيرا منها وتعيش معاها مرحلة جديدة من حياتك
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

شعور صعب
فاكر انا لما بيعت اول عربيه اشتريتها - و برضه اللى اشتراها كان اول واحد يعيانها
و حاسس بشعورك لما المشترى كان بيعاين العربيه
و فعلا صعبت عليا جداا رغم انها كانت عشره 4 سنين بس وفى اخر سنه بدأت اثار الزمن تظهر عليها و كنت محتاج فلوسها فى وقتها و كان معايا عربيه تانيه اصلا

طيب تخيل فعلا انها بتوحشنى لغايه دلوقتى (بعد مرور سنه و نصف) و لو اعرف عنوان المشترى بالظبط كنت روحت عديت تحت بيته لمجرد انى ابص عليها من بعيد
و كل شويه افتكر ذكرياتى معاها و اول مره اسوقها و فرحة مراتى بيها اول مره نركبها و شقاوة ابنى فيها لما كان طفل رضيع و لما رشيتها و جبتها من بتاع الدوكو قبل مايركب الفرش الداخلى بتاعها و الاصدامات علشان ارجع بيها مراتى من عند الدكتور بعد ولادة بنتى
مواقف و شريط ذكريات طويل - نفسى فعلا اسوقها دلوقتى و لو نصف ساعه بس