مفيش مية في العربية خالص

احبائي ..
سافرت امبارح مشوار طويل بعربيتي ( اوبل فيكترا 99 ) وكان عندي عداد الحرارة مش مظبوط ..
المهم .. لما وصلت البيت .. سبت العربية تبرد شوية وحبيت اشوف مستوى المية في العربية .. لقيته عادي المية مش ناقصة ..
والصبح لما جيت اركب العربية ( الحمد لله بجد ) مش عارف ليه قلت اشوف مستوى المية تاني .. لقيت مفيش ولا نقطة مية في العربية .. فضلت املي القربة حوالي ستة لتر لحد ما القربة اتملت ..
وبعدين مشيت حوالي عشرين كيلو وبطلت العربية وجيت ادورها تاني مش راضية تدور خالص ..
عاوز اعرف حصل ايه ؟؟ ليه المية اتبخرت من العربية ؟؟!! وليه مش راضية تدور تاني ؟؟!!!!

لما حضرتك بطلت بعد المشوار كان فى ميه ولا لا؟

لا كده اكيد عندك كاوتشه مقطوعه والمياه بتنزل منها زورد تانى وانت واقف جنب العربيه ودورها وخليك مستنى تشوف التسريب جاى منين ..... هذا وبالله التوفيق

اصل 6 لتر كتير جدا معنى كده ان الدورة كانت فاضية خالص
على العموم جرب اللى قالك عليه هيثم باشا لو دارت شوف بتنزل الميه منين و غير الحاجة اللى فيها العيب و لو مرديتش تدور اقطرها لاقرب ميكانيكى بتاع اوبل علشان لو هتحل وش سلندر

دره التبريد عندك بتاخد 7 لتر
عندك تسريب بيزيد مع حراره الموتور
لازم تكتشفه وتعالجه
ربنا يستر ومايكونش وش السلندر اتاثر ..

لمعرفة مكان التسريب يبان فقط فى الصبح
تركن العربية من بالليل و تكون ماليها مية على الاخر الاخر الاخر
و تاخد بيها مشوار بتاع ربع ساعه علشان الدورة تكبس معاك
و تركن العربية غند البيت و يا ريت تركن فى حته نضيفة و تحتها مكان نضيف و ميكونش فية مية او زيت علشان لو العربية بتنقط تعرف
و الصبح حط صباعك تحت كل الكوليهات الموجودة و لو صابعك اتبل يبقى العيب من الحته دى و متنساش الخراطيم اللى ورا الدينامو عند الكولانت لانها ساعات كتير بتعمل كدة و محدش بيعرف التسريب منيين
لو دة طلع سليم ابدا اكشف على زيت الموتور
لو الزيت طلع سليم
دور العربية و شوف القربة و انت فاتح الغطا و شوف لو فى بقاليل بتطلع و لا لآ
شوف و قولنا الاخبار اية
و الله الموفق

ممكن تشترى من اى صيدليه 2 ميكروكروم وتفضيهم فى قربة المية وبعدين زود المية واركنها فى مكان نظيف وممكن تفرش تحت المنطقة بتاعت الموتور ورق جرايد وتسيبها للصبح وبعدين شوف ايه الى حصل لو فى تشريب هتلاقى المكان الى بيسرب لونة زى الميكروكروم كده الى هتلاقية عايز يتربط ربطة والى هتلاقية مقطوع غيرة وربنا يستر على وش السلندر وماتنساش تطلع مقاس الزيت وتشوفة لو العربية خلطت ميه على الزيت ولا لا