حادث باللوجان، أرجو المساعدة في إجابة بعض الأسئلة
السلام عليكم
أنا تعرضت لحادث باللوجان من اسبوعين.
كنت ماشي ما بين 110 و 130 كم و كنت بعدي عربية دوبل من على اليمين و العجل اليمين كان على الترابة و أول ما جيت ارجع شمال قدام العربية إللي كنت بعديها العربية لفت مني و فقدت السيطرة عليها تماما لغاية ما خبطنا في الحاجز الاسمنتي إللي بين الاتجاهين.
أنا ما بفهمش قوي في العربيات بس إللي شافوها و عندهم فكرة كويسة في العربيات قالوا ان فيها الآتي
- إكصدام أمامي
- زجاج أمامي
- البابين اليمين
- العفشة اليمين
- 3 جنوط
- القايمين إللي قدام و إللي في النص عايزين يتعدلوا
- ريداتير "مش أكيد"
- سربنتينة التكييف "مش أكيد"
- حاجة ورا بين العجلتين مش عارف اسمها أيه "تقريبا دونجل أو حاجة زي كدة"
ياريت يا رجالة تفدوني في الاسئلة التالية
1- أيه تفسير إللي حصل؟ "عشان يبقى درس مستفاد"
أنا عندي احتمالين. الأول انني اتلخبطت و ضربت فرامل و أنا راجع شمال و العجل اليمين كان لسة على الترابة بس انا مش فاكر انني ضربت فرامل و لو ضربت معتقدشي اني دوست جامد. الاحتمال التاني أن الكاوتش الشمال إللي قدام فرقع و ده هتلاقوه باين من شكله في الصور تحت. الجنط الشمال إللي قدام بالمنظر ده مع ان الناحية الشمال ما اتلمستش. فأنا متأكد انه فرقع بس قبل ولا بعد ما العربية لفت معرفش. انا مسمعتش صوت فرقة الصراحة بس كنا قافلين الشبابيك.
هل الاحتمالين دول منطقيين و هل في احتمالات تانية؟
2- العربية تكلف في حدود كام عشان تتصلح؟
3- لو بعتها بحالتها تجيب كام؟ "هي 2011 فول اوبشنز و عاملة 64 ألف كم"
أخيرا نصيحة لوجه الله
أوعى تتحرك بالعربية من غير ما تربط حزام الأمان.
و لو عندك أطفال، لازم تجيب لهم كرسي كويس و تتأكد أنه مربوط كويس.
أنا كنت مع مراتي و بنتي الصغيرة و الحمد لله محصلناش أي حاجة. بس أعتقد من غير الحزام و الكرسي كان الوضع هيبقى مختلف تماما.
الصور
http://s3.postimg.org/jhe4kv22b/DSC_0384.jpg
http://s14.postimg.org/kst1t3ahd/DSC_0385.jpg
http://s30.postimg.org/nv432ryqp/DSC_0386.jpg
http://s8.postimg.org/mfeq1x9b9/DSC_0387.jpg
http://s27.postimg.org/jg0d5ij7n/DSC_0388.jpg
http://s11.postimg.org/klzx16fbn/DSC_0389.jpg
http://s29.postimg.org/y6sfittd3/DSC_0390.jpg
